കാസര്കോട് : മാനസികാസ്വാസ്ഥ്യമുള്ള ഗൃഹനാഥനെ ഭാര്യ കഴുത്തു ഞെരിച്ചു കൊന്നു. മൊഗ്രാല് പുത്തൂര് ബെള്ളൂര് തൗഫീഖ് മന്സിലിലെ മുഹമ്മദ് കുഞ്ഞിയെയാണ് ഭാര്യ സക്കീന (36)യും സുഹൃത്ത് ബോവിക്കാനം മുളിയാര് സ്വദേശി ഉമ്മറും (41) ചേര്ന്ന് കൊലപ്പെടുത്തിയത്. ആറു വര്ഷങ്ങള്ക്കിപ്പുറമാണ് ഭര്ത്താവിനെ കൊന്നത് ഭാര്യ തന്നെയാണെന്ന് തെളിഞ്ഞത്.
അതേസമയം, കൊലയ്ക്കു ശേഷം മകന്റെ സഹായത്തോടെ ചന്ദ്രഗിരിപ്പുഴയില് ഒഴുക്കിയ മൃതദേഹം കണ്ടെടുക്കാനായിട്ടില്ല. മുഹമ്മദ് കുഞ്ഞിയെ കാണാനില്ലെന്ന് 2012 ഓഗസ്റ്റില് ബന്ധു നല്കിയ പരാതിയെ തുടര്ന്നുള്ള അന്വേഷണമാണ് കൊലപാതകത്തിന്റെ ചുരുളഴിച്ചത്.
മുഹമ്മദ് കുഞ്ഞിയുടെ സ്വത്ത് കൈക്കലാക്കാനും ഉമ്മറിനും സക്കീറയ്ക്കും വഴിവിട്ട ബന്ധം തുടരാനും വേണ്ടിയായിരുന്നു അരുംകൊല. ഉറങ്ങിക്കിടന്ന ഭര്ത്താവിന്റെ കഴുത്തില് ഷാള് മുറുക്കിയ ശേഷം ജനാലയില് കെട്ടിത്തൂക്കുകയായിരുന്നു. ഒരു ദിവസം വീട്ടില് സൂക്ഷിച്ച മൃതദേഹം പിറ്റേന്ന് വൈകിട്ട് മകന്റെ സഹായത്തോടെ പുഴയില് ഒഴുക്കി. അന്ന് മകന് 10 വയസ്സായിരുന്നു പ്രായം.
ഇതിനിടെ, 2012 ഓഗസ്റ്റില് ബന്ധു നല്കിയ പരാതിയില് അന്വേഷണം തുടങ്ങി. കൊലയ്ക്കു ശേഷം നിരവധി വീടുകളില് മാറി മാറി വാടകയ്ക്ക് താമസിച്ചു. നുണകള് പറഞ്ഞ് ഭര്ത്താവിനെ കുറിച്ചുള്ള ബന്ധുക്കളുടെ ചോദ്യങ്ങളില് നിന്നും ഒഴിവായി.
ഇവര്ക്കെതിരെ, കൊലപാതകം, പ്രേരണാക്കുറ്റം, തെളിവ് നശിപ്പിക്കല് എന്നീ വകുപ്പുകള് ചുമത്തിയാണ് പ്രതികളെ അറസ്റ്റു ചെയ്തിരിക്കുന്നത്.
