2.9 കോടി ഉപയോക്താക്കളുടെ അക്കൗണ്ടുകള് ഫേസ്ബുക്കില് നേരത്തെ ഹാക്ക് ചെയ്യപ്പെട്ടിരുന്നു ഇതിനു പിന്നാലെ ഫേസ്ബുക്കില് നിന്നും വീണ്ടും വിവര ചോര്ച്ച. 12 കോടി ഉപയോക്താക്കളുടെ വിവരങ്ങളാണ് ചോര്ന്നിരിക്കുന്നത് എന്നാണ് പുതിയ വിവരങ്ങള്. ഇതില് 81,000 ആളുകളുടെ വിവരങ്ങള് ഓണ്ലൈനില് വില്പനയ്ക്കും എത്തിയിട്ടുണ്ട്. ഈ വിവരം ബിബിസി രഷ്യന് സര്വീസാണ് റിപ്പോര്ട്ട് ചെയ്തിരിക്കുന്നത്. ഇംഗ്ലീഷ് ഭാഷയിലുള്ള ഒരു ഇന്റര്നെറ്റ് ഫോറത്തില് എഫ്ബി സേയ്ലര് എന്നയാള് നല്കിയി പരസ്യത്തിലൂടെയാണ് വിവര ചോര്ച്ച സംബന്ധിച്ച വിവരം പുറത്തുവന്നത്.
എന്നാല് തങ്ങളുടെ ഭാഗത്ത് നിന്നും സുരക്ഷാ വീഴ്ചയുണ്ടായിട്ടില്ലെന്നും വെബ് ബ്രൗസറുകളിലെ എക്സ്റ്റന്ഷന് സോഫ്റ്റ് വെയറുകളാണ് വിവരങ്ങള് ഹാക്കര്മാരിലെത്തിച്ചതെന്നുമാണ് ഇതു സംബന്ധിച്ച ഫേസ്ബുക്കിന്റെ പ്രതികരണം. കൂടുതല് അക്കൗണ്ടുകളെ ഇത് ബാധിക്കുന്നത് തടയാനുള്ള നടപടികള് സ്വീകരിച്ചതായും എകസ്റ്റന്ഷനുകളിലെ സുരക്ഷാ വീഴ്ച പരിശോധിക്കാന് ബ്രൗസര് നിര്മാതാക്കളോട് ആവശ്യപ്പെട്ടിട്ടുണ്ടെന്നും ഫേസ്ബുക്ക് അറിയിച്ചു.
യുക്രൈയ്ന്, റഷ്യ എന്നിവിടങ്ങളില് നിന്നുള്ള അക്കൗണ്ടുകളില് നിന്നുള്ള വിവരങ്ങളാണ് കൂടുതലും ചോര്ന്നത്. യുകെ, യുഎസ്, ബ്രസീല് എന്നിവിടങ്ങളില് നിന്നുള്ള ചില അക്കൗണ്ടുകളെയും ഇത് ബാധിച്ചിട്ടുണ്ട്. ഓണ്ലൈന് വഴി വില്പനയ്ക്ക് വെച്ച 81,000 പേരുടെ വിവരങ്ങളില് സ്വകാര്യ സന്ദേശങ്ങളും ഉള്പ്പെടുന്നതായും ബിബിസി റിപ്പോര്ട്ടില് പറയുന്നുണ്ട്. എന്നാല് ഇതിലേറെയാളുകളുടെ വിവരങ്ങള് സമാനമായ രീതിയില് വില്പനയ്ക്കുണ്ടെന്നാണ് റിപ്പോര്ട്ടുകള് വരുന്നത്.
തുടര്ച്ചയായുണ്ടാവുന്ന വിവര ചോര്ച്ച വിവാദങ്ങള് ഫേസ്ബുക്കിനെ വലയ്ക്കുകയാണ്. ഇതു സംബന്ധിച്ച് വിവിധ രാജ്യങ്ങളില് ഫേസ്ബുക്കിനോട് വിശദീകരണം ചോദിച്ചിട്ടുണ്ട്.
