ശ്രീനഗര്: പ്രദേശത്തെ സമാധാനത്തിന് കുഴപ്പമുണ്ടാക്കില്ല എന്ന ഉറപ്പ് എഴുതിത്തന്നാല് മോചിപ്പിക്കാമെന്ന് കശ്മീരില് വീട്ടുതടങ്കലില് കഴിയുന്ന നേതാക്കളോട് അധികൃതര് പറഞ്ഞതായി റിപ്പോര്ട്ട്. കശ്മീരിന് പ്രത്യേക പദവി നല്കിയിരുന്ന 370 ാം വകുപ്പ് എടുത്തു മാറ്റിയതിന് മുന്നോടിയായി മുന് മുഖ്യമന്ത്രിമാര് അടക്കം 100 കണക്കിന് രാഷ്ട്രീയ നേതാക്കളെ വീട്ടു തടങ്കലില് സൂക്ഷിക്കാന് തുടങ്ങിയിട്ട് ഒരു മാസം പിന്നിടുമ്പോള് നേതാക്കള്ക്ക് വീട്ടുകാരുമായി കൂടിക്കാഴ്ച നടത്താന് കഴിയുന്ന രീതിയില് ഇക്കാര്യത്തില് ചെറിയ അയവുകള് വരുത്തിതുടങ്ങി.
ദേശീയ മാധ്യമമാണ് ഇക്കാര്യങ്ങള് റിപ്പോര്ട്ട് ചെയ്തിരിക്കുന്നത്. മുന് മുഖ്യമന്ത്രിമാരായ ഒമര് അബ്ദുള്ള, മെഹ്ബൂബാ മുഫ്ത്തി, സിപിഎം നേതാവ് തരിഗാമി എന്നിവര് ഉള്പ്പെടെയുള്ള നേതാക്കളെ ആഗസ്റ്റ് 4 മുതലാണ് വീട്ടു തടങ്കലില് പാര്പ്പിച്ചിരിക്കുന്നത്. കുട്ടി നേതാക്കളെ മോചിപ്പിച്ചതായി അധികൃതര് വ്യക്തമാക്കുന്നുണ്ടെങ്കിലും ഒമര് അബ്ദുള്ളയും മുഫ്ത്തിയുമെല്ലാം ഇപ്പോഴും തടങ്കലിലാണ്്. ആര്ടിഐ പ്രവര്ത്തകന് രാജാ മുസാഫര് ഭട്ടുമായി ശ്രീനഗറിലെ സബ് ജെയിലായ ഷേര് ഇ കശ്മീര് ഇന്റര്നാഷണല് കോണ്ഫറന്സില് കൂടിക്കാഴ്ച നടത്താന് കുടുംബത്തിന് അനുമതി നല്കിയിട്ടുണ്ട്.
ക്രിമിനല് നടപടിയുടെ ഭാഗമായുള്ള 107/151 വകുപ്പ് പ്രകാരമാണ് നേതാക്കളെ കസ്റ്റഡിയില് എടുത്തത്. കല്ലേറുകാര് ഉള്പ്പെടെ സമാധാനത്തിന് ഭീഷണിയാണ് എന്ന കാണുന്നവരെ ഒതുക്കാനുള്ള നിയമമാണ് ഇതെന്ന് അധികൃതര് തന്നെ പറയുന്നു. ഈ നിയമത്തിന് കീഴില് രാഷ്ട്രീയ തടവുകാരെ ദീര്ഘനാള് സൂക്ഷിക്കാനാകില്ല. മതിയായ ബോണ്ട് നല്കി ഇവരെ മോചിപ്പിക്കാനാകും. 107 ാം വകുപ്പ് പ്രകാരം രാഷ്ട്രീയ തടവുകാരെ 24 മണിക്കൂറിനുള്ളില് മജിസ്ട്രേറ്റിന് മുന്നില് ഹാജരാക്കി എന്തിനാണ് അവരെ കസ്റ്റഡിയില് ഇട്ടിരിക്കുന്നതെന്ന്് കസ്റ്റഡിയില് എടുത്തയാള് വിശദീകരണം നല്കേണ്ടതുണ്ട്. 107 ാം വകുപ്പിന് കീഴില് ഒരാളെ അറസ്റ്റ് ചെയ്യണമോയെന്ന് മജിസ്ട്രേറ്റാണ് തീരുമാനമെടുക്കുക. 24 മണിക്കൂറിനുള്ളില് ഇയാളെ കോടതിക്ക് മുന്നില് ഹാജരാക്കണമെന്നാണ് നിയമം. 151 ാം വകുപ്പില് പോലീസ് ഉദ്യോഗസ്ഥന് വാറന്റ് കൂടാതെ അറസ്റ്റു ചെയ്യാം. ഇതിന്റെ 61 ല് 24 മണിക്കൂറിനുള്ളില് ആളെ മജിസ്ട്രേറ്റിന് മുന്നില് ഹാജരാക്കണമെന്നും പറയുന്നു.
ജുഡീഷ്യല് കസ്റ്റഡിക്ക് കീഴിലാണ് ഒമര് അബ്ദുള്ളയേയും മെഹ്ബൂബാ മുഫ്ത്തിയേയും പോലെയുള്ള നേതാക്കളെ തടങ്കലില് വെച്ചിരിക്കുന്നത്. പീപ്പിള്ക് കോണ്ഫറന്സ് നേതാവ് സജാദ് ഗാനി ലോണ്, ഷാ ഫൈസല് എന്നിവരേയും ഈ നിയമത്തിന് കീഴിലാണ് പിടിച്ചിട്ടിരിക്കുന്നത്. അതിനിടയില് കഴിഞ്ഞ ദിവസം സിപിഎം നേതാവ് സീതാറാം യെച്ചൂരി കൂടിക്കാഴ്ച നടത്തിയ സിപിഎം നേതാവ് തരിഗാമിയെ ആരോഗ്യ നില മോശമായതിനെ തുടര്ന്ന് ഡല്ഹി എയിംസിലേക്ക് മാറ്റാന് അനുവദിച്ചിട്ടുണ്ട്. അതുപോലെ മെഹ്ബൂബാ മുഫ്ത്തിയെ കാണാന് ശ്രീനഗറിലേക്ക് പോകാന് മകള് സനയ്ക്കും സുപ്രീംകോടതി അനുമതി നല്കിയിട്ടുണ്ട്്.
