ബംഗലുരു: വിശ്വാസവോട്ടെടുപ്പുമായി ബന്ധപ്പെട്ട് സര്ക്കാര് താഴെ വീഴാതിരിക്കാന് കിണഞ്ഞു പരിശ്രമിക്കുന്നതിനിടയില് പ്രതിപക്ഷത്തെ ഒതുക്കാന് ബൈബിളിലെ 'അന്ത്യവിധി' യെ ഉദ്ധരിച്ച് കര്ണാടകാ മുഖ്യമന്ത്രി എച്ച് ഡി കുമാരസ്വാമി. വിശ്വാസ വോട്ടെടുപ്പ് സംബന്ധിച്ച ചര്ച്ചകള് രണ്ടാം ദിവസത്തിലേക്ക് കടന്നിരിക്കെ കര്ണാടക ഇപ്പോള് ഭരിക്കുന്നത് ദൈവദത്തമായി ഉണ്ടായ സര്ക്കാരാണെന്നും ഇതിനോട് എന്തെങ്കിലൂം ചെയ്താല് അതില് ദൈവത്തിന്റെ ഇടപെടല് ഉണ്ടാകുമെന്നും അന്ത്യവിധിക്ക് നില്ക്കുമ്പോള് ചെയ്യുന്നതിനെല്ലാം ബിജെപികാര് കണക്ക് പറയേണ്ടി വരുമെന്നും കുമാരസ്വാമി പ്രതിപക്ഷത്തിന് മുന്നറിയിപ്പ് നല്കി.
ഭരണകക്ഷിയായ ജെഡിഎസ് - കോണ്ഗ്രസ് സഖ്യത്തിലെ എംഎല്എ മാരെ ബിജെപി വളഞ്ഞ വഴി ഉപയോഗിച്ച് പിടിച്ച് സര്ക്കാരിനെ മറിച്ചിടാനുള്ള ശ്രമം നടത്തുന്നതിനെ വ്യംഗ്യമായി പരാമര്ശിക്കുകയായിരുന്നു. ജീവിതത്തില് എല്ലാവര്ക്കും കണക്കുപറയാന് ഒരു ദിവസം വരും. ദൈവത്തിന്റെ മുന്നില് ന്യായവിധിക്ക് നില്ക്കുമ്പോള് ജീവിതമാണ് അവിടെ വിചാരണ ചെയ്യപ്പെടുക. അപ്പോള് അഭിഭാഷകനോ കള്ളത്തരങ്ങളോ തുണയായി ഉണ്ടാകില്ലെന്ന് കുമാരസ്വാമി പറഞ്ഞു. നേരത്തേ നിയമസഭയിലെ പ്രസംഗത്തില് താന് സാഹചര്യം കൊണ്ടു മുഖ്യമന്ത്രി കസേരയില് ഇരിക്കേണ്ടി വന്ന ഒരു കൊച്ചു കുട്ടി മാത്രമാണെന്നും മന്ത്രിക്കസേര ദൈവത്തിന്റെ ദാനമാണെന്നും കുമാരസ്വാമി പറഞ്ഞിരുന്നു.
അത് എടുത്തുമാറ്റാനാണ് ദൈവം തീരുമാനിക്കുന്നതെങ്കില് അങ്ങിനെ സംഭവിക്കട്ടെ. ഇത് വിധിയുടെ കളിയുടെ ഒരു ഭാഗം മാത്രമാണെന്നും പറഞ്ഞു. ജേഷ്ഠന് രേവണ്ണയുടെ കൂടോത്രമാണ് സര്ക്കാരിനെ പിടിച്ചു നിര്ത്തിയിരിക്കുന്നതെന്ന ആരോപണത്തിനും കുമാരസ്വാമി മറുപടി പറഞ്ഞു. ജേഷ്ഠന് ദൈവത്തെ കാണാതെ ദിവസം ആരംഭിക്കുന്നയാളല്ലെന്നായിരുന്നു കുമാരസ്വാമി പറഞ്ഞത്.
മഹാലക്ഷ്മി ക്ഷേത്രത്തില് പോയപ്പോള് പൂജാരി നല്കിയ ഏലയ്ക്കാ മാല കഴുത്തിലിട്ടാണ് അദ്ദേഹം എത്തിയത്്. ആഞ്ജനേയന്റേയോ കാളിയുടെയോ ക്ഷേത്രത്തിലാണ് അദ്ദേഹം പതിവായി പോകാറുള്ളത്. ഇവിടെ നിന്നും നാരങ്ങായും മറ്റും പ്രസാദമായി കിട്ടാറുണ്ട്. ഇതൊക്കെ കൊണ്ടായിരിക്കും ആരോപണം വരാന് കാരണം. എന്നാല് ബിജെപി എംഎല്എ മാരും ക്ഷേത്രത്തില് പോകാറില്ലെ എന്നും? അവിടെ നിന്നും ഇതേ പ്രസാദം തന്നെയല്ലേ അവര്ക്കും കിട്ടുന്നത്. പക്ഷേ താനോ തന്റെ കുടുംബമോ ഇത്തരം ആരോപണം ഉന്നയിക്കുന്നില്ലല്ലോ. അതിന് കാരണം തങ്ങള് ദൈവത്തെ ഭയപ്പെടുന്നത് കൊണ്ടാണെന്നും എച്ച് ഡി കുമാരസ്വാമി നിയമസഭയില് നടത്തിയ പ്രസംഗത്തില് പറഞ്ഞു.
