പത്തനംതിട്ട: ശബരിമല വിഷയത്തോടെ ദേശീയശ്രദ്ധയാകര്ഷിച്ച പത്തനംതിട്ട ലോക്സഭാ തെരഞ്ഞെടുപ്പില് ഏറ്റവും ഹോട്ട് സീറ്റുകളില് ഒന്നായി മാറുമെന്ന് ഉറപ്പ്. മാസങ്ങള്ക്ക് മുമ്പ് സ്ത്രീ പ്രവേശനവുമായി ബന്ധപ്പെട്ട് അന്താരാഷ്ട്ര മാധ്യമങ്ങള്ക്ക് പോലും വിഷയമായ ശബരിമല ക്ഷേത്രത്തിന് പിന്നാലെ ലോക്സഭാ തെരഞ്ഞെടുപ്പില് ഏറ്റവും കൂടുതല് വിഐപികള് സ്ഥാനാര്ത്ഥികളായി എത്തുന്നു എന്ന കൗതുകം കൂടിയുണ്ട്.
വിവിധ നിയമസഭാ മണ്ഡലങ്ങളിലായി അഞ്ച് എംഎല്എ മാരുള്ള ജില്ലയില് ഒരാള് ഒഴികെയുള്ള എല്ലാവരും ലോക്സഭാ തെരഞ്ഞെടുപ്പില് മത്സരിക്കുന്നു എന്നതാണ് കൗതുകകരമാകുന്ന മറ്റൊരു കാര്യം. എംപിമാരും - എംഎല്എമാരും തമ്മിലാകും ഇവിടെ പോരാട്ടം നടക്കുക. പത്തനംതിട്ടയിലെ മത്സരത്തില് ഇടതുപക്ഷം സ്ഥാനാര്ത്ഥികളാക്കുന്ന നാല് എംഎല്എ മാരില് രണ്ടുപേര് പത്തനംതിട്ട ജില്ലയിലാണ്.
ആറന്മുള മണ്ഡലത്തിലെ എംഎല്എ യായ മുന് മാധ്യമപ്രവര്ത്തക വീണാജോര്ജ്ജിനെയാണ് സിപിഎം പത്തനംതിട്ട ലോക്സഭാ മണ്ഡലത്തില് മത്സരിപ്പിക്കാന് ആലോചിക്കുന്നത്. ഇടതുപക്ഷത്തെ മറ്റൊരാള് ജില്ലയിലെ അടൂര് മണ്ഡലത്തെ നിയമസഭയില് പ്രതിനിധികരിക്കുന്ന ചിറ്റയം ഗോപകുമാറാണ്. കോട്ടയവും കൊല്ലവും ആലപ്പുഴയും ചേരുന്ന മാവേലിക്കര മണ്ഡലത്തില് ചിറ്റയം ഗോപകുമാറും കൊടിക്കുന്നില് സുരേഷും തമ്മില് ഏറ്റുമുട്ടും. പത്തനംതിട്ടയിലും മാവേലിക്കരയിലും എംപിയും എംഎല്എ യും തമ്മിലുള്ള പോരാട്ടമാകും നടക്കുക.
ജില്ലയില് നിന്നുള്ള മൂന്നാമത്തെ എംഎല്എയെ വിന്യസിപ്പിക്കുന്നത് യുഡിഎഫ് ആണ്. കോന്നി എംഎല്എ അടൂര് പ്രകാശിനെ ആറ്റിങ്ങലില് മത്സരിപ്പിക്കാന് കോണ്ഗ്രസ് ആലോചിക്കുന്നുണ്ട്. കെ.പി.സി.സി. നേതൃത്വത്തില് ആലോചന സജീവമാണ്. എം.എല്.എ.മാര് മത്സരിക്കേണ്ടെന്നാണ് ഹൈക്കമാന്ഡ് നിര്ദേശം തടസ്സമാണെങ്കിലും അടൂര് പ്രകാശിന്റെ കാര്യത്തില് ഇളവ് അനുവദിക്കുമെന്നാണ് സംസ്ഥാന നേതൃത്വം കരുതുന്നത്. അടൂര് പ്രകാശ് മത്സരിച്ചാല് ആറ്റിങ്ങലിലും എംപി - എംഎല്എ പോരാട്ടം നടക്കും.
പത്തനംതിട്ട മണ്ഡലത്തില് മത്സരിക്കാന് ജനപക്ഷം ചെയര്മാന് പി.സി. ജോര്ജും രംഗത്തുള്ളതായിട്ടാണ് സൂചന. പത്തനംതിട്ട ലോക് സഭാ മണ്ഡലത്തിലുള്പ്പെട്ട പൂഞ്ഞാറിലെ എം.എല്.എ.യായ പി.സി. ജോര്ജ് കൂടി മത്സരിച്ചാല് എംഎല്എ മാരുടെ എണ്ണം നാലാകും.
ശബരിമല ഉള്പ്പെടുന്ന മണ്ഡലത്തില് വിശ്വാസവും കോടതി വിധിയുമൊക്കെ തന്നെയാണ് പ്രധാന ചര്ച്ച. 2009ല് രൂപം കൊണ്ട മണ്ഡലത്തില് തുടര്ച്ചയായി രണ്ട് ജയം നേടിയ യു.ഡി.എഫിന് അത് നിലനിര്ത്തണം. ഇടതുമുന്നണി നിയമസഭാ തിരഞ്ഞെടുപ്പിലെ മുന്നേറ്റം പാര്ലമെന്റിലും പ്രതീക്ഷിക്കുന്നു. ശബരിമല വിഷയം തുണയാകുമെന്ന പ്രതീക്ഷയില് വിജയസാധ്യതയുള്ള എ ക്ളാസ്സ് മണ്ഡലമായി പത്തനംതിട്ടയെ ബിജെപിയും പരിഗണിക്കുന്നുണ്ട്. കരുത്തരായ സ്ഥാനാര്ത്ഥികളില് ഒരാളാകും ബിജെപിയ്ക്ക് വേണ്ടി കളത്തിലിറങ്ങുക.
2014ല് തുടര്ച്ചയായി രണ്ടാം വിജയം നേടിയെങ്കിലും യു.ഡി.എഫ്. സ്ഥാനാര്ഥി ആന്റോ ആന്റണിക്ക് ഭൂരിപക്ഷം കുറഞ്ഞിരുന്നു. 2009ല് ഒന്നരലക്ഷം വോട്ടുകളുടെ ഭൂരിപക്ഷം നേടിയ ആന്റോയുടെ മേല്ക്കൈ 2014ല് അരലക്ഷമായി കുറഞ്ഞു. ഡി.സി.സി. മുന് പ്രസിഡന്റ് പീലിപ്പോസ് തോമസിനെയാണ് ഇടതുപക്ഷം ഉപയോഗിച്ചത്. ബി.ജെ.പി. സ്ഥാനാര്ഥി എം.ടി. രമേശ് 1.38 ലക്ഷം വോട്ട് നേടി. എന്നാല് 2016ലെ നിയമസഭാ തിരഞ്ഞെടുപ്പില് യു.ഡി.എഫിന് ജില്ല നല്കിയത് വലിയ തിരിച്ചടി ആയിരുന്നു. പാര്ലമെന്റ് തിരഞ്ഞെടുപ്പില് ഏഴ് അസംബ്ലി മണ്ഡലങ്ങളിലും മുന്നേറിയ യു.ഡി.എഫിന് നിയമസഭയില് വിജയം നിലനിര്ത്താന് കഴിഞ്ഞത് രണ്ടിടത്തുമാത്രം.
നാലിടത്ത് ഇടത് സ്ഥാനാര്ത്ഥികള് ജയിച്ചപ്പോള് എല്ലാവരേയും മറിച്ച് പൂഞ്ഞാറില് സ്വതന്ത്രനായ പി.സി. ജോര്ജ് ജയം നേടി. ശബരിമല തന്നെയാകും പത്തനംതിട്ടയുടെ ഹൈലൈറ്റെന്നാണ് വിലയിരുത്തല്. വിശ്വാസികള്ക്ക് ഒപ്പം നിന്നു എന്നതാകും യുഡിഎഫും ബിജെപിയും ഉയര്ത്തിക്കാട്ടുക. എന്നാല് കോടതിവിധിയെ മാനിച്ചു എന്നതും ശബരിമലയ്ക്ക് കാര്യമായ ബജറ്റ് വിഹിതം അനുവദിക്കുകയും ചെയ്ത സംസ്ഥാന സര്ക്കാരിനെ ഉയര്ത്തിക്കാട്ടുകയാണ് ഇടത് മുന്നണി. . നായര്, ഈഴവ സമുദായങ്ങള്ക്കും ഓര്ത്തഡോക്സ്, മാര്ത്തോമ സഭകള്ക്കും നിര്ണായക സ്വാധീനമുള്ള മണ്ഡലത്തില് ഇവരാകും വിധി നിര്ണ്ണയിക്കുക.
സിറ്റിങ് എം.പി.മാര് വീണ്ടും മത്സരിക്കാന് തീരുമാനിച്ചാല് ആന്റോ ആന്റണി തന്നെയാകും യു.ഡി.എഫ്. സ്ഥാനാര്ഥി. പക്ഷേ, പത്തനംതിട്ട ജില്ലയിലുള്ളവര് വേണമെന്ന വാദം ഡി.സി.സി.ക്കുള്ളില് ഉയര്ന്നിട്ടുണ്ട്. ഡി.സി.സി. മുന് പ്രസിഡന്റ് പി. മോഹന്രാജ്, പി.ജെ. കുര്യന് തുടങ്ങിയവരുടെ പേരുകളാണ് ഉയര്ന്നു വരുന്നത്. ബി.ജെ.പി.യില് സംസ്ഥാനാധ്യക്ഷന് പി.എസ്. ശ്രീധരന് പിള്ള മുന്നോട്ട് വെച്ച പേരുകളില് ഒന്ന് സംസ്ഥാന സെക്രട്ടറി കെ. സുരേന്ദ്രന്റേതായിരുന്നു. അല്ഫോന്സ് കണ്ണന്താനത്തിന്റെ പേരും കേള്ക്കുന്നുണ്ട്.
2014 ല് 3,58,842 വോട്ടുകള് നേടിയായിരുന്നു ആന്റോ ആന്റണി വിജയം നേടിയത്. ഇടതു സ്വതന്ത്രനായ പീലിപ്പോസ് തോമസ് 3,02,651 വോട്ടുകള് നേടിയപ്പോള് 1,38,954 വോട്ടുകളായിരുന്നു എംഡി രമേശ് നേടിയത്. 6,98,718 സ്ത്രീകളും 6,41,473 പുരുഷന്മാരും രണ്ടു ട്രാന്സ്ജെന്ഡര് 7137 പുതിയ വോട്ടര്മാരും ചേരുമ്പോള് പത്തനംതിട്ടയില് ആകെ വോട്ടര്മാര് 13,40,193 പേരാകും.
