ജയ്പൂര്: രാജസ്ഥാനിലെ ആള്വാറില് പെഹ്ലു ഖാന് എന്നയാളെ ആള്കൂട്ടം മര്ദ്ദിച്ചുകൊന്ന കേസില് ആറു പ്രതികളേയും വെറുതെവിട്ടു. ആള്വാര് കോടതിയിലേതാണ് വിധി. കേസിലെ പ്രതികളില് ആറു പേരെ ആള്വാര് കോടതിയിലും പ്രായപൂര്ത്തിയാകാത്ത മൂന്നുപേരെ ജുവനൈല് കോടതിയിലുമാണ് വിചാരണ ചെയ്തത്.
പ്രതികളെ വെറുതെ വിട്ടതായി പ്രഹ്ലു ഖാന്റെ കുടുംബത്തിന് നിയമ സഹായം നല്കിയിരുന്ന ഖാസിം ഖാന് പറഞ്ഞു. സംഭവവുമായി ബന്ധപ്പെട്ട വിഡിയോയുടേയും മറ്റ് തെളിവുകളുടേയും അടിസ്ഥാനത്തിലാണ് പോലീസ് പ്രതികളെ അറസ്റ്റ് ചെയ്തത്. വിപിന് യാദവ്, രവീന്ദ്ര കുമാര്, കുല്റാം, ദയാറാം,യോഗേഷ് കുമാര്, ഭീം റാഠി എന്നിവരായിരുന്നു കേസിലെ പ്രതികളായിരുന്നത്.
പെഹ്ലു ഖാനെ അടിച്ചു അവശനാക്കുന്ന ദൃശ്യങ്ങള് അക്രമികള് മൊബൈലില് പകര്ത്തി പ്രചരിപ്പിച്ചിരുന്നു. ജയ്പൂരിലെ മേളയില് നിന്ന് കന്നുകാലികളെ വാങ്ങി ഹരിയാനയിലേക്ക് കൊണ്ടുപോകുകയായിരുന്നു പെഹ്ലു ഖാനും മക്കളുമടങ്ങുന്ന ആറംഗ സംഘം. അല്വാറിലെ ഹൈവേയില് വച്ചാണ് അക്രമികള് ഇവരെ തടഞ്ഞതും ആക്രമിച്ചതും. ആശുപത്രിയില് വച്ചാണ് പെഹ്ലു ഖാന് മരിച്ചത്.
രാജസ്ഥാനില് ബിജെപി ഭരണത്തിലുള്ള വേളയിലാണ് സംഭവങ്ങള് അരങ്ങേറിയത്. മാത്രമല്ല, പെഹ്ലു ഖാന്റെ മൊഴിയില് പറയുന്നവര്ക്കെതിരെ തെളിവില്ലെന്ന് പോലീസ് വ്യക്തമാക്കിയതും അന്നാണ്. ഇതിനെതിരെ ദേശീയ തലത്തില് വന് പ്രതിഷേധമുയര്ന്നിരുന്നു. കേസ് വീണ്ടും അന്വേഷിക്കുന്ന കാര്യം പരിഗണിക്കുമെന്ന് പിന്നീട് അധികാരത്തിലെത്തിയ കോണ്ഗ്രസ് ഭരണകൂടം വ്യക്തമാക്കിയിരുന്നു.
പെഹ്ലു ഖാനെ അക്രമികള് വളഞ്ഞു നിന്ന് മര്ദ്ദിക്കുന്ന വിഡിയോ ദൃശ്യം വൈറലായിരുന്നു. ഈ ദൃശ്യങ്ങള് പരിശോധിച്ചാണ് പോലീസ് പ്രതികളെ പിടികൂടിയത്. ആള്കൂട്ട കൊലപാതകത്തിനെതിരെ രാജസ്ഥാന് നിയമസഭ അടുത്തിടെ നിയമം പാസാക്കിയിരുന്നു. ജാമ്യമില്ലാ വകുപ്പ് പ്രകാരമാണ് കേസെടുക്കുക. ജീവപര്യന്തം തടവും അഞ്ച് ലക്ഷം രൂപ പിഴയും ഈടാക്കുമെന്നും പുതിയ നിയമത്തില് പറയുന്നു.
