കൊച്ചി: മലയാള സിനിമയിലെ ഹിറ്റ്മേക്കര് സംവിധായകന് തമ്പി കണ്ണന്താനത്തിന്റെ ഭൗതീകശരീരം ഇന്ന് ഉച്ചയ്ക്ക് എറണാകുളം മുന്സിപ്പല് ടൗണ്ഹാളില് പൊതുദര്ശനത്തിനു വയ്ക്കും. പിന്നീട് കാഞ്ഞിരപ്പള്ളിയിലെ വീട്ടിലേക്കു കൊണ്ടുപോകും. അവിടെ നാളെയാണു സംസ്കാരച്ചടങ്ങുകള്. ഇന്ന് ഉച്ചയ്ക്കു രണ്ടരയ്ക്കാണ് ടൗണ്ഹാളില് എത്തിക്കുക.
മോഹന്ലാലിനെ സൂപ്പര്സ്റ്റാര് ആക്കിയ ജനപ്രിയ ആക്ഷന് സിനിമകളുടെ സംവിധായകന് എന്ന നിലയിലാണ് തമ്പി കണ്ണന്താനം ഓര്മിക്കപ്പെടുന്നത്. ഹിറ്റുകളേറെയും മോഹന്ലാലിനൊപ്പമായിരുന്നു. രാജാവിന്റെ മകന്, ഭൂമിയിലെ രാജാക്കന്മാര്, വഴിയോരകാഴ്ച്ചകള്, ഇന്ദ്രജാലം, നാടോടി, മാന്ത്രികം എന്നീ വലിയഹിറ്റുകള് മോഹന്ലാല്-തമ്പി കണ്ണന്താനം കൂട്ടുകെട്ടിലാണ് പിറന്നത്. രാജാവിന്റെ മകനിലെ വിന്സെന്റ് ഗോമസും ഇന്ദ്രജാലത്തിലെ കണ്ണന്നായരും മോഹന്ലാലിന് ഏറെ മൈലേജ് നല്കിയ കഥാപാത്രങ്ങളായിരുന്നു.
മാന്ത്രികത്തിലെ ഇന്റലിജന്റ്സ് ഓഫീറും വന്വിജയമായിരുന്നു. എണ്പത്, തൊണ്ണൂറു കാലഘട്ടങ്ങളില് വാണിജ്യസിനിമയില് നിറഞ്ഞുനിന്ന കണ്ണന്താനം 2004നുശേഷം സിനിമകളൊന്നും ചെയ്തിരുന്നില്ല. രാജാവിന്റെ മകന്റെ രണ്ടാം ഭാഗവുമായി തിരിച്ചുവരാനുള്ള ശ്രമത്തിനിടയിലായിരുന്നു മരണം കൊണ്ടുപോയത്.
1983 ല് മോഹന്ലാലിനെ നായകനാക്കി താവളം എന്ന സിനിമയുമായിട്ടാണ് സംവിധാന രംഗത്തേക്ക് എത്തിയത്. മോഹന്ലാലുമായി ചേര്ന്നുള്ള മിക്ക സിനിമകളും വന് വിജയമായിരുന്നു. പിന്നീട് സുരേഷ്ഗോപിയെ നായകനാക്കി ചുക്കാന്, മാസ്മരം എന്നീ സിനിമകള് ഒരുക്കിയ അദ്ദേഹം അന്തരിച്ച പ്രമുഖ നടന് ജിഷ്ണുവിനെ നായകനാക്കി ചെയ്ത ഫ്രീഡം എന്ന സിനിമയും ചെയ്തിരുന്നു. പിന്നീട് പ്രേം നസീറിനെ നായകനാക്കി പാസ്പോര്ട്ട്. സോമന് നായകനായ കാത്തിരുന്ന ദിവസം എന്നീ സിനിമകളും ചെയ്തു. ആ നേരം അല്പ്പദൂരം എന്ന സിനിമയില് മമ്മൂട്ടിയായിരുന്നു നായകന്.
പ്രമുഖ സംവിധായകന് ശശികുമാറിനൊപ്പം സഹസംവിധായകനായി സിനിമാരംഗത്ത് എത്തിയ തമ്പി കണ്ണന്താനം 1983ല് താവളം എന്ന സിനിമയിലൂടെ സ്വതന്ത്ര സംവിധായകനായി. തുടര്ന്ന് 16 ചിത്രങ്ങള് സംവിധാനം ചെയ്തു. ഇതില് നാലു ചിത്രങ്ങള്ക്ക് തിരക്കഥയൊരുക്കി. 14 ചിത്രങ്ങള് നിര്മിക്കുകയും 12 എണ്ണത്തില് അഭിനയിക്കുകയും ചെയ്തു.
കരള്, വൃക്ക രോഗങ്ങളേത്തുടര്ന്ന് ചികിത്സയിലായിരുന്ന അദ്ദേഹത്തിന്റെ അന്ത്യം ഇന്നലെ കൊച്ചിയിലെ സ്വകാര്യ ആശുപത്രിയിലായിരുന്നു. കാഞ്ഞിരപ്പള്ളി ഇടക്കുന്നം സ്വദേശിയായ തമ്പി കണ്ണന്താനം ദീര്ഘകാലമായി കൊച്ചിയിലായിരുന്നു താമസം. ഭാര്യ കുഞ്ഞുമോള്, മക്കള്: ഐശ്വര്യ, എയ്ഞ്ചല്. മരണവാര്ത്തയറിഞ്ഞ് സിബിമലയില്, കമല് തുടങ്ങി ചലച്ചിത്രരംഗത്തെ പ്രമുഖര് ആശുപത്രിയിലെത്തി അന്ത്യാഞ്ജലി അര്പ്പിച്ചു.
