ന്യുഡല്‍ഹി: അതിര്‍ത്തി ലംഘിച്ച പാക്ക് വിമാനങ്ങളെ തുരത്താനുള്ള നീക്കത്തിനിടെയാണ് മിഗ്-21 തകര്‍ന്ന് ഇന്ത്യന്‍ പൈലറ്റ് പാക്ക് കസ്റ്റഡിയിലാകുന്നത്. ഇന്ത്യന്‍ പൈലറ്റ് തങ്ങളുടെ കൈവശമുണ്ടെന്ന അവകാശവാദാം ഉന്നയിച്ച് ഉടന്‍ തന്നെ പാക്കിസ്താന്‍ രംഗത്തെത്തിയിരുന്നു. പിന്നാലെ രക്തം പുരണ്ട മുഖത്തോടെ കൈകള്‍ ബന്ധിച്ച് നിലയില്‍ പ്രാകൃതമായ രീതിയിലുള്ള നിരവധി ചിത്രങ്ങളും ദൃശ്യങ്ങളും പുറത്തുവന്നിരുന്നു. തുടര്‍ന്ന് ഇന്ത്യന്‍ പൈലറ്റിനേയും ഒരു പോര്‍വിമാനവും കാണാനില്ലെന്ന് വിദേശകാര്യ വക്താവ് സ്ഥിരീകരിക്കുകയും, വൈകുന്നേരത്തോടെ ഇന്ത്യന്‍ പൈലറ്റ് പാക്ക് കസ്റ്റഡിയിലാണെന്ന് ഇന്ത്യ സ്ഥിരകീരിച്ചു. പ്രാകൃത പ്രദര്‍ശനം അന്താരാഷ്ട്ര നിയമലംഘനം ആണെന്ന വിമര്‍ശനം ഇന്ത്യ ഉയര്‍ത്തിയതിനു പിന്നാലെയാണ് സുരക്ഷിതനെന്ന് കാണിച്ചുകൊണ്ട് പൈലറ്റിനെ ചോദ്യം ചെയ്യുന്ന വീഡിയോ ഏറ്റവും ഒടുവിലായി പുറത്തുവന്നിരിക്കുന്നത്.
ഇന്ത്യന്‍ വ്യോമസേന ഉദ്യോഗസ്ഥന്‍ വിങ് കമാന്‍ഡര്‍ അഭിനന്ദന്‍ വര്‍ധമാനെ പാക്ക് സൈനികോദ്യോഗസ്ഥന്‍ ചോദ്യം ചെയ്യുന്നതിന്റെ വീഡിയോ ആണ് പുറത്തെത്തിയത്. ന്യൂയോര്‍ക്ക് ടൈംസിന്റെ പാക്കിസ്താന്‍ പ്രതിനിധിയായ സല്‍മാന്‍ മസൂദ് ആണ് തന്റെ ട്വിറ്റര്‍ ഹാന്‍ഡിലിലൂടെ വീഡിയോ പുറത്തുവിട്ടിരിക്കുന്നത്.
പാക്ക് കസ്റ്റഡിയില്‍ സുരക്ഷിതനാണെന്നും, വളരെ നന്നായാണ് പാക്ക് സൈനിക ഉദ്യോഗസ്ഥര്‍ തന്നെ കൈകാര്യം ചെയ്തതെന്നും അഭിനന്ദന്‍ വീഡിയോയില്‍ പറയുന്നുണ്ട്. ഇപ്പോള്‍ പറയുന്ന വാക്കുകള്‍ തിരിച്ച് ഇന്ത്യയിലേയ്ക്ക് ചെന്നാലും മാറ്റില്ലെന്നും ഉദ്യോഗസ്ഥന്‍ പറയുന്നു. എന്നാല്‍ തന്ത്രപ്രധാനമായ ചോദ്യങ്ങള്‍ക്ക് മറുപടി നല്‍കാന്‍ കഴിയില്ലെന്ന് പൈലറ്റ് വ്യക്തമാക്കുന്നുണ്ട്. ചായ കുടിച്ചുകൊണ്ട് വളരെ പ്രസന്നനായാണ് പൈലറ്റ് ചോദ്യങ്ങള്‍ക്ക് മറുപടി നല്‍കുന്നത്.
വീഡിയോയിലെ സംഭാഷണം:
പാക്ക് ഓഫീസര്‍: എന്താണ് താങ്കളുടെ പേര്?
പൈലറ്റ്: വിങ് കമാന്‍ഡര്‍ അഭിനന്ദന്‍
പാക്ക് ഓഫീസര്‍: ഇവിടെ സുരക്ഷിതനാണോ?
പൈലറ്റ്: അതെ. ഞാന്‍ തിരിച്ച് എന്റെ രാജ്യത്തേക്ക് പോയാലും ഈ നിലപാട് മാറ്റില്ല. പാക്ക് സൈന്യം വളരെ നന്നായാണ് തന്നെ പരിചരിച്ചത്.
പാക്ക് ഓഫീസര്‍: ഇന്ത്യയില്‍ എവിടെ നിന്നുള്ളതാണ് താങ്കള്‍?
പൈലറ്റ്: നിങ്ങളോട് പറയാന്‍ പാടില്ല. എന്നോട് ക്ഷമിക്കുക. ഞാന്‍ ഇന്ത്യയുടെ തെക്കന്‍ പ്രദേശത്ത് നിന്നുള്ളയാളാണ്
പാക്ക് ഓഫീസര്‍: വിവാഹിതനാണോ?
പൈലറ്റ്: അതെ.
പാക്ക് ഓഫീസര്‍: ചായ ഇഷ്ടപ്പെട്ടെന്ന് കരുതുന്നു?
പൈലറ്റ്: ചായ രുചികരമാണ്. നന്ദി.
പാക്ക് ഓഫീസര്‍: ഏത് വിമാനത്തിലാണ് നിങ്ങള്‍ പറന്നത്?
പൈലറ്റ്: എനിക്കത് പറയാന്‍ കഴിയില്ല. ക്ഷമിക്കണം.
പാക്ക് ഓഫീസര്‍: എന്തായിരുന്നു ദൗത്യം?
പൈലറ്റ്: എനിക്കത് പറയാന്‍ കഴിയില്ല.
Comments