ലക്നൗ: അലഹബാദ്, ഫൈസാബാദ് എന്നിവ യഥാക്രമം പ്രയാഗ്രാജും അയോദ്ധ്യയും ആകാനിരിക്കെ യോഗി ആദിത്യനാഥ് സര്ക്കാരിന് താജ്മഹല് കൊണ്ട് പ്രസിദ്ധമായ ആഗ്രയുടേയും പേര് മാറ്റാന് സമ്മര്ദ്ദം. ആഗ്രയെ 'അഗ്രവാന്' എന്നോ 'അഗ്രവാള്' എന്നോ മാറ്റണമെന്ന് ആവശ്യപ്പെട്ട് വടക്കന് ആഗ്രയിലെ ബിജെപി എംഎല്എ ജഗന്പ്രസാദ് ഗര് ആണ് രംഗത്ത് വന്നിരിക്കുന്നത്.
ആഗ്ര എന്നത് അര്ത്ഥമില്ലാത്ത പേരാണെന്നും ഇതിന് എന്ത് പ്രസക്തിയാണ് ഉള്ളതെന്നും ചോദിച്ച ജഗന് ഇവിടം മുമ്പ് കാടായിരുന്നെന്നും അഗര്വാള് സമുദായക്കാരാണ് ഇവിടെ ജീവിച്ചിരുന്നതെന്നും അതുകൊണ്ടു തന്നെ അഗ്ര വാന് എന്നോ അഗ്ര വാള് എന്നോ പേരിടണമെന്നും വാര്ത്താസമ്മേളനത്തില് പറഞ്ഞു. അതേസമയം നഗരങ്ങളുടെ പേരുമാറ്റം യുപിയില് വന് വിവാദം സൃഷ്ടിക്കുമ്പോള് ഇതേ ആവശ്യം ഉന്നയിച്ച് കൂടുതല് പേര് രംഗത്ത് വന്നുകൊണ്ടിരിക്കുകയാണ്.
മുസാഫര്നഗറിന്റെ പേര് ലക്ഷ്മിനഗര് എന്നാക്കണമെന്ന് ആവശ്യപ്പെട്ട് സര്ധാനയില് നിന്നുള്ള ബിജെപി എംഎല്എ സംഗീത്സോമും രംഗത്ത് വന്നിട്ടുണ്ട്. പൊതുജനങ്ങളാണ് ഈ ആവശ്യം ഉന്നയിച്ചിരിക്കുന്നതെന്നാണ് സോം പറയുന്നത്. അതിനുമപ്പുറം ഇന്ത്യയില് ഇസ്ളാമിക രാജാക്കന്മാര് ഇല്ലാതാക്കിയ ഹിന്ദുമൂല്യങ്ങളെ തിരിച്ചു കൊണ്ടുവരുവാനുള്ള ശ്രമങ്ങളാണ് ബിജെപി നടത്തുന്നത്. നഗരങ്ങള്ക്ക് അതിന്റെ യഥാര്ത്ഥ നാമങ്ങള് തിരിച്ചു നല്കി ഇന്ത്യന് സംസ്ക്കാരത്തെ തിരിച്ചുപിടിക്കാനും നിലനിര്ത്താനുമാണ് ബിജെപി ശ്രമിക്കുന്നതെന്നും അദ്ദേഹം പറഞ്ഞു.
അതേസമയം യോഗി സര്ക്കാരിന്റെ നീക്കം വലിയ പ്രതികരണമാണ് ഉളവാക്കുന്നത്. ഏതാനും വര്ഷങ്ങളായി ഈ പേരുമാറ്റം നടക്കുന്നുണ്ടെന്നും. യഥാര്ത്ഥത്തില് യാതൊരു ആവശ്യവുമില്ലാത്ത ഇക്കാര്യത്തിലൂടെ ജനങ്ങളുടെ ശ്രദ്ധ വസ്തുതകളില് നിന്നും വഴിതിരിച്ചുവിടാനുള്ള ശ്രമങ്ങളാണ് നടക്കുന്നതെന്നും വിമര്ശകര് പറയുന്നു. ഫൈസാബാദ്, അലഹബാദ് പോലെയുള്ള പേരുകള് തുടച്ചു നീക്കുന്നത് വിദ്വേഷ രാഷ്ട്രീയവും വര്ഗ്ഗീയ ധ്രുവീകരണവുമാണെന്നും സാമൂഹ്യപ്രവര്ത്തകര് പറയുന്നു.
പരാജയങ്ങള് മറച്ചുപിടിക്കാനുള്ള ബിജെപിയുടെ ശ്രമമെന്നാണ് കോണ്ഗ്രസിന്റെ ആരോപണം. എല്ലാ നഗരങ്ങളുടെ പേരിനു പിന്നിലും ഒരു ചരിത്രമുണ്ടെന്നും രാജ്യത്തിന്റെ വികസനത്തിനോ പുരോഗതിക്കോ വേണ്ടി ഒന്നും ചെയ്യാതെ ആവശ്യമില്ലാത്ത കാര്യങ്ങള് ചെയ്യുന്ന തിരക്കിലാണെന്ന് പ്രതിപക്ഷ പാര്ട്ടികള് പറയുന്നു. കര്ഷകരുടെ വരുമാനം കൂട്ടുക, യുവാക്കള്ക്ക് തൊഴിലവസരം ഒരുക്കുക, കള്ളപ്പണത്തെ വിദേശത്ത് നിന്നും മടക്കിക്കൊണ്ടുരിക, തുടങ്ങി തെരഞ്ഞെടുപ്പിന് മുമ്പ് അനേകം കാര്യങ്ങള് ഉണ്ടായിട്ടും അതൊന്നും ചെയ്യുന്നില്ലെനും വിമര്ശിക്കുന്നു.
ഈ വര്ഷം ആഗസ്റ്റിലാണ് യുപി സര്ക്കാര് ആഗ്ര, ബെറെയ്ലി, കാണ്പൂര് വിമാനത്താവളങ്ങളുടെ പേര്് മാറ്റാനുള്ള അപേക്ഷ കേന്ദ്രത്തിന് നല്കിയത്. ആഗ്ര വിമാനത്താളവത്തിന് ജനസംഘ് സ്ഥാപനകന് ദീന് ദയാല് ഉപാദ്ധ്യായയുടെ നാമം നല്കാനായിരുന്നു ആവശ്യം. ഈ പേരുമാറ്റം വളച്ചൊടിച്ച ചരിത്രം നേരെയാക്കാനും പഴയ പേര് തിരിച്ചു കൊണ്ടുവരാനും ആണെന്നാണ് ബിജെപി പറയുന്നത്.
