തിരുവനന്തപുരം: ചെറിയ ഇടവേളയ്ക്ക് ശേഷം സംസ്ഥാനത്ത് ശക്തമായി തിരിച്ചു വന്നിരിക്കുന്ന മഴ അഞ്ചു ദിവസം നീണ്ടേക്കും. ബുധനാഴ്ച വരെ ശക്തമായ മഴ പ്രതീക്ഷിക്കാമെന്നും ശക്തമായ കാറ്റിന് സാധ്യതയുള്ളതിനാല് കടലില് പോകരുതെന്ന മുന്നറിയിപ്പും കാലാവസ്ഥാ നിരീക്ഷണകേന്ദ്രം നല്കുന്നു. ഒഡീഷാ തീരത്തെ അന്തരീക്ഷ ചുഴി രൂപപ്പെട്ടതിന് പുറമേ കാലവര്ഷം ശക്തിപ്രാപിച്ചതുമാണ് വീണ്ടും മഴയെത്താന് കാരണമായിരിക്കുന്നത്. മണിക്കൂറില് 40 കിലോമീറ്റര് വേഗത്തില് കാറ്റടിക്കാനും കൂറ്റന് തിരമാലകള് ഉണ്ടാകാനും സാധ്യതയുണ്ടെന്നാണ് കാലാവസ്ഥാ നിരീക്ഷണകേന്ദ്രം നല്കുന്ന മുന്നറിയിപ്പ്.
മഴ കനത്തതോടെ സംസ്ഥാനത്തിന്റെ കിഴക്കന് ഖേലകളില് വ്യാപകനഷ്ടം റിപ്പോര്ട്ട് ചെയ്തു. തീരദേശത്ത് ശക്തമായ കടലാക്രമണത്തിനും സാധ്യതയുണ്ട്. തിരുവനന്തപുരം, കൊല്ലം, പത്തനംതിട്ട, ഇടുക്കി, കോട്ടയം, ആലപ്പുഴ ജില്ലകളില് വ്യാപകമായി മഴയാണ്. കണ്ണൂര്, കോഴിക്കോട്, വയനാട് ജില്ലകളുടെ മലയോര പ്രദേശങ്ങളിലും ശക്തമായ മഴയാണ്. കൊല്ലത്തെയും തിരുവനന്തപുരത്തെയും താഴ്ന്ന പ്രദേശങ്ങള് വെള്ളക്കെട്ടിലായി. കൊല്ലത്ത് ശക്തമായ കടലാക്രമണമാണ്. കൊല്ലത്ത് ഇരവിപുരും അഴീക്കല് മേഖലകളില് കടലാക്രമണം രൂക്ഷം.
ശക്തമായ കാറ്റിന് സാധ്യതയുള്ളതിനാല് കടലില് പോകരുതെന്ന് മത്സ്യത്തൊഴിലാളികള്ക്ക് മുന്നറിയിപ്പ് നല്കിയിട്ടുണ്ട്. തിരുവനന്തപുരം ജില്ലയില് പൊട്ടിവീണ വൈദ്യൂതിലൈനില് നിന്നും ഷോക്കേറ്റ് ഒരാള് മരിച്ചു. രാവിലെ ആറു മണിയോടെ പാല് വാങ്ങാന് പോയ ജോര്ജ്ജ്കുട്ടി ജോണ് എന്ന 74 കാരനാണ് നാലാഞ്ചിറിയില് മഴക്കെടുതിയില് മരണമടഞ്ഞയാള്. തിരുവനന്തപുരത്ത് സ്കൂളുകള്ക്ക് അവധി നല്കിയിട്ടുണ്ട്. നെയ്യാര്, അരുവിക്കര, പേപ്പാറ അണക്കെട്ടുകളുടെ ഷട്ടറുകള് തുറന്നു. നെയ്യാര് അണക്കെട്ടില് ഒരടി തുറന്നപ്പോള് അരുവിക്കരയില് ഒന്നര മീറ്ററും പേപ്പാറയില് ഒന്നര സെന്റിമീറ്ററുമാണ് ഉയര്ത്തിയത്. കിഴക്കന് മേഖലയായ കള്ളിക്കാട് കുറ്റിച്ചല്, അമ്പൂരി, വെള്ളറട പഞ്ചായത്തുകളില് വ്യാപകനഷ്ടമുണ്ടായി.
കോട്ടയം, പത്തനംതിട്ട, ഇടുക്കി ജില്ലകളില കനത്ത മഴയാണ് മലയോര പ്രദേശങ്ങളില് മരം വീഴലും മണ്ണിടിച്ചിലും പലയിടത്തും ഉണ്ടായിട്ടുണ്ട്. വടക്കന് കേരളത്തിലും മഴയാണ്. കണ്ണൂര്, വയനാട്, കോഴിക്കോട്, ജില്ലകളുടെ മലയോരപ്രദേശങ്ങളില് വ്യാപകനാശനഷ്ടമുണ്ടായി. കണ്ണൂരില് വ്യാപകമായി മഴ പെയ്യുന്നില്ലെങ്കിലും കിഴക്കന് മേഖലയില് കനത്തമഴയാണ്. കണ്ണൂര് ആറളം വനത്തില് ഉരുള്പൊട്ടി. ആറളം ഫാം കീഴ്പ്പ്ള്ളി റുട്ടില് ഗതാഗതം തടസ്സപ്പെട്ടു. കൊട്ടിയൂര്, കേളകം, കണിച്ചാര്, തില്ലങ്കേരി, മുഴക്കുന്ന്, കോലയാട്, ചിറ്റാരിപ്പറമ്പ് എന്നീ മേഖലകളില് സ്കൂളുകള്ക്ക് അവധി പ്രഖ്യാപിച്ചു. വളയം ചാലില് ചീങ്കണ്ണിപ്പുഴയ്ക്ക് കുറുകെയുള്ള തൂക്കുപാലം ഒഴുകിപ്പോയി. കോഴിക്കോട് കക്കയം തലയാട് മണ്ണിടിഞ്ഞ് റോഡ് തകര്ന്നു.
കോഴിക്കോട് താമരശ്ശേരില് ഈങ്ങാപ്പൂഴയില് വെള്ളം കയറി ദേശീയപാതയില് ഗതാഗതം സ്തംഭിച്ചു. കക്കയം - തലയാട് റോഡില് 26 ാം മൈല് ഭാഗത്ത് മലയിടിഞ്ഞു ഗതാഗതം മുടങ്ങി. പാലപ്പുഴ പാലത്തിന് മുകളിലൂടെ വെള്ളം കുത്തിയൊഴുകാന് തുടങ്ങിയതോടെ ഗതാഗതം മുടങ്ങി. മലയോര ഹൈവേയില് കണ്ണൂര് കൊട്ടിയൂര് ടൗണില് റോഡില് വെള്ളംകയറി. മറ്റന്നാള് വരെ മഴ ശക്തമായി തന്നെ തുടരുമെന്നും വടക്കന് ജില്ലകളില് വരുന്ന 48 മണിക്കൂറുകളില് കാലവര്ഷം കൂടുതല് സജീവമാകുമെന്നും മുന്നറിയിപ്പുണ്ട്. വരുന്ന മൂന്ന് മണിക്കൂറില് മദ്ധ്യകേരളത്തിലും തെക്കന് കേരളത്തിലും ശക്തമായ മഴയുണ്ടാകുമെന്നാണ് മുന്നറിയിപ്പ്.
ഇടുക്കി ഡാമിന്റെ വൃഷ്ടിപ്രദേശത്ത് ശക്തമായ മഴയായതിനാല് ഡാമിലേക്കുള്ള നീരൊഴുക്ക് തുടരുകയാണ്. വനത്തിനുള്ളില് കനത്ത മഴ തുടരുകയാണ്. ഇടുക്കി അണക്കെട്ടിലെ ജലനിരപ്പ് 2395.40 അടിയിലെത്തി. ഇന്നു രാവിലെ 11 മണിക്കുള്ള റീഡിങ് അനുസരിച്ചാണിത്. .2395 അടി പിന്നിട്ടതോടെ വൈദ്യുതി ബോര്ഡ് രണ്ടാമത്തെ ജാഗ്രതാ നിര്ദേശം (ഓറഞ്ച് അലര്ട്ട്) പുറപ്പെടുവിച്ചു. 2399 അടിയാകുമ്പോള് അതീവ ജാഗ്രതാ നിര്ദേശം (റെഡ് അലര്ട്ട്) പുറപ്പെടുവിക്കും. അതിനുശേഷം 24 മണിക്കൂര് കൂടി കഴിഞ്ഞേ ചെറുതോണിയില് ഷട്ടറുകള് ഉയര്ത്തൂ.
