ഡബ്ലിന്: വെറും നാലു പന്തുകൊണ്ട് അയര്ലന്റിന്റെ കഥ കഴിച്ച അഫ്ഗാനിസ്ഥാന് സ്പിന്നര് റഷീഖാന് വീണ്ടും ഞെട്ടിക്കുന്നു. ഏഷ്യയില് നിന്നും ഒരു ക്രിക്കറ്റ് ശക്തി കൂടി ജ്വലിച്ചുയരുന്നു എന്ന സൂചന പതിവായി നല്കിക്കൊണ്ടിരിക്കുന്ന അഫ്ഗാനിസ്ഥാന് വേണ്ടി കഴിഞ്ഞ ദിവസം നടന്ന ട്വന്റി20 ക്രിക്കറ്റില് കുറിച്ച റഷീദ്ഖാന് ഒരോവറിലെ നാലു പന്തിലും വിക്കറ്റ് നേടി ശ്രീലങ്കയുടെ മലിംഗയുടെ നേട്ടം ആവര്ത്തിച്ചു.
അയര്ലന്റുമായി നടക്കുന്ന ട്വന്റി20 പരമ്പരയിലെ മൂന്നാമത്തെ മത്സരത്തില് 27 റണ്സ് നല്കി റഷീദ് നേടിയത് ഹാട്രിക്ക് ഉള്പ്പെടെ അഞ്ചു വിക്കറ്റായിരുന്നു. ഇതോടെ ട്വന്റി20 യില് ഹാട്രിക് നേടിയ ഏഴാമത്തെ ബൗളറായി റഷീദ് മാറി. ബ്രെറ്റ് ലീ, ജേക്കബ് ഓറം, ടിം സൗത്തി, തിസാരാ പെരേര, മലിംഗ, ഫഹീം അഷ്റഫ് എന്നിവരാണ് ട്വന്റി 20 യില് ഹാട്രിക് കുറിച്ചിട്ടുള്ള മറ്റു കളിക്കാര്. ട്വന്റ20 യില് അഞ്ചു വിക്കറ്റ് രണ്ടു തവണ നേടുന്ന നാലാമത്തെ ബൗളറാകാനും റഷീദിനായി. 2017 ല് ഗ്രേറ്റര് നോയ്ഡയില് അയര്ലന്റിനെതിരേ തന്നെയാണ് റഷീദിന്റെ ആദ്യനേട്ടവും
അഫ്ഗാനിസ്ഥാന് നേടിയ ഏഴിന് 210 റണ്സ് വിജയലക്ഷ്യം പിന്തുടരുമ്പോള് 153 ന് മൂന്ന് എന്ന ശക്തമായ നിലയില് അയര്ലന്റ് നില്ക്കുമ്പോള് പതിനാറാമത്തെ ഓവര് മുതലായിരുന്നു കാര്യങ്ങള് തിരിഞ്ഞുമറിഞ്ഞു തുടങ്ങിയത്. കെവിന് ഒബ്രയാനും ആന്ഡ്രൂ ബാല്ബിര്നിയും 96 റണ്സ് കൂട്ടുകെട്ട് ഉയര്ത്തി നില്ക്കുകയായിരുന്നു ഈ സമയം. പതിനാറാം ഓവറിലെ അവസാന പന്തില് 74 റണ്സുമായി നിന്ന ഒബ്രയാനെ ഷഫിഖുള്ളയുടെ കയ്യിലെത്തിച്ചു കൊണ്ടാണ് റഷീദ് തുടങ്ങിയത്. 18 ാം ഓവറില് വീണ്ടും എറിയാന് വന്നപ്പോള് ആദ്യ പന്തില് വീണത് ജോര്ജ്ജ് ഡോക്കര്വെല്. ലോംഗ് ഓണിലേക്കുള്ള ഷോട്ട് എത്തിയത് നബിയുടെ കയ്യില്. സുന്ദരന് ഷോട്ടായിരുന്നു എങ്കിലും നബി അതിര്ത്തി കയറിനടുത്തുവെച്ച് പിടിച്ചു. മുകളിലേക്ക് പൊക്കിയെറിഞ്ഞ ശേഷം കയര് കടന്ന് ബാലന്സ് ചെയ്ത് തിരിച്ചുവന്ന് പിടിച്ചു.
ഷെയിന് ഗെറ്റ്കാട്ടേയുടേതായിരുന്നു റഷീദിന് ഹാട്രിക് സമ്മാനിക്കാനുള്ള ഊഴം. തകര്പ്പന് ഗൂഗ്ളിയില് ഗെറ്റ്കാട്ടേ സ്റ്റംപ് ചെയ്യപ്പെട്ടു. തൊട്ടു പിന്നാലെ സിമി സിംഗ് ഗോള്ഡന് ഡക്കുമായി. നേരിട്ട ആദ്യ പന്ത് തന്നെ കുറ്റി തെറുപ്പിച്ചതോടെ അയര്ലന്റ് കീഴടങ്ങി. ആദ്യ നാലു പന്തിലും വിക്കറ്റ് വീഴ്ത്തുന്ന കാര്യത്തില് മലിംഗയാണ് റഷീദിന്റെ മൂന്ഗാമി. 2007 ല് ദക്ഷിണാഫ്രിക്കയ്ക്ക് എതിരേ ഏകദിനത്തിലായിരുന്നു മലിംഗയുടെ നേട്ടം. ശ്രീലങ്കയുടെ 210 പിന്തുടര്ന്ന ദക്ഷിണാഫ്രിക്ക 206 ന് അഞ്ച് എന്ന നിലയിലാണ് മലിംഗയ്ക്ക് മുന്നില് വീണത്.
കളിയുടെ 45 ാം ഓവറിലെ സെക്കന്റ്ലാസ്റ്റ് ബോളില് വേഗം കുറഞ്ഞ ഒരു പന്തില് ആദ്യം വീഴ്ത്തിയത് പൊള്ളോക്കിനെ. തൊട്ടുപിന്നാലെ ഓവറിലെ അവസാന പന്തില് വീണത് ആന്ഡ്രൂ ഹാള്. സംഗക്കാരയ്ക്കായിരുന്നു ക്യാച്ച്. തൊട്ടടുത്ത 46 ാം ഓവറില് ദക്ഷിണാഫ്രിക്ക നേടിയത് ഒരു റണ്സ് മാത്രം. വീണ്ടും 47 ാം ഓവര് എറിയാന് വന്ന മലിംഗ ആദ്യ പന്തില് തന്നെ 86 റണ്സുമായി നിന്ന ജാക്വസ് കാലിസിനെ വീഴ്ത്തി. തൊട്ടടുത്ത പന്ത് യോര്ക്കറായിരുന്നു. മഖായ എന്റിനിയുടെ കുറ്റി തെറുപ്പിച്ചു. എറിഞ്ഞ നാലു പന്തുകളില് നാലു വിക്കറ്റ് വീഴ്ത്തി മലിംഗ ചരിത്രമെഴുതി.
