ശ്രീനഗര്: രാഹുല് ഗാന്ധിയുടെ നേതൃത്വത്തില് പ്രതിപക്ഷ സംഘം കശ്മീര് സന്ദര്ശിക്കാന് ശ്രമിച്ചതിനെ വിമര്ശിച്ച് ജമ്മു കശ്മീര് ഗവര്ണര് സത്യപാല് മാലിക്. സംഘത്തിന്റെ കശ്മീര് സന്ദര്ശനത്തിന് പിന്നില് രാഷ്ട്രീയ ലക്ഷ്യം മാത്രമാണെന്ന് സത്യലപാല് മാലിക് ആരോപിച്ചു. നല്ലത് മാത്രം ഉദ്ദേശിച്ചാണ് രാഹുലിനെ കശ്മീരിലേക്ക് ക്ഷണിച്ചതെങ്കിലും അദ്ദേഹം രാഷ്ട്രീയം കളിച്ചുവെന്നും സത്യപാല് മാലിക് ആരോപിച്ചു.
രാഹുല് ഗാന്ധിക്ക് ഇപ്പോള് കശ്മീര് സന്ദര്ശിക്കേണ്ട ആവശ്യമില്ലെന്ന് പറഞ്ഞ സത്യപാല് മാലിക് ഇപ്പോള് രാഷ്ട്രീയ പാര്ട്ടികള് രാജ്യതാല്പ്പര്യത്തിനൊപ്പം നില്ക്കണമെന്നും പറഞ്ഞു. കശ്മീരിലെ സാഹചര്യങ്ങള് വഷളാകണമെന്നാണ് താല്പ്പര്യമെങ്കില് അദ്ദേഹത്തിന് ഇവിടെ വന്ന് ഡല്ഹിയില് പറഞ്ഞ കള്ളങ്ങള് ആവര്ത്തിക്കാം. പക്ഷേ അതൊന്നും നല്ലതല്ലെന്നും ഗവര്ണര് പറഞ്ഞു.
ശനിയാഴ്ച കശ്മീര് സന്ദര്ശനത്തിന് എത്തിയ രാഹുല് ഗാന്ധിയുടെ നേതൃത്വത്തിലുള്ള പ്രതിപക്ഷ സംഘത്തെ ശ്രീനഗര് വിമാനത്താവളത്തില് നിന്ന് തിരിച്ചയച്ചിരുന്നു. ശ്രീനഗര് വിമാനത്താവളത്തിലെത്തിയ സംഘത്തെ പുറത്തിറങ്ങാന് പോലും പോലീസ് അനുവദിച്ചില്ല. മാധ്യമങ്ങളെ കാണാനും അനവദിച്ചില്ല.
ജമ്മു കശ്മീര് വിഷയത്തില് രാഷ്ട്രീയ വാക്പോര് മുറുകിയപ്പോള് കശ്മീര് സന്ദര്ശിക്കാന് രാഹുല് ഗാന്ധിയെ സത്യപാല് മാലിക് ക്ഷണിച്ചിരുന്നു. രാഹുലിന്റെ സന്ദര്ശനത്തിനായി കേന്ദ്രസര്ക്കാര് വിമാനസൗകര്യം നല്കാമെന്നും സത്യപാല് മാലിക് പറഞ്ഞിരുന്നു. എന്നാല് പിന്നീട് കശ്മീരിലെ സ്ഥിതിഗതികള് കൂടുതല് വഷളായയോടെ ഗവര്ണര് പിന്മാറിയിരുന്നു.
