1987ല് ആയിരുന്നു നടി മേനകയും നിര്മ്മാതാവായ സുരേഷ് കുമാറും തമ്മിലുള്ള വിവാഹം. പൂച്ചക്കൊരു മൂക്കുത്തി എന്ന സിനിമയുടെ രണ്ടാം ഷെഡ്യൂള് നടക്കുമ്പോഴാണ് ഇരുവരും പ്രണയത്തിലായത്. എന്നാല് മേനക സുരേഷിനെ കാണുന്നതിന് മുന്പ് തന്നെ തന്റെ ചിത്രത്തിലെ നായികയാക്കാന് സുരേഷ് മേനകയുടെ വീട്ടില് എത്തിയിരുന്നു.
മേനക സിനിമയില് എത്തുന്നതിന് മുന്പ് കരയൈ തൊടാത്ത അലൈകള് എന്ന സിനിമയെ കുറിച്ച് സംസാരിക്കാന് മേനകയുടെ വീട്ടില് പ്രിയദര്ശനും സുരേഷും പോയിരുന്നു. കഥ ഇഷ്ടപ്പെട്ട മേനകയുടെ പിതാവ് 500 രൂപ അഡ്വാന്സും വാങ്ങി. എന്നാല് കഥാപാത്രത്തോട് മേനകയ്ക്ക് ഇഷ്ടം തോന്നാതിരുന്നതിനാല് ആ ചിത്രം ചെയ്തില്ല. പനിപിടിച്ച് അകത്തെ മുറിയില് കിടക്കുകയായിരുന്ന മേനക അന്ന് സുരേഷിനെ കണ്ടില്ല. വെള്ളം കുടിക്കാന് അടുത്ത മുറിയിലെത്തിയ മേനകയെ സുരേഷ് കണ്ടു.
എന്റെ മോഹങ്ങള് പൂവണിഞ്ഞു എന്ന സിനിമയുടെ സെറ്റില് വച്ചാണ് സുരേഷ് ആദ്യമായി മേനകയെ കാണുന്നത് എന്നായിരുന്നു മേനക കരുതിയിരുന്നത്. പിന്നീടാണ് മുന്പ് തന്നെ സുരേഷ് കണ്ടിരുന്നുവെന്ന് മേനക മനസിലാക്കുന്നത്. ആദ്യമായി എടുക്കാന് തീരുമാനിച്ച പടത്തിന് നായികയായി നിന്നെ തേടിയതാണ്. ഈ പടം കരതൊട്ടില്ലെങ്കിലും അവസാനം നീയെന്റെ നായികയായെന്ന് സുരേഷ് പിന്നീട് മേനകയോട് പറയുമായിരുന്നു.
