ന്യൂഡല്ഹി: കന്യാസ്ത്രിയ ബലാത്സംഗം ചെയ്ത ജലന്ധര് ബിഷപ് ഫ്രാങ്കോ മുളയ്ക്കലിനെതിരെ നടപടി ആവശ്യപ്പെട്ട് സമരം നടത്തിയ അഞ്ച് കന്യാസ്ത്രികള്ക്ക് നീതി ആവശ്യപ്പെട്ട് സ്വാമി അഗ്നിവേശ് ഫ്രാന്സിസ് മാര്പാപ്പയ്ക്ക് കത്തയച്ചു. കത്തോലിക്ക സഭ അഞ്ച് കന്യാസ്ത്രികളെ സ്ഥലം മാറ്റിയ വിഷയത്തില് ഇടപെടണം എന്നാവശ്യപ്പെട്ടാണ് കത്ത്.
സിസ്റ്റര് ആല്ഫി പള്ളശേരില്, സിസ്റ്റര് അനുപമ കേളമംഗലത്തുവേളിയില്, സിസ്റ്റര് ജോസ്ഫൈന് വില്ലുന്നിക്കല്, സിസ്റ്റര് ആന്സിറ്റ ഉറുമ്പില് എന്നിവര്ക്കെതിരെയുള്ള സ്ഥലംമാറ്റ ഉത്തരവ് പ്രഥമദൃഷ്ട്യാ പ്രതികാര നടപടിയാണെന്ന് കത്തില് പറയുന്നു. ആക്രമിക്കപ്പെട്ട് ഇരയ്ക്ക് വേണ്ടി പൊതു സമൂഹത്തില് ഇറങ്ങിയ ഇവരെ ജനങ്ങള് ബഹുമാനിക്കുന്നു.
സഭയുമായി ബന്ധപ്പെട്ട പലരും അതിക്രമങ്ങളോട് സഹിഷ്ണുതയും നീതിയ്ക്കായുള്ള പോരാട്ടങ്ങളോട് അസഹിഷ്ണുതയും പുലര്ത്തുന്നു. ഇതല്ല യേശു ക്രിസ്്തു ലോകത്തെ പഠിപ്പിച്ചത്.
അടിച്ചമര്ത്തപ്പെട്ടവര്ക്ക് നീതി ഉറപ്പാക്കുന്നതിലുള്ള താങ്കളുടെ പ്രതിബദ്ധതയില് എനിക്ക് വിശ്വാസമുണ്ടെന്നും അതുകൊണ്ട് തന്നെ ഈ വിഷയത്തില് ഇടപെടണമെന്നും കന്യാസ്ത്രീകള്ക്ക് നീതി ഉറപ്പാക്കണം എന്നും മാര്പാപ്പയ്ക്ക് അയച്ച കത്തില് സ്വാമി അഗ്നിവേശ് ആവശ്യപ്പെടുന്നു.
ആരോപണവിധേയനായ വ്യക്തിയോട് മൃദു സമീപനം സ്വീകരിക്കുന്ന കത്തോലിക്ക സഭ, ഇരയ്ക്ക് നീതി കിട്ടുന്നതിന് വേണ്ടി പോരാട്ടം നടത്തുന്നവരെ പീഡിപ്പിക്കാനാണ് ശ്രമിക്കുന്നതെന്നും അഗ്നിവേശ് കുറ്റപ്പെടുത്തുന്നു. ഈ മാസം 21നാണ് കത്ത് അയച്ചിരിക്കുന്നത്.
കുറവിലങ്ങാട് മഠത്തില് നിന്നും ജനുവരി 18നുള്ളില് മാറണമെന്ന് ആവശ്യപ്പെട്ട് കഴിഞ്ഞ ദിവസങ്ങളില് നോട്ടീസ് ലഭിച്ചിരുന്നു. നേരത്തെ തങ്ങള്ക്കെതിരെയുള്ള നടപടി ഒഴിവാക്കണമെന്ന് ആവശ്യപ്പെട്ട് കന്യാസ്ത്രികള് മുഖ്യമന്ത്രി പിണറായി വിജയന് കത്ത് അയച്ചിരുന്നു.
