ന്യൂയോര്ക്ക്: ശ്രീലങ്കന് തമിഴ് ഭീകരസംഘടനയായ എല്ടിടിഇ ചെന്നൈയില് നിന്നും കൊളംബോയിലെക്ക് വിമാനം ഉപയോഗിച്ച് ആക്രമണം നടത്താന് പദ്ധതിയിട്ടിരുന്നതായി ശ്രീലങ്കന് പ്രസിഡന്റ് മൈത്രിബാല സിരിസേന. 2009ലാണ് ഇത്തരത്തില് ആക്രമണം നടത്താന് പദ്ധതിയിട്ടിരുന്നത്. വ്യാഴാഴ്ച്ച ന്യൂയോര്ക്കിലെ യുഎന് ജനറല് അസംബ്ലിയില് വച്ച് ശ്രീലങ്കന് സമൂഹത്തെ അഭിസംബാധന ചെയ്തു സംസാരിക്കുമ്പോഴാണ് ഇക്കാര്യം തുറന്നുപറഞ്ഞത്.
ഈ സമയത്ത് ശ്രീലങ്കയുടെ ആക്ടിങ്ങ് പ്രതിരോധമന്ത്രിയായിരുന്നു ശിരിസേന. തമിഴ്പുലികള് ചെന്നൈയില് നിന്നോ മറ്റേതെങ്കിലും വനപ്രദേശങ്ങളില് നിന്നോ വിമാനം പറത്തി ബോംബാക്രമണം നടത്തി കൊളംബോയെ തകര്ക്കാനായിരുന്നു പദ്ധതി. സിരിസേന വ്യക്തമാക്കി.
എല്ലാവരും ഒരു വ്യോമാക്രമണം നടത്തുമോ എന്ന് ഭയന്നിരുന്നതായും പ്രസിഡന്റ് പറഞ്ഞു. അന്നത്തെ പ്രസിഡന്റും പ്രധാനമന്ത്രിയും അടക്കം വിദേശരാജ്യങ്ങളില് അഭയംതേടിയിരുന്നു. താന് പോലും കൊളംബോയില് നിന്നും മാറി താമസിച്ചു. 2007ലും 09തിലും തമിഴ്പുലികള് കൊളംബോയില് വ്യോമാക്രമണം നടത്തിയിരുന്നു.
