കൊച്ചി: മഹാരാജാസ് കോളജില് എസ്.എഫ്.ഐ. പ്രവര്ത്തകനെ കൊലപ്പെടുത്താന് ഗൂഢാലോചന നടത്തിയവരില് ഒരാളെക്കൂടി പോലീസ് പിടികൂടി. മട്ടാഞ്ചേരി സ്വദേശിയും പോപ്പുലര് ഫ്രണ്ട് കൊച്ചി മണ്ഡലം പ്രസിഡന്റുമായ അനസിനെയാണ് അന്വേഷണസംഘം കസ്റ്റഡിയിലെടുത്തത്. ഇതോടെ അഭിമന്യു വധക്കേസില് പിടിയിലായവരുടെ എണ്ണം ഏഴായി. നേരത്തേ മറ്റൊരു കേസില് അറസ്റ്റിലായ അനസിനെ ചോദ്യംചെയ്തപ്പോഴാണ് അഭിമന്യു വധക്കേസിലെ ഗൂഢാലോചനാക്കുറ്റം സമ്മതിച്ചത്.
ഹാദിയ വിവാദത്തില് െഹെക്കോടതിയിലേക്കു മാര്ച്ച് നടത്തിയ കേസിലാണു കഴിഞ്ഞദിവസം ഇയാളെ അറസ്റ്റ് ചെയ്തത്. അഭിമന്യു വധക്കേസില് ഇയാളുടെ അറസ്റ്റ് ഇന്നു രേഖപ്പെടുത്തും. അഭിമന്യുവിന്റെ കൊലയാളികളെ രണ്ടുദിവസത്തിനുള്ളില് പിടികൂടണമെന്ന് അന്വേഷണസംഘത്തിനു കര്ശനനിര്ദേശം ലഭിച്ചു. പ്രധാനപ്രതികളെ ഇതുവരെ പിടികൂടാത്തതിനെതിരേ സി.പി.എമ്മില് അമര്ഷം പുകയുന്നതിനിടെയാണ് അന്ത്യശാസനം.
ഇതോടെ സമഗ്രാന്വേഷണത്തിനു ഡി.ജി.പിയുടെ പ്രത്യേകസംഘവും കൊച്ചിയിലെത്തി. പോലീസ് കടന്നാല് വിവാദമായേക്കാവുന്ന സ്ഥലങ്ങളിലാണു പ്രതികളില് പലരും ഒളിവില് കഴിയുന്നതെന്നാണു സൂചന. എന്നാല്, ഇക്കാര്യത്തില് കൃത്യമായ വിവരമുണ്ടെങ്കില് അറസ്റ്റിനു മടിക്കേണ്ടെന്നാണ് ഉന്നതതലനിര്ദേശം. അഭിമന്യു വധക്കേസില് പോപ്പുലര് ഫ്രണ്ടിന്റെ പങ്ക് വ്യക്തമായെങ്കിലും സംഘടനയെ നിരോധിക്കുന്ന കാര്യത്തില് സി.പി.എം. രണ്ടുതട്ടില്. സംസ്ഥാനത്തെ 36 തീവ്രവാദസംഘടനകളില് ഏറെ അപകടകാരികളായ പോപ്പുലര് ഫ്രണ്ടിനെ നിരോധിക്കണമെന്നു വ്യക്തമാക്കി കേന്ദ്ര-സംസ്ഥാന ഇന്റലിജന്സ് വിഭാഗങ്ങള് റിപ്പോര്ട്ട് നല്കിയിരുന്നു.
ഇതു നടപ്പാക്കണമെന്നു സി.പി.എമ്മില് ഒരുവിഭാഗവും നിരോധനമല്ല, നിയന്ത്രണമാണു വേണ്ടതെന്നു മറ്റൊരു വിഭാഗവും വാദിക്കുന്നു. പോപ്പുലര് ഫ്രണ്ടിനെ നിരോധിക്കണമെന്ന നിലപാടിലാണു ദേശീയ അന്വേഷണ ഏജന്സിയും. അഭിമന്യുവിന്റെ കൊലപാതകത്തിനുശേഷം സംസ്ഥാന പോലീസ് മേധാവി നല്കിയ റിപ്പോര്ട്ടിലും ഇക്കാര്യം സൂചിപ്പിച്ചിരുന്നു. കേന്ദ്ര ആഭ്യന്തരമന്ത്രാലയം ഇക്കാര്യത്തില് ഉടന് തീരുമാനമെടുക്കുമെന്നാണു സൂചന.
