കണ്ണൂര്: വെട്ടും കുത്തും ബോംബേറും കൊണ്ട് നിരന്തരം തലവേദനയായി മാറിയിരിക്കുന്ന കണ്ണൂരില് പ്രശ്നങ്ങള് എന്നന്നേക്കുമായി അവസാനിപ്പിക്കാന് യുവാക്കളെ ലക്ഷ്യമിട്ട് ഇനി പോലീസിന്റെ 'പെണ്' കെണിയും. വിവാഹം, കടുംബം എന്നീ ആയുധങ്ങള് ഉപയോഗിച്ച് അക്രമത്തിലും അച്ചടക്കമില്ലായ്മയിലും പെട്ടുപോയ യുവാക്കളെ നേര്വഴിക്ക് കൊണ്ടുവരാനുള്ള പദ്ധതികളാണ് തയ്യാറാകുന്നത്. പാനൂര് ജനമൈത്രി പോലീസിന്റേതാണ് ഇടപെടല്. ആറു മാസം മുമ്പ് പാനൂര് പോലീസ് തയ്യാറാക്കിയ 'ഇന്സൈറ്റ്' പദ്ധതി പച്ചപിടിച്ചു തുടങ്ങി.
നിയമപരിപാലനത്തിലൂടെ കണ്ണൂരിലെ പ്രശ്നങ്ങള് അവസാനിപ്പിക്കാന് കഴിയില്ലെന്ന് ഇതിനകം ബോദ്ധ്യപ്പെട്ടതോടെയാണ് പോലീസ് വേറെ മാര്ഗ്ഗം സ്വീകരിക്കുന്നത്. സംഘര്ഷങ്ങളില് അനേകര്ക്ക് ജീവന് നഷ്ടമായ പാനൂരിലെ യുവാക്കളില് വിവാഹിതരാകാത്തവരെ കല്യാണം കഴിപ്പിച്ച് ഉത്തരവാദിത്വമുള്ള കുടുംബ നായകന്മാരാക്കി പ്രശ്നങ്ങളില് നിന്നും നീക്കി നിര്ത്താനാണ് ശ്രമം. ഒട്ടേറെ യുവാക്കളാണ് ഇവിടെ കേസില് പെട്ട് കിടക്കുന്നത്. ഒരുപാട് പേര് ജയിലില് കിടക്കുമ്പോള് അനേകം പേര് കേസും കാര്യങ്ങളുമായി കോടതികള് കയറിയിറങ്ങുകയും ചെയ്യുന്നു.
അതേസമയം മുമ്പ് കേസില് പെട്ട ചിലര് കല്യാണം കഴിഞ്ഞ് കുട്ടികളും കുടുംബവും ആയതോടെ പ്രശ്നങ്ങളില് നിന്നും മാറി നിന്ന് സമാധാനജീവിതം നയിക്കുകയാണ്. ഇതോടെയാണ് യുവാക്കളുടെ ദിശമാറ്റി വിടുന്ന പരിപാടിയെക്കുറിച്ച് പോലീസ് ആലോചിച്ചതും പദ്ധതി തയ്യാറാക്കുന്നതും. പെണ്ണു കെട്ടാത്തവരെ കണ്ടെത്തി വിവാഹം കഴിപ്പിക്കുക, ഉന്നതവിദ്യാഭ്യാസമുള്ളവരെ സര്ക്കാര് ജോലി കിട്ടുന്ന രീതിയിലേക്ക് പര്യാപ്തമാക്കുന്ന പിഎസ് സി പരിശീലനം നല്കുക തുടങ്ങിയ വന്കിട കാര്യങ്ങളാണ് ഇന്സൈറ്റ് പദ്ധതിയില് പോലീസ് ലക്ഷ്യമിടുന്നത്.
സംഘര്ഷങ്ങളില് അനേകര്ക്ക് ജീവന് നഷ്ടമായ പ്രദേശമാണ് പാനൂര്. അക്രമം ഉറ്റവരെ നഷ്ടപ്പെടുത്തിയതിനെ തുടര്ന്ന് നിരാലംബരായ അനേകം കുടുംബങ്ങള് ഇവിടെയുണ്ട്. അനേകം തൊഴിലില്ലാത്ത യുവാക്കള് കേസുകളിലും മറ്റും പെട്ട് നിയമനടപടികളുമായി ഓടി നടക്കുകയും ചെയ്യുന്ന അവസ്ഥയിലാണ് യുവാക്കളെ വിവാഹം കഴിപ്പിക്കാനും സര്ക്കാര് ജോലിക്ക് പ്രാപ്തമാക്കാനുള്ള പരിശീലനം ഉള്പ്പെടെയുള്ള പരിപാടികളുമായി ഇന്സൈറ്റ് എത്തുന്നത്. അവിവാഹിതരെ കണ്ടെത്തി അവരെ കുടുംബത്തിന്റെ ഉത്തരവാദിത്വം ഏല്പ്പിക്കുക എന്നതും ഇന്സൈറ്റ് ലക്ഷ്യമിടുന്നു. പിഎസ് സി കോച്ചിംഗിന് മാത്രമായി ജനമൈത്രി പോലീസ് പാനൂരിലും കൊളവല്ലൂരിലുമായി 20 കേന്ദ്രങ്ങള് നടത്തുന്നുണ്ട്. പാരാമിലിറ്ററി ജോലിക്കും പരിശീലനം നല്ക്കുന്നുണ്ട്.
പാനൂരിലെ യുവതയെ ലക്ഷ്യമിട്ട് വേനലവധിയില് ഒരു സര്വേ നടത്താനുള്ള നീക്കത്തിലാണ് പോലീസ്. പാനൂര് സ്റ്റേഷന് പരിധിക്കുള്ളില് വരുന്ന 19,000 വീടുകളില് അവിവാഹിതരുടെ കണക്കെടുക്കാനാണ് ഉദ്ദേശം. ഇതില് കുടുംബ പശ്ചാത്തലവും വിദ്യാഭ്യാസയോഗ്യതയും നിലവില് ചെയ്യുന്ന ജോലിയുമടക്കം സമഗ്ര വിവരങ്ങള് എന്എസ്എസ് വോളണ്ടിയര്മാരെ വീടുകള് തോറും വിട്ട് ശേഖരിക്കും. പിന്നീട് സാമൂഹ്യ-സാംസ്ക്കാരിക-രാഷ്ട്രീയ പ്രവര്ത്തകരുടെ യോഗവും വിളിക്കും. ഇന്സൈറ്റിന്റെ വിജയമാണ് അവിവാഹിതരെ വിവാഹം കഴിപ്പിക്കാനുള്ള പദ്ധതിക്കും പോലീസിന് പ്രചോദനമായിരിക്കുന്നത്. ഇതിനൊപ്പം കേസില് പെട്ട് ഒളിവില് താമസിക്കുന്ന തങ്ങള്ക്കൊക്കെ ആരു പെണ്ണു തരാനാ എന്ന യുവാക്കളുടെ ചോദ്യവും പോലീസ് ഏറ്റെടുത്തിരിക്കുകയാണ്.
