അതിരുകളില്ലാത്ത താരാരാധനയുടെ ഭ്രമത്തില് തെന്നിന്ത്യന് താരം കാജല് അഗര്വാളിന്റെ ആരാധകനില് നിന്നും തട്ടിപ്പു സംഘം മുക്കിയത് 60 ലക്ഷം. കാജലിന്റെ കടുത്ത ആരാധകനായ രാമനാഥപുരം കാരനായ യുവാവില് നിന്നുമാണ് അരക്കോടിയില് അധികം തട്ടിയത്. താരത്തെ കാണാനും സംസാരിക്കാനും അവസരം സൃഷ്ടിക്കാമെന്നു വാഗ്ദാനം ചെയ്ത് പല ഘട്ടങ്ങളിലായി പണം വാങ്ങുകയായിരുന്നു.
താരത്തിനെ കാണാനുള്ള അദ്യമമായ ആഗ്രഹത്തില് തട്ടിപ്പുകാര് ആദ്യം യുവാവില് നിന്നും 50,000 രൂപയും നഗ്നഫോട്ടോകള് ഉള്പ്പെടെയുള്ള വ്യക്തി വിവരങ്ങളും വാങ്ങി. വന് പണക്കാരനായിരുന്നതിനാല് പണവും ആവശ്യപ്പെട്ട കാര്യങ്ങളും ആരാധകന് നല്കി. പിന്നീട് പല തവണ യുവാവില് നിന്നും സംഘം വീണ്ടും വീണ്ടും പണം ആവശ്യപ്പെട്ടുകൊണ്ടിരുന്നു. പണം നല്കുന്നതല്ലാതെ കാജലിനെ കാണുന്നതുമായി ബന്ധപ്പെട്ട കാര്യമൊന്നും പിന്നീട് സംഘം പറയാതിരുന്നതോടെ താന് വഞ്ചിക്കപ്പെടുകയാണെന്ന കാര്യം യുവാവിന് ബോധ്യമായി.
തട്ടിപ്പ് ബോദ്ധ്യപ്പെട്ടതോടെ വീണ്ടും പണം ചോദിച്ചപ്പോള് യുവാവ് നിരസിച്ചു. പണം കിട്ടാതായതോടെ സംഘം ഭീഷണി മുഴക്കാന് തുടങ്ങി. യുവാവിന്റെ അശ്ളീല ചിത്രങ്ങള് തങ്ങളുടെ കൈവശം ഉണ്ടെന്നും പണം തന്നില്ലെങ്കില് അവ ഇന്റര്നെറ്റില് പ്രസിദ്ധപ്പെടുത്തും എന്നും ഭീഷണിപ്പെടുത്താന് തുടങ്ങി. ഇതിനിടയില് മാനസീക സമ്മര്ദ്ദം താങ്ങാന് കഴിയാതെ യുവാവ് വീട്ടില് നിന്നും ഒളിച്ചോടി. യുവാവിനെ കാണാതായതോടെ അന്വേഷണം നടത്തിയ പോലീസ് കൊല്ക്കത്തയില് നിന്നും കണ്ടെത്തിയപ്പോഴാണ് തട്ടിപ്പിന്റെ വിവരം പുറത്തു വന്നത്.
തട്ടിപ്പിന്റെ വീവരമെല്ലാം പോലീസിനോട് പറഞ്ഞ യുവാവ് മൂന്ന് ഘട്ടങ്ങളായി തന്റെ പക്കല് നിന്നും സംഘം 60 ലക്ഷം രൂപ തട്ടിച്ചെന്നാണ് പറഞ്ഞത്. ആരാധകന് നല്കിയ പരാതിയില് നിര്മ്മാതാവ് ശരവണ്കുമാറിനെ പോലീസ് കസ്റ്റഡിയില് എടുത്തിരിക്കുകയാണ്.
