കൊച്ചി: സിറോ മലബാര് സഭ സിനഡിലേക്ക് പ്രതിഷേധവുമായി എത്തുമെന്ന മുന്നറിയിപ്പുമായി എറണാകുളം അങ്കമാലി അതിരൂപത അല്മായ മുന്നേറ്റം. അതിരൂപത അല്മായ മുന്നേറ്റം സിനഡിന് നല്കിയ നിവേദനവുമായ ബന്ധപ്പെട്ട് വ്യാഴാഴ്ച സിനഡ് നിയോഗിച്ച മെത്രാന്മാരുമായി ചര്ച്ച നടത്തി. നിവേദനത്തിലെ ആവശ്യങ്ങള് നടപ്പില് വരുത്തണമെന്നും അതിനു രേഖാമൂലം ഉറപ്പ് ലഭിക്കണമെന്നും അല്മായ പ്രതിനിധികള് ആവശ്യപ്പെട്ടു.
സിനഡിന്റെ നിലപാടിന് വിരുദ്ധമായി പോലീസിന് പരാതി നല്കിയ ഐ ടി മിഷന് ഡയറക്ടര് ഫാ.ജോബി മാപ്രാകാവിലിനെ സ്ഥാനത്തുനിന്നു മാറ്റണമെന്നും അല്മായ മുന്നേറ്റം ആവശ്യപ്പെട്ടു. ഫെറോന തലത്തില് പ്രതിനിധികള് കൂരിയയ്ക്ക് നല്കിയ നിവേദനത്തില് ഏഴു ദിവസത്തിനകം മറുപടി നല്കണമെന്നാണ് ആവശ്യം ഉന്നയിച്ചിരിക്കുന്നത്. അതുപ്രകാരം ശനിയാഴ്ച മറുപടി ലഭിച്ചില്ലെങ്കില് ഞായറാഴ്ച വിശ്വാസികള് പ്രത്യക്ഷ സമരത്തിലേക്ക് വരുമെന്ന് അല്മായ മുന്നേറ്റം വാര്ത്താക്കുറിപ്പില് വ്യക്തമാക്കി.
ഇന്നലെ മെത്രാന് സംഘം അതിരൂപത അല്മായ മുന്നേറ്റം കോര് ടീമുമായി നടത്തിയ ചര്ച്ചയില്, വിശ്വാസികളുടെ ആവശ്യങ്ങള് എല്ലാം പരിഗണിച്ചുവെന്നും ചര്ച്ച തുടരുകയാണെന്നും അറിയിച്ചു. അതിനാല് ഞായറാഴ്ച നടത്താന് തീരുമാനിച്ച ഉപരോധം ഒഴിവാക്കണമെന്നും ആവശ്യപ്പെട്ടു. എന്നാല് അതിനു ഒരു ഉറപ്പും രേഖാമൂലം നല്കാന് മെത്രാന് സംഘം തയ്യാറായില്ലെന്ന് അല്മായ മുന്നേറ്റം പ്രതിനിധികള് പറഞ്ഞു.
ഞായറാഴ്ച പ്രതിഷേധം സംഘടിപ്പിക്കേണ്ടിവന്നാല് 16 ഫൊറോനകളില് നിന്നായി 15,000 പേര് പങ്കെടുക്കും. ചര്ച്ചയില് പാസ്റ്ററല് കൗണ്സില് സെക്രട്ടറി പി പി ജെറാര്ദ്, കണ്വീനര് അഡ്വ.ബിനു ജോണ് മൂലന്, ഷൈജു ആന്റണി, മാത്യു കാരോണ്ടുകടവില്, റിജു കാഞ്ഞൂക്കാരന്, ജോജോ ഇലഞ്ഞിക്കല്, ജിയോ ബേബി, സൂരജ് പൗലോസ് എന്നിവര് പങ്കെടുത്തു.
