തിരുവനന്തപുരം: ആരോഗ്യവകുപ്പ് ഡയറക്ടർ (ഡി.എച്ച്.എസ്) ഡോ. കെ. റീനയെ സ്ഥലംമാറ്റിയ ഉത്തരവിൽ സംസ്ഥാന സർക്കാർ തിരുത്തൽ വരുത്തി. കെ. ജെ. റീന 15 ദിവസം അവധി എടുത്തുവെന്ന പരാമർശം ഒഴിവാക്കിയാണ് ആരോഗ്യവകുപ്പ് പുതിയ ഉത്തരവ് പുറത്തിറക്കിയത്. പുതിയ ഡി.എച്ച്.എസിന്റെ നിയമന നടപടികൾ പുരോഗമിക്കുന്നതിനാലാണ് സ്ഥലംമാറ്റമെന്നാണ് പുതിയ ഉത്തരവിൽ വ്യക്തമാക്കുന്നത്.
15 ദിവസം അവധിക്ക് അപേക്ഷിച്ചതിനാലാണ് സ്ഥലംമാറ്റമെന്നായിരുന്നു ആദ്യ ഉത്തരവിലെ പരാമർശം. ഇതിനെതിരെ ഡോ. റീനയുൾപ്പെടെ വ്യാപക വിമർശനം ഉയർന്നിരുന്നു. താൻ 15 ദിവസത്തേക്ക് അവധി അപേക്ഷിച്ചിട്ടില്ലെന്നും ശാരീരിക അസ്വസ്ഥതയെ തുടർന്ന് രണ്ടര ദിവസത്തെ അവധിക്കാണ് അപേക്ഷ നൽകിയതെന്നും ഡോ. റീന വ്യക്തമാക്കിയിരുന്നു. വർഷങ്ങളായുള്ള സർവീസിന് ശേഷം വിരമിക്കുന്ന ഒരാളിനെതിരെ തെറ്റായ ചിത്രം സൃഷ്ടിക്കരുതെന്നും അവർ ആവശ്യപ്പെട്ടിരുന്നു.
