ശ്രീനഗര്: ജമ്മുകശ്മീരില് വിഘടനവാദി നേതാവ് സജാദ് ലോണിനെ മുഖ്യമന്ത്രിയാക്കാന് കേന്ദ്രസര്ക്കാര് നിര്ദ്ദേശം നല്കിയെന്ന് കശ്മീര് ഗവര്ണര്. കേന്ദ്രസര്ക്കാര് നിര്ദ്ദേശം നടപ്പിലാക്കാന് മനസാക്ഷി അനുവദിക്കാതിരുന്ന സാഹചര്യത്തിലാണ് നിയമസഭ പിരിച്ചുവിട്ടതെന്നും കശ്മീര് ഗവര്ണര് സത്യപാല് മാലിക്ക് വെളിപ്പെടുത്തി. നവംബര് 24ന് ഗ്വാളിയോറില് നടന്ന ഒരു ചടങ്ങില് ഗവര്ണര് നടത്തിയ പ്രസംഗത്തിന്റെ വീഡിയോ ദൃശ്യങ്ങള് പുറത്തുവന്നിട്ടുണ്ട്.
ഡല്ഹിയില് നിന്നുള്ള നിര്ദ്ദേശം കേട്ടിരുന്നെങ്കില് വിഘടനവാദി നേതാവ് സജാദ് ലോണിനെ മുഖ്യമന്ത്രി ആകേണ്ടി വന്നേനെ എന്നാണ് സത്യപാലിന്റെ വാക്കുകള്. അങ്ങനെ ചെയ്തിരുന്നെങ്കില് യാതൊരു ആദര്ശവുമില്ലാത്ത വ്യക്തിയായി താന് മാറുമായിരുന്നു. ഞാന് എല്ലാം അവസാനിപ്പിക്കുകയാണ്. എന്നെ കുറ്റപ്പെടുത്തുന്നവര്ക്ക് കുറ്റപ്പെടുത്താം. ചെയ്തത് ശരിയാണോയെന്ന് തനിക്ക് വ്യക്തമായി ബോധ്യമുണ്ടെന്നും സത്യപാല് കൂട്ടിച്ചേര്ത്തു.
കശ്മീരിലെ തീവ്രവാദ ഗ്രൂപ്പിന്റെ നേതാവ് അബ്ദുള് ഗനി ലോണിന്റെ മകനാണ് പീപ്പിള്സ് കോണ്ഫറണ്സ് നേതാവ് സജാദ് ലോണ്. ഇയാളെ മുഖ്യമന്ത്രിയാക്കാനാണ് കേന്ദ്രസര്ക്കാര് നിര്ദ്ദേശിച്ചത്. ഗവര്ണറുടെ വെളിപ്പെടുത്തല് പുറത്തുവന്നതോടെ ബി.ജെ.പിയും കേന്ദ്രസര്ക്കാരും വെട്ടിലായിരിക്കുകയാണ്.
