സന: എട്ട് കിലോ ഭാരമുള്ള പത്ത് വയസ്സുകാരനെ കുറിച്ച് ചിന്തിക്കാന് പോലും സാധിക്കില്ല. എന്നാല് യെമനിലെ ആശുപത്രികിടക്കയില് ഇങ്ങനെയൊരു ബാലനുണ്ട്. ശ്വസിക്കാന് പോലും ബുദ്ധിമുട്ടുകയാണ് ഈ കുരുന്ന്. യെമനിലെ ആഭ്യന്തരയുദ്ധമാണ് ഗാസി സല എന്ന കുട്ടിയെ ഈ ഗതിയിലാക്കിയത്. പട്ടിണി കിടന്ന് കിടന്ന് ആരോഗ്യസ്ഥിതി മോശമാവുകയും ഒന്ന് അനങ്ങാനോ ശ്വാസം വിടാനോ പോലും സാധിക്കാതെയായി. കണ്ണ് തുറക്കാന് പോലും അവന് സാധിക്കുന്നില്ല.
ഈത്തരത്തില് പതിനായിരക്കണക്കിന് കുരുന്നുകളാണ് പട്ടിണി മൂലം യെമനില് ദുരിതം അനുഭവിക്കുന്നത്. പോഷകാഹാരക്കുറവ് മൂലം ദുരിതമനുഭവിക്കുന്ന പിഞ്ചുകുഞ്ഞുങ്ങളും സലായെ ചികിത്സിക്കുന്ന ആശുപത്രിയിലുണ്ട്. ഭക്ഷണം കഴിക്കാന് പോലുമുള്ള ആരോഗ്യമില്ലാതായതോടെ പലര്ക്കും ട്യൂബ് വഴിയും സിറിഞ്ച് വഴിയുമാണ് ആഹാരം നല്കുന്നത് പോലും.
പട്ടിണിക്കിരയായ 14 ദശലക്ഷം മനുഷ്യരില് പകുതിയോളം കുരുന്നുകളാണെന്ന് യുഎന് കണക്കുകള് വ്യക്തമാക്കുന്നു. 4.5 ദശലക്ഷം കുട്ടികള്ക്ക് സ്കൂളില് പോകാന് സാധിക്കുന്നില്ല. 2500 സ്കൂളുകളാണ് യുദ്ധത്തില് തകര്ന്നടിഞ്ഞത്. ഭാഗികമായി തകര്ന്ന സ്കൂളുകളും മറ്റും വീടുകള് നഷ്ടപ്പെട്ടവര്ക്കുള്ള അഭയകേന്ദ്രങ്ങളായി മാറി. 2015ല് ആരംഭിച്ച ആഭ്യന്തരയുദ്ധം യെമനില് അതിരൂക്ഷമായി തുടരുകയാണ്.
