ബോളിവുഡിന്റെ പ്രിയതാരം സൈറ വസീം അഭിനയം നിര്ത്തുന്നുവെന്ന വാര്ത്ത ആരാധകരെ ഞെട്ടിക്കുന്നതായിരുന്നു. തന്റെ സോഷ്യല്മീഡിയ അക്കൗണ്ടിലൂടെ സൈറ തന്നെയാണ് ഇക്കാര്യം ഏവരെയും അറിയിച്ചത്. അഞ്ച് വര്ഷത്തെ തന്റെ അഭിനയ ജീവിതത്തില് വിരാമമിടുകയാണെന്നും സിനിമാരംഗത്ത് കടന്നുവന്നതിന് ശേഷം ജീവിതം മറ്റൊന്നായെന്നും, അജ്ഞത കൊണ്ട് വിശ്വാസത്തില് നിന്നും അകന്നെന്നുമാണ് സൈറ വസീം പോസ്റ്റില് പറഞ്ഞത്. സൈറയുടെ ഈ നിലപാടിനെ വിമര്ശിച്ച് നിരവധി താരങ്ങളാണ് രംഗത്ത് വന്നത്.
സൈറ കടന്നു പോയ പ്രശ്നങ്ങളിലൂടെ താനും കടന്നു പോയിട്ടുണ്ടെന്ന് തുറന്നു പറയുകയാണ് നടി നഫീസ അലി. 1976ലെ ഫെമിന മിസ് ഇന്ത്യ, മിസ് ഇന്റര്നാഷണല് സെക്കന്റ് റണ്ണര് അപ്, ദേശീയ നീന്തല്താരം, രാഷ്ര്ടീയ പ്രവര്ത്തക എന്നീ നിലയില് പ്രശസ്തയാണ് നഫീസ. മമ്മൂട്ടി നായകനായ അമല് നീരദ് ചിത്രം ബിഗ് ബിയിലെ മേരി ടീച്ചറായി മലയാളികളുടെ ഇഷ്ടം നേടാനും നഫീസയ്ക്ക് സാധിച്ചു. തന്റെ ഇന്സ്റ്റാഗ്രാമിലൂടെയാണ് നഫീസ തന്റെ ഭൂതകാലത്തെ കുറിച്ച് എഴുതിയത്.
'' ഇത് പുതിയ ഞാനാണ്. പ്രായമേറി, മുടിയെല്ലാം നരച്ച്, കൂടുതല് പോസിറ്റീവ് ആയ ഞാന്. സൈറ വസീമില് ഇരുപതുവയസ്സുകാരിയായിരുന്ന എന്നെ തന്നെയാണ് ഞാന് കാണുന്നത്. അപ്പോള് മുതല് എഴുതണമെന്നു തോന്നിയതാണ്. നിങ്ങളുടെ ജോലി എന്നത് നിങ്ങളുടെ സ്വാതന്ത്ര്യമാണ്. പുതു തലമുറ ഒരുപാട് പ്രശ്നങ്ങള് അഭിമുഖീകരിക്കുന്നുണ്ട്. ഒരു തീരുമാനമെടുക്കുന്നുണ്ടെങ്കില് അത് ശരിയായ തീരുമാനമാണെന്ന് ചിന്തിച്ച് ഉറപ്പു വരുത്തണം. കാരണം, ഞാനെപ്പോഴും പഴയകാലത്തെക്കുറിച്ചോര്ക്കാറുണ്ട്. അച്ഛനെ മാത്രം അനുസരിക്കാതെ സ്വന്തം മനസ് പറയുന്നതു കൂടി ശ്രദ്ധിക്കാമായിരുന്നെന്ന് എപ്പോഴും ചിന്തിക്കാറുണ്ട്.'' നഫീസ കുറിച്ചു.
