ബെംഗലൂരു: കര്ണാടകയിലെ തദ്ദേശ സ്വയം ഭരണ സ്ഥാപനങ്ങളില് നടന്ന തെരഞ്ഞെടുപ്പില് വന് വിജയം നേടി കോണ്ഗ്രസ്സ്. ഫലം പുറത്തു വന്നതു പ്രകാരം കോണ്ഗ്രസ്സ് 508 വാര്ഡിലും ജെ.ഡി.എസ് 173 സീറ്റിലും ബി.ജെ.പി 366 വാര്ഡുകളിലുമാണ് ജയിച്ചത്. ലോക്സഭാ തെരഞ്ഞെടുപ്പ് ഫലം വന്നതിനു തൊട്ടു പിന്നാലെയായിരുന്നു കര്ണാടകയില് തദ്ദേശ സ്വയം ഭരണ സ്ഥാപനങ്ങളിലേക്ക് തെരഞ്ഞെടുപ്പ് നടന്നത്.
ലോക്സഭാ തെരഞ്ഞെടുപ്പിലേറ്റ കനത്ത തിരിച്ചടി സംസ്ഥാനത്തെ സഖ്യ സര്ക്കാരിന്റെ നിലനില്പ്പിനു തന്നെ ഭീഷണി ഉയര്ത്തുകയാണ്. ഈ സാഹചര്യത്തിലാണ് കോണ്ഗ്രസ്സിനു താല്ക്കാലിക ആശ്വാസം പകര്ന്നുകൊണ്ട് തദ്ദേശ സ്വയംഭരണ സ്ഥാപനങ്ങളിലേക്ക് നടന്ന തെരഞ്ഞെടുപ്പിന്റെ ഫലം പുറത്ത് വന്നത്.
ആകെ 1361 വാര്ഡുകളിലേക്ക് നടന്ന തെരഞ്ഞെടുപ്പില് 1221 ഇടത്തെ ഫലം പുറത്തു വന്നപ്പോള് 508 സീറ്റുകളിലാണ് കോണ്ഗ്രസ്സ് ജയിച്ചത്. ബി.ജെ.പിക്ക് 366 സീറ്റുകളില് മാത്രമേ വിജയിക്കാന് കഴിഞ്ഞുള്ളൂ. 174 സീറ്റുകളില് ജെ.ഡി.എസ് സ്ഥാനാര്ത്ഥികളും വിജയിച്ചിട്ടുണ്ട്.
എല്ലാ സിറ്റി മുനിസിപ്പാലിറ്റികളിലും ടൗണ് മുനിസിപ്പാലിറ്റികളിലും കോണ്ഗ്രസ് മുന്നേറ്റം നടത്തിയപ്പോള് പഞ്ചായത്തുകളില് മാത്രമാണ് ബിജെപി തിളങ്ങിയത്. പുറത്തുവന്ന ഫലമനുസരിച്ച് ഫലമറിയാനുള്ള സീറ്റുകളിലും വലിയ മുന്നേറ്റമാണ് കോണ്ഗ്രസും ജെ.ഡി.എസും നടത്തുന്നത്.
