ഹൈദരാബാദ്: ഇതര ജാതിക്കാരനെ പ്രണയിച്ച് വിവാഹം ചെയ്തതിന് യുവതിയെ മാതാപിതാക്കളും ബന്ധുക്കളും ചേര്ന്ന ക്രൂരമായി അടിച്ച് കൊലപ്പെടുത്തി. തെലങ്കാനയിലെ മഞ്ചീരിയല് ജില്ലയിലെ കലമഡുഗു പ്രദേശത്താണ് രാജ്യത്തെ നടുക്കിയ സംഭവം ഉണ്ടായത്. പിന്ദി അനുരാധ എന്ന 20കാരിയാണ് കൊലചെയ്യപ്പെട്ടത്. കൊലുപാതകത്തിന് ശേഷം ബന്ധുക്കള് മൃതദേഹം കത്തിക്കുകയും ചിതാഭസ്മം അരുവിയിലൊഴുക്കുകയും ചെയ്തതായി പൊലിസ് പറഞ്ഞു.
ഇതേ ഗ്രാമത്തിലെ തന്നെ അയ്യൊരു ലക്ഷ്മിരാജം എന്ന ലക്ഷ്ണിനെ(26)യാണ് അനുരാധ വിവാഹം ചെയ്തത്. ഇരുവരും ഡിസംബര് മൂന്നിന് ഹൈദരാബാദിലേക്ക് ഒളിച്ചോടുകയായിരുന്നു. തുടര്ന്ന് ആര്യ സമാജ ക്ഷേത്രത്തില് വെച്ച് വിവാഹിതരായി. തുടര്ന്ന് കഴിഞ്ഞ ശനിയാഴ്ച ഇരുവരെയും പോലീസ് സംരക്ഷണയില് ലക്ഷ്മണിന്റെ വീട്ടില് എത്തിച്ചു. ഇവിടെ എത്തിയ അനുരാധയുടെ ബന്ധുക്കള് ലക്ഷ്മണിനെ ക്രൂരമായി മര്ദ്ദിച്ച് അനുരാധയെ ബലമായി പിടിച്ചുകൊണ്ടുപോയി.
വീട്ടിലേക്ക് കൊണ്ടുപോയ യുവതിയെ ബന്ധുക്കളും മാതാപിതാക്കളും ചേര്ന്ന് ക്രൂരമായി മര്ദ്ദിച്ച് കൊലപ്പെടുത്തുകയായിരുന്നു. നാട്ടുകാരുടെ മുന്നില് വെച്ചായിരുന്നു കൊടുംക്രൂരത. അനുരാധ മരിച്ചതോടെ മൃതദേഹവുമായി നിര്മല് ജില്ലയിലെ മല്ലാപൂരിലുള്ള കുന്നിന് മുകളിലെത്തിച്ച് കത്തിച്ചു. പിന്നീട് ചിതാഭസ്മം ഇന്ന് പുലര്ച്ചെ പ്രദേശത്തുള്ള അരുവിയില് ഇവര് ഒഴുക്കിയെന്നും പോലീസ് പറയുന്നു.
ലക്ഷ്മണ് നല്കിയ പരാതിയുടെ അടിസ്ഥാനത്തിലാണ് പോലീസ് കേസ് റജിസ്റ്റര് ചെയ്ത് അന്വേഷണം ആരംഭിച്ചത്. പോലീസ് അനുരാധയുടെ പിതാവ് സത്തണ്ണയെയും അമ്മ ലക്ഷ്മിയെയും അറസ്റ്റ് ചെയ്തു. അനുരാധ നെയ്ത്തുകാരുടെ വിഭാഗത്തില്പ്പെട്ട പദ്മശാലി എന്ന വിഭാഗക്കാരിയും ലക്ഷ്മണ് യാദവ വിഭാഗക്കാരനുമായിരുന്നു. ഇരു ജാതികളും ഒ ബി സി വിഭാഗത്തില്പ്പെടുന്നവയാണ്.
