മലയാളസിനിമയിലെ സിനിമ പ്രേമികളും പ്രവര്ത്തകരും ഏറെ നെഞ്ചിലേറ്റിയ ഒന്നാണ് ഉദയ സ്റ്റുഡിയോ. എന്നാല് ഇനി ആ ഉദയാ സ്റ്റുഡിയോ ഇല്ല. സ്റ്റുഡിയോ പൊളിച്ചു നീക്കിക്കൊണ്ടിരിക്കുകയാണ്. കല്യാണ മണ്ഡപമാണ് ഇനി സ്റ്റുഡിയോയുടെ സ്ഥാനത്ത് ഉയരുക. സ്റ്റുഡിയോ വളപ്പില് ഉണ്ടായിരുന്ന കന്യാമറിയത്തിന്റെ രൂപം കഴിഞ്ഞ ദിവസം നീക്കി. ഉദയയുടെ ലോഗോയായ ഭൂഗോളത്തിന്റെ മുകളിലുള്ള പീവന് കോഴിയുടെ പ്രതിമ നേരത്തെ തന്നെ നീക്കിയിരുന്നു.
പലയാളുകളുടെ കൈമറിഞ്ഞ് ഒടുവില് സ്റ്റുഡിയോ ഇപ്പോള് ആലപ്പുഴ സ്വദേശിയുടെ ഉടമസ്ഥതയിലാണ്. സീരിയല് ചിത്രീകരണത്തിനും മറ്റുമായി സ്റ്റുഡിയോ വാടകയ്ക്ക് നല്കി വരികയായിരുന്നു.
നിര്മ്മാതാവും സംവിധായകനുമായ കുഞ്ചാക്കോയും വിതരണക്കാരനായ കെവി ജോഷിയും ചേര്ന്നാണ് 1947ല് പാതിരപ്പള്ളിയില് ഉദയ സ്റ്റുഡിയോ സ്ഥാപിച്ചത്. ശവക്കോട്ടപ്പാലത്തിനടുത്തുള്ള കുടുംബവക കയര്ഫാക്ടറി നോക്കി നടത്താനും അബ്കാരി ബിസിനസില് ശ്രദ്ധകേന്ദ്രീകരിക്കാനുമായിരുന്നു കുട്ടനാട്ടുകാരനായ കുഞ്ചാക്കോ ആലപ്പുഴയിലെത്തിയത്. എന്നാല് പിന്നീട് സിനിമാക്കാരന് ആലപ്പി വിന്സന്റ് അടുത്തു. സഹായത്തിന് മുന്മന്ത്രി ടി വി തോമസിന്റെ സഹായം തേടി.
ഒടുവില് ആലപ്പുഴ ലത്തീന് പള്ളിക്ക് സമീപം വാടകക്കെട്ടിടത്തില് ഉദയാ പിക്ചേഴ്സ് ആരംഭിച്ചെങ്കിലും സാമ്പത്തിക പ്രതിസന്ധിമൂലം മുന്നോട്ടുപോകാനായില്ല. അങ്ങനെയാണ് അവര് കുഞ്ചാക്കോയെ ഈ പാതയിലേക്കുകൊണ്ടുവന്നത്. പാതിരപ്പള്ളിയിലെ കുഞ്ചാക്കോയുടെ 35 ഏക്കറില് 1947ലെ ക്രിസ്മസ് ദിനത്തിലാണ് ഉദയയ്ക്ക് തറക്കല്ലിട്ടത്.
