കാഞ്ചരപര: ബംഗാള് ബംഗാളികള്ക്കുള്ളതാണെന്നും ബംഗാളില് താമസിക്കുന്നവര് നിര്ബ്ബന്ധമായും ബംഗാളി സംസാരിക്കണമെന്നും മമതാ ബാനര്ജി. ബിജെപി - തൃണമൂല് കോണ്ഗ്രസ് പ്രശ്നങ്ങളും ജൂനിയര് ഡോക്ടര്മാരുടെ സമരവും കടുത്ത തലവേദന സൃഷ്ടിക്കുന്ന സാഹചര്യത്തിലാണ് ബംഗാള് മുഖ്യമന്ത്രി ബംഗാളി വാദത്തില് ശക്തമായ നിലപാട് എടുത്തത്.
ബംഗാളില് ഇപ്പോള് സമരം നടത്തുന്ന ഡോക്ടര്മാര് പുറത്തു നിന്നുള്ളവരാണെന്ന് ആരോപിക്കുകയും ചെയ്തു. ബംഗാളി ഭാഷയെ ഞങ്ങള് മുന്നിലേക്ക് കൊണ്ടുവരുമെന്ന് കാഞ്ചരപരയില് നടന്ന തൃണമൂല് പരിപാടിയില് മമത പറഞ്ഞു. ബംഗാളില് ബംഗാളി സംസാരിക്കാത്ത ആള്ക്കാരുടെ എണ്ണം കൂടുകയാണ്. താന് ബീഹാര്, യുപി, പഞ്ചാബ് എന്നിവിടങ്ങളിലെല്ലാം പോയപ്പോള് ആ ഭാഷ സംസാരിക്കേണ്ടി വന്നിരുന്നു. അതുപോലെ ബംഗാളില് താമസിക്കുന്നുണ്ടെങ്കില് ബംഗാളി പഠിക്കേണ്ടതുണ്ട്. ബംഗാളില് ക്രിമിനലുകളെ അനുവദിക്കാനോ അവര് ബൈക്കില് ചുറ്റിയടിക്കാനോ താന് സമ്മതിക്കില്ലെന്ന് മമത പറഞ്ഞു. അതേസമയം മമതയുടെ ബംഗാളി വാദം ബിജെപി മറ്റൊരായുധമാക്കി.
മമതയുടെ ബംഗാളികളും പുറത്തുള്ളവരും ബിജെപിക്കാരെ തിരിച്ചറിയാനുള്ള വിദ്യയാണെന്നാണ് ബിജെപി ആരോപിക്കുന്നത്. നേരത്തേ ബംഗാളില് ഇപ്പോള് പ്രശ്നം സൃഷ്ടിച്ചുകൊണ്ടിരിക്കുന്ന ജൂനിയര് ഡോക്ടര്മാര് പുറത്തു നിന്നുള്ളവര് ആണെന്ന് മമത ആരോപിച്ചിരുന്നു. തൃണമൂലിന്റെ കേന്ദ്രമായ നോര്ത്ത് 24 പര്ഗാനയിലെ വ്യാവസായിക മേഖലയായ കഞ്ചരപാര വരുന്ന ബരക്പൂര് ലോക്സഭാ സീറ്റ് ഇത്തവണ ബിജെപി പിടിച്ചിരുന്നു. ഭത്പാരയില് നടന്ന നിയമസഭാ ഉപ തെരഞ്ഞെടുപ്പിലും ബിജെപിയാണ് ജയിച്ചത്.
ബാരക്പോരില് നടന്ന തെരഞ്ഞെടുപ്പില് തൃണമൂലില് നിന്നും ബിജെപിയില് എത്തിയ അര്ജുന് സിംഗ് ടിഎംസിയുടെ ദിനേശ് ത്രിവേദിയെയാണ് പരാജയപ്പെടുത്തിയത്്. ഭത്പാരയില് ബിജെപിയുടെ പവന്കുമാര് സിംഗ് തൃണമൂലിന്റെ മദന് മിത്രയേയൂം തോല്പ്പിച്ചിരുന്നു. 2017 ല് ബിജെപിയിലേക്ക് കാലുമാറിയ തൃണമൂലിന്റെ അധികാരകേന്ദ്രത്തിലെ രണ്ടാമനായിരുന്ന മുകുള്റോയിയുടെ മേഖലയാണ് കഞ്ചരപാര. ബിജ്പൂരിലെ എംഎല്എയായ മകന് ശുഭരംഗ്ശു ആണ് ലോക്സഭാ തെരഞ്ഞെടുപ്പിന് പിന്നാലെ ആദ്യം ബിജെപിയില് ചേര്ന്നത്.
ജൂട്ട് മില്ലുകളില് ജോലി ചെയ്യുന്ന ഹിന്ദി സംസാരിക്കുന്ന ആള്ക്കാരോടാണ് ബരക്പൂര് എംപിയ്ക്ക് കൂടുതല് ചായ്വ് എന്നും മമത ആരോപിച്ചു. ഗുജറാത്തില് നിന്നും മഹാരാഷ്ട്രയില് നിന്നും വഴി തിരഞ്ഞ ബീഹാറികളാണ് ഇവിടെ നിറയെ. അതേസമയം ബീഹാറില് നിന്നും ബീഹാറികളെയോ ഉത്തര്പ്രദേശില് നിന്നും അവിടുത്തെ മണ്ണിന്റെ മക്കളെയോ പുറത്താക്കാന് കഴിയുമോ എന്ന് ചോദിച്ച മമത ബംഗാളില് കഴിയുന്നവര് ഈ ഭാഷയേയും ഈ മണ്ണിനെയും സംസ്ക്കാരത്തെയും സ്നേഹിക്കണം എന്നും പറഞ്ഞു.
