തിരുവനന്തപുരം: യൂണിവേഴ്‌സിറ്റി കോളജ് കാമ്പസിലെ അക്രമസംഭവങ്ങളിലെ പ്രതികള്‍ പി.എസ്.സി നടത്തിയ പോലീസ് കോണ്‍സ്റ്റബിള്‍ പരീക്ഷയില്‍ റാങ്ക് ലിസ്റ്റില്‍ ഉള്‍പ്പെട്ടതില്‍ അന്വേഷണം നടത്തുമെന്ന് പി.എസ്.സി ചെയര്‍മാന്‍ എം.കെ സക്കീര്‍. പ്രതികള്‍ റാങ്ക് ലിസ്റ്റില്‍ ഉള്‍പ്പെടാനിടയായ സാഹചര്യം പി.എസ്.സി വിജിലന്‍സ് അന്വേഷിക്കും. ഒരു മാസത്തിനുള്ളില്‍ റിപ്പോര്‍ട്ട് സമര്‍പ്പിക്കണം. അതുവരെ മൂന്നു പ്രതികളുടെയും അഡൈ്വസ് മെമ്മോ തടഞ്ഞുവയ്ക്കുമെന്നും ചെയര്‍മാന്‍ അറിയിച്ചു.
റാങ്ക് ലിസ്റ്റില്‍ ഉള്‍പ്പെട്ട പ്രതികളായ ശിവരഞ്ജിത്, നിസാം, എസ്.എഫ്.ഐ നേതാവ് പ്രണവ് എന്നിവരുടെ മെമ്മോ ആണ് തടഞ്ഞുവയ്ക്കുക. പ്രതികള്‍ക്ക് പരീക്ഷാകേന്ദ്രം അനുവദിച്ചതില്‍ ക്രമക്കേട് നടന്നിട്ടില്ലെന്നും ചെയര്‍മാന്‍ പറഞ്ഞു. കാസര്‍ഗോഡ് ബറ്റാലിയനിലേക്കുള്ള നിയമനത്തിന് പരീക്ഷാകേന്ദ്രമായി പ്രതികള്‍ ആവശ്യപ്പെട്ടിരുന്നത് തിരുവനന്തപുരമായിരുന്നു. അവര്‍ക്ക് തിരുവനന്തപുരത്ത് പരീക്ഷാകേന്ദ്രം അനുവദിച്ചതും വിവാദമായിരുന്നു.
പി.എസ്.സിയുടെ വിശ്വാസ്യത തകര്‍ക്കുന്ന പ്രചാരണങ്ങള്‍ നടത്തരുതെന്നും പി.എസ്.സി ചെയര്‍മാന്‍ അഭ്യര്‍ത്ഥിച്ചു.
Comments