കൊച്ചി: കേരളാ ബ്ലാസ്റ്റേഴ്സിന്റെ മുഖ്യ പരിശീലക സ്ഥാനത്ത് നിന്നും ഡേവിഡ് ജെയിംസിനെ പുറത്താക്കി. നാലാം സീസണില് 2018 ജനുവരിയിലാണ് ഡേവിഡ് ജെയിംസ് ബ്ലാസ്റ്റേഴ്സിന്റെ മുഖ്യ പരിശീലകനാകുന്നത്. എന്നാല് അഞ്ചാം സീസണിലെ മോശം പ്രകടനവും ജെയിംസിനെ ചീത്തപേര് കേള്ക്കേണ്ടി വന്നു. പിന്നാലെയാണ് പരിശീലകനെ പുറത്താക്കിയ തീരുമാനം എത്തിയത്.
എന്നാല് പരസ്പര ധാരണയോടെ വഴി പിരിഞ്ഞു എന്നാണ് ക്ലബ്ബിന്റെ വിശദീകരണം. ഡേവിഡ് ജെയിംസ് ടീമിന് നല്കി വന്ന സേവനത്തില് കേരള ബ്ലാസ്റ്റേഴ്സ് നന്ദി പ്രകാശിപ്പിക്കുന്നതായും മുന്നോട്ടുള്ള അദ്ദേഹത്തിന്റെ പ്രയാണത്തിന് എല്ലാ ആശംസകളും നല്കുന്നതായും കേരള ബ്ലാസ്റ്റേഴ്സ് ചീഫ് എക്സിക്യൂട്ടീവ് ഓഫീസര് വരുണ് ത്രിപുരനേനി അറിയിച്ചു.
ക്ലബ്ബില് ടീമംഗങ്ങളും മാനേജ്മെന്റും നല്കി വന്ന പിന്തുണയ്ക്കും സഹായങ്ങള്ക്കും പൂര്ണ്ണ സംതൃപ്തിയും നന്ദിയും അറിയിച്ച ഡേവിഡ് ജെയിംസ് കേരള ബ്ലാസ്റ്റേഴ്സിന് എല്ലാ ആശംസകളും നേര്ന്നുകൊണ്ടാണ് ടീമില് നിന്നുള്ള വിടവാങ്ങല് അറിയിച്ചത്. കേരള ബ്ലാസ്റ്റേഴ്സ് ആരാധകരുടെ പിന്തുണയ്ക്കും അദേഹം നന്ദി പറഞ്ഞു.
