കല്പ്പറ്റ: മുഖ്യമന്ത്രിയുടെ ദുരിതാശ്വാസ നിധിയിലേക്കായി സ്വകാര്യ ബസ്തൊഴിലാളികള് പണം പിരിച്ചിരുന്നു. പിരിച്ച തുക സംസ്ഥാന കമ്മറ്റി വഴി സര്ക്കാരിന് നല്കാനുള്ള സ്വകാര്യ ബസ് ഉടമകളുടെ നീക്കത്തില് പ്രതിഷേധിച്ചാണ് മാനന്തവാടി താലൂക്കില് സ്വകാര്യ ബസ് തൊഴിലാളികള് പണിമുടക്കുന്നത്. ദുരിതാശ്വാസ നിധിയിലേക്കായി ടിക്കറ്റില്ലാതെയാണ് ബസുകളില് ബക്കറ്റ് പിരിവ് നടത്തിയത്.
ഇതുവഴി വന് തുക ജില്ലയില് സമാഹരിച്ചിട്ടുണ്ട്. മാന്തവാടി താലൂക്കില് മാത്രം 5,58,000 രൂപ ഇത്തരത്തില് പിരിച്ചെടുത്തതായി ബസ് തൊഴിലാളികള് പറഞ്ഞു. എന്നാല് പിരിച്ച പണത്തില് നിന്ന് വന് തുക ബസുടമകള് ചിലവഴിക്കുകയായിരുന്നു. പിരിച്ച തുകയില് നിന്നും ബസിന് ഡീസല് അടിച്ചതായും തൊഴിലാളികള് ആരോപിച്ചു. 8000 രൂപ പിരിച്ചെടുത്ത ബസുകള് പോലും 5000 രൂപയ്ക്ക് ഡീസല് അടിച്ചതായി ഇവര് പറഞ്ഞു.
പണം സ്വരൂപിക്കുന്ന ദിവസം ആരും കൂലി വാങ്ങിയതുമില്ല. യുണിയന്റെ ആവശ്യ പ്രകാരം ഈ തുക തൊഴിലാളി വിഹിതമായി കാണിച്ച് ദുരിതാശ്വാസ നിധിയിലേക്ക് നല്കണമെന്നായിരുന്നു ആവശ്യം എന്നാല് ഈ തുക ബസ് തൊഴിലാളിമാരുടെ വിഹിതമാക്കിയാണ് കാണിച്ചത്. എണ്ണായിരം രൂപ വരെ ഡീസല് അടിക്കുവാനായി ദുരിതാശ്വാസ നിധിയില് നിന്നും പണം എടുത്ത ബസുടമകളും ഉണ്ടെന്ന് തൊഴിലാളികള് വ്യക്തമാക്കി.
പിരിച്ചെടുത്ത മുഴുവന് പണവും ദുരിതാശ്വാസ നിധിയിലേക്ക് എത്തില്ലെന്ന ആശങ്കയും തൊഴിലാളികള്ക്കിടയിലുണ്ട്. പ്രശ്നം പരിഹരിച്ചിലെങ്കില് സമരം തുടരാനാണ് തൊഴിലാളി യൂണിയനുകളുടെ തീരുമാനം. മാനന്തവാടി സി.ഐയുടെ അധ്യക്ഷതയില് ഇന്ന് വൈകിട്ട് ആറ് മണിക്ക് സമരക്കാരുമായി ചര്ച്ച നടത്തും.
