കോട്ടയം: സീറോ മലബര് സഭയിലെ ഭൂമി കുംഭകോണം, ബിഷപ്പ് ഫ്രാങ്കോ മുളയ്ക്കലിന്റെ ലൈംഗിക പീഡനം തുടങ്ങിയ വിവാദ വിഷയങ്ങളില് സഭാ േനതൃത്വത്തിന്റെ നിലപാടുകള് ചോദ്യം ചെയ്ത് രംഗത്തെത്തിയ എറണാകുളം-അങ്കമാലി അതിരൂപത വൈദികന് ഫാ. അഗസ്്റ്റിന് വട്ടോലിക്കെതിരെ അച്ചടക്ക നടപടിയുണ്ടാവില്ല. ഫാ.വട്ടോലി നല്കിയ വിശദീകരണ കത്തില് തൃപ്തി അറിയിച്ച അതിരൂപത അഡ്മിനിസ്ട്രേറ്റര് ബിഷപ്പ് ജേക്കബ് മനത്തോടത്ത് ഇക്കാര്യം വ്യക്തമാക്കി വൈദികന് മറുപടി കത്ത് നല്കി. ഫാ.വട്ടോലിക്കെതിരെ തുടര് അന്വേഷണവുമുണ്ടാവില്ലെന്ന് അദ്ദേഹം കത്തില് പറയുന്നു.
എന്നാല്, സേവ് ഔവര് സിസ്റ്റേഴ്സ് (എസ്ഒഎസ്) ആക്ഷന് കൗണ്സില് സ്ഥാനത്തുനിന്നും മാറണമെന്നും ഭാവിയിലും ഇത്തരം സമരപരിപാടികളില് പങ്കെടുക്കരുതെന്നും ആവശ്യപ്പെടുന്നു. ആര്ച്ച് ഡയോഷ്യന് മൂവ്മെന്റ് ഫോര് ട്രാന്സ്പെരന്സി (എ.എം.ടി) യോ അതുപേലെയുള്ള സംഘടനകളുമായോ ബന്ധം പാടില്ല. സഭയേയോ സഭാനേതൃത്വത്തെയോ അപകീര്ത്തിപ്പെടുത്തുന്ന പ്രസ്താവനകള് നടത്താന് പാടില്ല. അത്തരം നടപടികള് നമ്മുടെ വിശ്വാസത്തെ ആഴത്തില് മുറിവേല്പ്പിക്കുന്നുവെന്നും കത്തില് പറയുന്നു.
ഫാ.വട്ടോലി കുറച്ചു ആഴ്ചകള് പ്രാര്ത്ഥനയില് ആയിരിക്കണമെന്ന നിര്ദേശവും അദ്ദേഹം മുന്നോട്ടുവയ്ക്കുന്നുണ്ട്. നിലവില് തുടരുന്ന സേവനങ്ങള് അവസാനിപ്പിച്ച് മാര്ച്ച് മാസത്തില് വരുന്ന പൊതു സ്ഥലംമാറ്റത്തില് താങ്കളെ അതിരൂപതയില് പുതിയ ചുമതലകള് ഏല്പ്പിക്കാന് ആഗ്രഹിക്കുന്നു. എന്നാല് വാത്തുരുത്തിയില് നടത്തിവരുന്ന ദൗത്യം പൂര്ത്തിയാക്കാന് ഒരു വര്ഷം കൂടി അനുവദിക്കണമെന്ന താങ്കളുടെ അഭ്യര്ത്ഥന മാനിക്കുന്നു. ഈ കാലയളവില് വാത്തുരുത്തിയില് ചെയ്യുന്ന സേവനങ്ങളെ കുറിച്ച് തന്നെ എഴുതി അറിയിക്കണമെന്നും ബിഷപ്പ് മനത്തോടത്ത് ആവശ്യപ്പെടുന്നുണ്ട്.
ഡിസംബര് 29ന് നല്കിയിരിക്കുന്ന പുതിയ കത്തിന് ഒരാഴ്ചയ്ക്കുള്ളില് മറുപടി നല്കണമെന്നാണ് അപ്പസ്തോലിക് അഡ്മിനിസ്ട്രേറ്ററുടെ നിര്ദേശം. 2018 നവംബര് 11ന് ഫാ.വട്ടോലി ബിഷപ്പ് മനത്തോടത്തിന് നല്കിയ കത്തില് ''തന്റെ വാക്കോ പ്രവൃത്തിയോ അഡ്മിനിസ്ട്രേറ്റര്ക്കോ മറ്റാര്ക്കെങ്കിലുമോ വേദനയുളവാക്കിയെങ്കില് താന് താന് ഖേദിക്കുകയും മാപ്പുപറയുകയും ചെയ്യുന്നു''വെന്ന് വ്യക്തമാക്കിയിരുന്നു. ഇത് കണക്കിലെടുത്താണ് തുടര് നടപടിയില് നിന്ന് ഒഴിവാക്കുന്നതെന്ന് കത്തില് പറയുന്നു. എസ്ഒഎസ് കണ്വീനര് സ്ഥാനത്തുമാറാന് തയ്യാറാണെന്ന് ഫാ.വട്ടോലി നേരത്തെ തന്നെ സഭാ േനതൃത്വത്തെ അറിയിച്ചിരുന്നു.
അതേസമയം, ഭയപ്പെട്ട് പിന്മാറുന്നവര്ക്ക് പ്രവര്ത്തിക്കാനാവുമോ എന്നാണ് ഫാ.വട്ടോലി 'മംഗളം ഓണ്ലൈനോട്' പ്രതികരിച്ചത്. ഒരു എഴുത്തുതന്നാല് തന്നെ ഭയപ്പെട്ടു പിന്മാറുന്ന പ്രസ്ഥാനമോ വ്യക്തികളോ ആണെന്നു വന്നാല് പിന്നെ മുന്നോട്ടുപോകാതിരിക്കുന്നതല്ലേ നല്ലത്. നിങ്ങളുടെ വിശ്വാസമനുസരിച്ച് ചെയ്യുന്നത് ശരിയായിരിക്കാമെന്ന് കത്തില് തന്നെ പറയുന്നു. അത് മറ്റൊരു അര്ത്ഥത്തില് സഭയെ മോശമാക്കുന്നു എന്നുപറയുന്നു. എന്നാല് സഭയേ മോശമാക്കുന്ന പ്രവര്ത്തികളല്ല ചെയ്യുന്നതെന്ന് തനിക്ക് ഉറപ്പുണ്ടെന്ന് അദ്ദേഹം പറയുന്നു.
നിശബ്ദതയിലൂടെ സഭാ നേതൃത്വം ചെയ്തുകൊണ്ടിരിക്കുന്നത് പാതകങ്ങളാണ്. ഞങ്ങളുടെ പ്രവൃത്തികളിലൂടെ അവര്ക്ക് അത് തിരുത്താന് ആകുമെങ്കില് അത് മതി. സഹായകരമാകുമെന്നില്ലെങ്കില് അത് ആവശ്യമില്ല. ഞങ്ങള് ചെയ്യുന്ന ഓരോ പ്രവൃത്തിയും സഭാ സംവിധാനത്തെ തിരുത്താനുള്ളതാണ്. എല്ലാം മറച്ചുവയ്ക്കുന്ന രഹസ്യാത്മകതയാണ് സഭാ സംവിധാനങ്ങളിലുള്ളത്. ആ രഹസ്യാത്മകതയില് കഴമ്പില്ല എന്നവര്ക്ക് മനസ്സിലാകണം.
