രണ്ടര പതിറ്റാണ്ട് മലയാള സിനിമയില് നിറസാന്നിധ്യമായിരുന്നു ഇന്ന് അന്തരിച്ച സംവിധായകന് തമ്പി കണ്ണന്താനം. സ്വതന്ത്ര സംവിധായകന് എന്ന നിലയില് 1983 മുതല് 2004 വരെ നീണ്ടു നിന്ന കരിയറില് പതിനാറ് ചിത്രങ്ങള് അദ്ദേഹം സംവിധാനം ചെയ്തു. ഏറെയും മലയാളികള് എക്കാലവും ഓര്ത്തിരിക്കുന്ന ഹിറ്റ് ചിത്രങ്ങള്. രാജാവിന്റെ മകന്, ഭൂമിയിലെ രാജാക്കന്മാര്, നാടോടി, ഇന്ദ്രജാലം, മാന്ത്രികം തുടങ്ങിയവയാണ് പ്രധാന ചിത്രങ്ങള്. ഹദ്: ലൈഫ് ഓണ് ദ എഡ്ജ് ഓഫ് ഡെത്ത് എന്ന ഹിന്ദി ചിത്രവും സംവിധാനം ചെയ്തു.
മോഹന്ലാലിനെ സൂപ്പര്താര പദവയിലേക്ക് ഉയര്ത്തുകയും സുരേഷ് ഗോപി സിദ്ദിഖ് തുടങ്ങിയ നടന്മാരെ കൈപിടിച്ച് ഉയര്ത്തുകയും ചെയ്ത സംവിധായകനാണ് തമ്പി കണ്ണന്താനം. 1986ല് പുറത്തിറങ്ങിയ രാജാവിന്റെ മകനാണ് മോഹന്ലാലിനെ സൂപ്പര്താര പദവിയിലേക്ക് ഉയര്ത്തുന്നത്. മേക്കിംഗ് ശൈലിയില് അക്കാലത്തെ മലയാള ചിത്രങ്ങളില് നിന്ന് വേറിട്ട് നിന്ന ചിത്രമാണ് രാജാവിന്റെ മകന്. മോഹന്ലാലിന്റെ കരിയറിലെ തന്നെ ഏറ്റവും പ്രധാന ചിത്രമായി മാറിയ രാജാവിന്റെ മകന് ഇന്നും പ്രേക്ഷകരുടെ ഇഷ്ടചിത്രമാണ്.
പ്രശസ്ത ഇംഗ്ലീഷ് എഴുത്തുകാരന് സിഡ്നി ഷെല്ഡന്റെ റേജ് ഓഫ് ഏഞ്ചല്സ് എന്ന നോവലില് നിന്ന് കടം കൊണ്ട കഥ പക്ഷേ കേരളത്തിലെ രാഷ്ട്രീയ പശ്ചാത്തലത്തിന് ഏറെ ഇണങ്ങുന്നവിധം തമ്പി കണ്ണന്താനം ചിത്രീകരിച്ചു. എണ്പതുകളുടെ രണ്ടാം പകുതിയിലെ ഏറ്റവും വലിയ ഹിറ്റായിരുന്ന രാജാവിന്റെ മകന് എല്ലാ തെന്നിന്ത്യന് ഭാഷകളിലേക്കും ഹിന്ദിയിലേക്കും റീമേയ്ക്ക് ചെയ്യപ്പെട്ടു.
കേരള രാഷ്ട്രീയത്തെ ആക്ഷേപഹാസ്യ ശൈലിയില് വിമര്ശിച്ച ചിത്രമാണ് ഭൂമിയിലെ രാജാക്കന്മാര്. ഭൂമിയിലെ രാജാക്കന്മാരും മോഹന്ലാലിന്റെ കരിയറിലെ ഏറ്റവും പ്രധാന ചിത്രമാണ്. തമ്പി കണ്ണന്താനത്തിന്റെ മറ്റൊരു പ്രധാന ചിത്രമാണ് ഇന്ദ്രജാലം. മലയാളി പ്രേക്ഷകരെ ഇന്നും ത്രസിപ്പിക്കുന്ന ത്രില്ലറാണ് ഇന്ദ്രജാലം. കാര്ലോസ് എന്ന വില്ലന് കഥാപാത്രത്തിലൂടെ മലയാള സിനിമയ്ക്ക് രാജന് പി. ദേവ് എന്ന നടനെ സമ്മാനിച്ചത് ഇന്ദ്രജാലം എന്ന ചിത്രമാണ്.
മോഹന്ലാലിന്റെ കരിയറിലെ തന്നെ മറ്റ് പ്രധാനപ്പെട്ട ചിത്രങ്ങളായ നാടോടി, മാന്ത്രികം, മോഹന്ലാലിന്റെ മകന് പ്രണവ് മോഹന്ലാലിന്റെ അരങ്ങേറ്റ ചിത്രമായ ഒന്നാമന് എന്നിവയും തമ്പി കണ്ണന്താനം സംവിധാനം ചെയ്ത ചിത്രങ്ങളാണ്. മാന്ത്രികം, വഴിയോരക്കാഴ്ചകള്, തച്ചിലേടത്ത് ചുണ്ടന് ഉള്പ്പെടെ ഏഴ് ചിത്രങ്ങള് നിര്മ്മിച്ചു. രാജാവിന്റെ മകന് എന്ന ചിത്രത്തില് സഹനിര്മ്മാതാവായി. 1980ല് പുറത്തിറങ്ങിയ ഇതാ ഒരു തീരം മുതല് 2000ല് പുറത്തിറങ്ങിയ ഒരു ചെറു പുഞ്ചിരി വരെ പത്ത് സിനിമകളില് അഭിനയിച്ചു.
കാഞ്ഞിരപ്പള്ളി സ്വദേശിയായ തമ്പി കണ്ണന്താനം സംവിധായകന് ജോഷിയുടെ സഹായിയായാണ് സിനിമയില് എത്തിയത്. 1983ല് പുറത്തിറങ്ങിയ താവളം എന്ന സിനിമയിലൂടെ സ്വതന്ത്ര സംവിധായകനായി. 2004ല് പുറത്തിറങ്ങിയ ഫ്രീഡം ആണ് അവസാന ചിത്രം.
