ന്യൂഡല്ഹി: ആധാര് കാര്ഡിന്റെ നിയമസാധുത സംബന്ധിച്ച സുപ്രീം കോടതിയുടെ നിര്ണായക വിധിക്ക് പിന്നാലെ മൊബൈല് നമ്പറും ആധാര് കാര്ഡും തമ്മില് ഡീലിങ്ക് ചെയ്യാനുള്ള നടപടികളുമായി യു.ഐ.ഡി.എ.ഐ. ആധാര് കാര്ഡും മൊബൈല് നമ്പറും ഡീലിങ്ക് ചെയ്യാനുള്ള നടപടികള് സംബന്ധിച്ച ശിപാര്ശകള് 15 ദിവസത്തിനകം സമര്പ്പിക്കണമെന്ന് യുണീക് ഐഡന്റിഫിക്കേഷന് അതോറിറ്റി മൊബൈല് കമ്പനികളോട് നിര്ദ്ദേശിച്ചു. മൊബൈല് സേവനദാതാക്കള്ക്ക് ഇത് സംബന്ധിച്ച സര്ക്കുലര് യു.ഐ.ഡി.എ.ഐ അയച്ചു.
സുപ്രീം കോടതിയുടെ സെപ്റ്റംബര് 26ലെ വിധി നടപ്പാക്കാന് ആവശ്യമായ നിര്ദ്ദേശങ്ങള് ഒക്ടോബര് 15നുള്ളില് സമര്പ്പിക്കാനാണ് സേവനദാതാക്കള്ക്ക് നിര്ദ്ദേശം നല്കിയിരിക്കുന്നത്. ആധാര് കാര്ഡിനെ സംബന്ധിച്ച സെക്ഷന് 57 സുപ്രീം കോടതി റദ്ദാക്കിയിരുന്നു. വിധിയുടെ പശ്ചാത്തലത്തില് സ്വകാര്യ കമ്പനികള്ക്ക് ഉപഭോക്താക്കളുടെ കെ.വൈ.സിയുടെ ഭാഗമായി ആധാര് നമ്പര് ആവശ്യപ്പെടാനാകില്ല. ഇതോടെ ഉപഭോക്താക്കളെ തിരിച്ചറിയുന്നതിന് സേവനദാതാക്കള്ക്ക് മറ്റ് മാര്ഗങ്ങള് തേടേണ്ടി വരും.
