തിരുവനന്തപുരം: മുഖ്യമന്ത്രിയുടെ ദുരിതാശ്വാസ നിധിയിലേക്ക് ഒരു കോടി രൂപ നല്കിയത് തമിഴ് നടന് രാഘവ ലോറന്സാണ്, പ്രഭാസ് നല്കിയത് 25 ലക്ഷം. കടകംമ്പള്ളി കഴിഞ്ഞ ദിവസം പ്രസംഗത്തില് നടത്തിയ പരാമര്ശം രാഘവ ലോറന്സിനെകുറിച്ചായിരുന്നു. പ്രളയം ബാധിച്ചു എന്നു അറിഞ്ഞപ്പോള് ആദ്യം സഹായവുമായി ഓടിയെത്തിയത് അദ്ദേഹം ആയിരുന്നു. മുഖ്യമന്ത്രിയുടെ ദുരിതാശ്വാസ നിധിയിലേക്ക് പ്രഭാസ് 25 ലക്ഷം രൂപ നല്കാന് തീരുമാനിച്ചതിന് അദ്ദേഹത്തിന് ബുദ്ധിമുട്ടുണ്ടാകാതിരിക്കാനാണ് ഇതില് വ്യക്തത വരുത്തുന്നതെന്ന് കടകമ്പള്ളി സുരേന്ദ്രന് പറഞ്ഞു.
കടകംമ്പള്ളി സുരേന്ദ്രന്റെ ഫേസ്ബുക്ക് പോസ്റ്റ് ഇങ്ങനെ-
മുഖ്യമന്ത്രിയുടെ ദുരിതാശ്വാസ നിധിയില് ഒരു കോടി രൂപ നല്കിയത് തമിഴ് നടന് രാഘവ ലോറന്സാണ്. കഴിഞ്ഞ ദിവസം പ്രസംഗത്തില് ഞാന് നടത്തിയ പരാമര്ശം രാഘവ ലോറന്സിനെ കുറിച്ചായിരുന്നു. ആരെയും ചെറുത്താക്കി കാണിക്കാനായിരുന്നില്ല ഈ പരാമര്ശം. രാഘവ ലോറന്സ് എന്ന നടന് കോരളത്തെ ബാധിച്ച പ്രളയ ദുരന്തത്തില് ആശ്വാസമായി ഓടിയെത്തിയതിനെ കുറിച്ചാണ് പറഞ്ഞത്. മുഖ്യമന്ത്രിയുടെ ദുരിതാശ്വാസ നിധിയിലേക്ക് 25 ലക്ഷം രൂപ നല്കാന് തീരുമാനിച്ച പ്രഭാസിന് ബുദ്ധിമുട്ട് ഉണ്ടാകാതിരിക്കാനാണ് ഇതില് വ്യക്തത വരുത്തുന്നത്. തമിഴ് നാട്ടിലെ കോണ്ഗ്രസ് യൂണിയന്റെ നേതൃത്വത്തില് ടി.വി.എസ് കമ്പനിയിലെ ബ്രേക്ക് ഇന്ത്യാ ലിമിറ്റഡിലെ തൊഴിലാളികള് ഒരു കോടി എണ്പത് ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്കിയതും അതേ വേദിയില് ഞാന് പറഞ്ഞിരുന്നു. ഇത് ഇവിടത്തെ തൊഴിലാളി സംഘടനകളും മാതൃകയാക്കണമെന്ന് പറഞ്ഞതിന് പിന്നാലെയായിരുന്നു ഒരു കോടി രൂപ നല്കിയ അന്യഭാഷാ നടനെ കുറിച്ച് സംസാരിച്ചത്. ആരെന്നതല്ല ആ സന്മനസിനെ അഭിനന്ദിക്കുക എന്നത് മാത്രമായിരുന്നു ആ പരാര്ശത്തില് ഉദ്ദേശിച്ചത്. അതില് വിവാദത്തിന് താത്പര്യമില്ല. കേരളത്തിന്റെ അതിജീവനത്തിനായി കൈകോര്ക്കുന്നവരുടെയെല്ലാം മനസിന് നന്ദി പറയുന്നു.
