കൊച്ചി: വ്യാജവാര്ത്തകള് പ്രചരിപ്പിക്കുന്ന ഓണ്ലൈന് മാധ്യമങ്ങള്ക്കെതിരേ നിയമനടപടി സ്വീകരിക്കാന് ആലോചനയെന്ന് സീറോ മലബാര് സഭ. അപമാനകരമായ വ്യാജവാര്ത്തകള് പ്രസിദ്ധീകരിക്കുന്ന ഓണ്ലൈന് മാധ്യമങ്ങള്ക്കും സഭാവിരുദ്ധ പ്രസ്ഥാനങ്ങള്ക്കുമെതിരേ നിയമനടപടിക്കായി സൈബര് സെല്ലിനെ സമീപിക്കാന് സഭാ സിനഡ് തീരുമാനിച്ചതായി സീറോ മലബാര് സഭ വാര്ത്താകുറിപ്പില് പറഞ്ഞു.
സഭയുടെ ആസ്ഥാനമായ മൗണ്ട് സെന്റ് തോമസില് നടന്നുവരുന്ന സഭാ സിനഡിനെ കുറിച്ച് അനുദിനമെന്നോണം വാര്ത്തകള് വരുന്ന സാഹചര്യത്തില് വ്യാജ വാര്ത്ത പ്രസിദ്ധീകരിക്കുന്ന ഓണ്ലൈന് മാധ്യമങ്ങള്ക്കും അത്തരം പ്രസ്ഥാനങ്ങള്ക്കും എതിരേ സൈബര്സെല്ലിനെ സമീപിക്കാനാണ് സിനഡിന്റെ തീരുമാനം. സഭയുടെ കൂട്ടായ്മയെ തകര്ക്കാന് ലക്ഷ്യമിട്ടുള്ളതും സഭയിലെ മെത്രാന്മാരെ വ്യക്തിപരമായി തേജോവധം ചെയ്യുന്നതുമായ വാര്ത്തകള് സൃഷ്ടിക്കപ്പെടുകയാണെന്നും ഇതിന് സിനഡിലെ ചര്ച്ചകളുമായി ഒരു ബന്ധവുമില്ലെന്നും സിനഡ് പറഞ്ഞു.
