വാക്കോ പ്രവര്ത്തിയോ കൊണ്ട് സ്ത്രീകളെ അപമാനിക്കുന്ന വ്യക്തിയല്ല മമ്മൂട്ടിയെന്ന് മകനും നടനുമായ ദുല്ഖര് സല്മാന്. ചെയ്ത കഥാപാത്രങ്ങള് കൊണ്ട് അദ്ദേഹത്തെ വിലയിരുത്തരുത്. ആ സിനിമകളുടെ എഴുത്ത് അങ്ങനെ ആയതിനാലാണെന്നും ദുല്ഖര് പറഞ്ഞു. ന്യൂസ് 18 ചാനലിന് അനുവദിച്ച അഭിമുഖത്തില് സംസാരിക്കുകയായിരുന്നു സുല്ഖര് സല്മാന്. വ്യക്തിപരമായി സ്ത്രീകളെ അപമാനിക്കുന്ന തരത്തില് ഒരു വാക്ക് പോലും പറയാത്ത ആളാണ് മമ്മൂട്ടിയെന്നും ദുല്ഖര് പറഞ്ഞു.
നേരത്തെ കസബ എന്ന സിനിമയിലെ സ്ത്രീവിരുദ്ധതയുടെ പേരില് മമ്മൂട്ടി ഏറെ വിമര്ശനം കേട്ടിരുന്നു. കസബ വിവാദത്തിന്റെ പശ്ചാത്തലത്തിലാണ് ദുല്ഖറിന്റെ പ്രതികരണം. എനിക്ക് വാപ്പച്ചിയെ നന്നായി അറിയാം. എന്നെയും സഹോദരിയേയും എങ്ങനെയാണ് വളര്ത്തിയതെന്നുമറിയാം. സ്ത്രീകളെ ബഹുമാനിക്കുന്ന കുടുംബമാണ് ഞങ്ങളുടേത്. വീടിനകത്തും പുറത്തും സിനിമ കൊണ്ടോ അതിലെ സംഭാഷണങ്ങള് കൊണ്ടോ വാപ്പച്ചിയെ വിലയിരുത്തരുത്. പൊതുവേദികളില് ഒരിക്കല് പോലും സ്ത്രീകള്ക്കെതിരായി ഒരു വാക്ക് പോലും പറഞ്ഞിട്ടില്ല. സ്ത്രീകളെ ബഹുമാനിക്കുന്ന ആളാണ് അദ്ദേഹം. ആരെയും മനപൂര്വം വേദനിപ്പിക്കുന്ന ആളല്ല വാപ്പച്ചി. സിനിമകളുടെ രാഷ്ട്രീയമല്ല. മറിച്ച് നിലപാടുകള് പങ്കുവയ്ക്കാനാണ് ആഗ്രഹിച്ചിട്ടുള്ളതെന്നും ദുല്ഖര് പറഞ്ഞു.
തന്റെ സിനിമകളില് ഇതുവരെ സ്ത്രീകളെ അപമാനിക്കുന്ന ഒന്നും ഉണ്ടായിട്ടില്ല. ഇനി ഉണ്ടാവുകയുമില്ല. എണ്പതുകളിലും തൊണ്ണൂറുകളിലും എഴുതപ്പെട്ട സിനിമകള് അങ്ങനെയുള്ളതായിരുന്നു. അന്ന് സ്ത്രീകളുമായി ബന്ധപ്പെട്ട വിഷയങ്ങള് ഇത്തരത്തില് ചര്ച്ച ചെയ്യപ്പെട്ടിരുന്നില്ല. അഭിനേതാക്കളും ഇതേക്കുറിച്ച് അറിവുള്ളവരായിരുന്നില്ല. ഇപ്പോഴത്തെ തലമുറയില് എല്ലാവരും ഇത്തരം കാര്യങ്ങളില് ബോധ്യമുള്ളവരാണ്-ദുല്ഖര് പറഞ്ഞു.
ദിലീപ് വിവാദത്തില് വിവാദവുമായി ബന്ധപ്പെട്ട് നില്ക്കുന്ന എല്ലാ ആളുകളെയും ചെറുപ്പം മുതല് അറിയാം. തന്നോട് നല്ല രീതിയിലേ എല്ലാവരും പെരുമാറിയിട്ടുള്ളൂ. കൂടാതെ അമ്മയുടെ എക്സിക്യൂട്ടീവ് കമ്മറ്റിയിലെ അംഗവുമല്ല ഞാന്. ഞാനൊരു അഭിപ്രായ പ്രകടനം നടത്തുമ്പോള് എതെങ്കിലും പക്ഷം പിടിക്കേണ്ടി വരും അത് മറുവശത്ത് നില്ക്കുന്നവരെ വേദനിപ്പിക്കുമെന്നും ദുല്ഖര് പറഞ്ഞു.
