ഹൈദരാബാദ്: ഇന്ത്യയില് തരംഗമുണ്ടാക്കിയ ബാഹുബലി ചലച്ചിത്ര പരമ്പര അവസാനിക്കുന്നില്ല. ബാഹുബലിയുടെ മൂന്നാം ഭാഗവും അണിയറയില് ഒരുങ്ങുന്നു. എന്നാല്, സിനിമയ്ക്ക് പകരം നെറ്റ്ഫ്ലിക്സില് ബിഗ് ബജറ്റ് പരമ്പരയുടെ രൂപത്തിലാകും എത്തുക.
ആദ്യ രണ്ട് ഭാഗങ്ങളുടെ തുടര്ച്ചയല്ല പരമ്പര വരുന്നത്. അമരേന്ദ്ര ബാഹുബലിയുടെ പൂര്വീകരുടെ കഥപറയുന്നതാകും ഇത്. മലയാളി എഴുത്തുകാരന് ആനന്ദ് നീലകണ്ഠന്റെ ദ റൈസ് ഓഫ് ശിവകാമി എന്ന പുസ്തകത്തെ ആസ്പദമാക്കിയാണ് പരമ്പര ഒരുങ്ങുന്നത്. ബാഹുബലി; ബിഫോര് ദ ബിഗിനിങ്ങ് എന്ന് പേരിട്ടിരിക്കുന്ന പരമ്പര സംവിധാനം ചെയ്യുന്നതും എസ്. എസ്. രാജമൗലി തന്നെയാണ്.
മൂന്ന് സീസണായി പുറത്തിറക്കുന്ന ചിത്രത്തിന് 500 കോടിയാണ് ബജറ്റ് ഇട്ടിരിക്കുന്നത്. ആദ്യചിത്രങ്ങളില് ശ്രദ്ധേയമായ കഥാപാത്രങ്ങളായ ശിവകാമിയുടേയും കട്ടപ്പയുടേയും കഥയാണ് പരമ്പരയില് പറയുന്നത്.
ആദ്യ ചിത്രങ്ങള് പോലെ കേരളത്തിലും ബാഹുബലിയുടെ ചിത്രീകരണം നടക്കും. 152 രാജ്യങ്ങളിലായാണ് റിലീസിങ്ങ് നടക്കുക. റൈസ് ഓഫ് ശിവകാമിയെ ആസ്പദമാക്കി ആദ്യ സീസണും അദ്ദേഹത്തിന്റെ തന്നെ മറ്റും രണ്ട് കഥകള് കൂട്ടി രണ്ട് സീസണുമായാണ് പുറത്തിറക്കാനാണ് ഉദ്ദേശിക്കുന്നത്. ഒരു മണിക്കൂര് വീതമുള്ള എട്ട് ഭാഗങ്ങളാണ് ഒരു സീസണ്. ഇത്തരത്തില് മൂന്ന് സീസണുകളാണ് പുറത്തിറങ്ങുന്നത്.
