മലയാളി പ്രേക്ഷകര്ക്ക് ഏറെ സുപരിചിതയാണ് ചന്ദ്ര ലക്ഷ്മണ്. ഒരു ഇടവേളയ്ക്ക് ശേഷം അഭിനയ രംഗത്തേക്ക് മടങ്ങി എത്തുകയാണ് താരം. ഇതിനിടെ ചില ഓര്മ്മകള് പങ്കുവയ്ക്കുകയാണ് നടി.
ഞങ്ങള്ക്ക് വീടുകള് വാഴില്ല എന്നാണ് ഇതുവരെയുള്ള വിശ്വാസമെന്ന് ചന്ദ്ര പറയുന്നു. തിരുവനന്തപുരത്തെ ഒരു ബ്രാഹ്മണ കുടുംബത്തിലാണ് ഞാന് ജനിച്ചത്. അമ്മ ബാങ്ക് ഉദ്യോഗസ്ഥയായിരുന്നു. അച്ഛന് സ്വകാര്യ സ്ഥാപനത്തിലും. അച്ഛന്റെ സ്ഥലം മാറ്റങ്ങള്ക്കനുസരിച്ച് ഞങ്ങളുടെ വീടുകളും മാറിക്കൊണ്ടിരുന്നു. ഞാന് രണ്ടാം കസില് പഠിക്കുന്ന സമയത്ത് അച്ഛന് എറണാകുളത്ത് ഒരു വീട് മേടിച്ചു. പക്ഷേ 3 വര്ഷം മാത്രമേ അവിടെ താമസിക്കാനായുള്ളൂ. അച്ഛന് മധുരയിലേക്ക് സ്ഥലം മാറ്റം. അതോടെ വീട് കുറെ നാള് അടഞ്ഞു കിടന്നു. നോക്കാനാളില്ലാതായതോടെ ആ വീട് ഞങ്ങള് വിറ്റു. അതിനുശേഷം അച്ഛന് ചെന്നൈയിലേക്ക് സ്ഥലം മാറ്റം കിട്ടി.
ഞങ്ങള് ചെന്നൈയില് ഒരു ഫ്ലാറ്റ് വാങ്ങി താമസം തുടങ്ങി. പക്ഷേ വീണ്ടും നാലു വര്ഷം മാത്രമേ അവിടെ തുടരാനായുള്ളൂ. മറ്റുള്ളവര്ക്ക് അന്ധവിശ്വാസമാണെന്നു തോന്നാമെങ്കിലും അവിടെ താമസിച്ചപ്പോള് ഞങ്ങള്ക്ക് മൂന്നു പേര്ക്കും അപകടങ്ങള് ഉണ്ടായി. മരണത്തില് നിന്നും കഷ്ടിച്ചാണ് രക്ഷപ്പെട്ടത്. തുടര്ന്ന് രോഗങ്ങളും പ്രശ്നങ്ങളും വേട്ടയാടിയതോടെ വീടിന്റെ വാസ്തു നോക്കിച്ചു. ഫ്ലാറ്റിന്റെ ദിശയിലും അളവുകളിലുമൊക്കെ ദോഷങ്ങള് കണ്ടെത്തി. അതോടെ ആ ഫ്ലാറ്റ് ഞങ്ങള് വിറ്റു. അഡയാറില് ഒരു വാടക വീട്ടിലേക്ക് താമസം മാറി. പിന്നെ ഇതുവരെ ഞങ്ങള് സ്വന്തമായി വീട് വാങ്ങിയിട്ടില്ലെന്നും താരം പറയുന്നു.
ഡ്യൂപ്ലെയ് ശൈലിയിലുള്ള ഇന്ഡിപെന്ഡന്റെ വീട്ടിലാണ് ഇപ്പോള് താമസിക്കുന്നത്. എന്റെ ജീവിതത്തില് പോസിറ്റീവായ ഒരുപാട് കാര്യങ്ങള് സംഭവിച്ചത് ഇവിടെ താമസിക്കുമ്പോഴാണ്. അതുകൊണ്ട് വാടകവീടായാലും ഇതുവരെ മറ്റൊരു വീടിനോടും തോന്നാത്ത മാനസിക അടുപ്പമുണ്ടെന്നും ചന്ദ്ര ലക്ഷ്മണ് പറയുന്നു.
ഞങ്ങള്ക്ക് മൃഗസ്നേഹികളുടെ ഒരു സംഘടനയുണ്ട്. തെരുവുനായ്ക്കളെ മറ്റും പുനരധിവസിപ്പിക്കുന്ന പ്രവര്ത്തനങ്ങളില് സജീവമാണ്. അതെല്ലാം തുടങ്ങിയത് ഇവിടെ താമസിച്ചു തുടങ്ങിയ ശേഷമാണ്. ബാല്ക്കണിയില് ഞങ്ങള് ഒരു ഗാര്ഡന് ഒരുക്കിയിട്ടുണ്ട്. പൂജാമുറിയും ഗാര്ഡനുമാണ് എന്റെ ഫേവറിറ്റ് സ്പേസുകള്. എല്ലാവര്ഷവും തിരുവനന്തപുരത്തുള്ള അമ്മവീട്ടിലേക്ക് എത്താറുണ്ട്. അവിടെ അമ്മൂമ്മയുണ്ട്. വ്യക്തിപരമായ കാരണങ്ങളാല് രണ്ടു വര്ഷത്തോളം അഭിനയരംഗത്തു നിന്നും മാറിനില്ക്കുകയായിരുന്നു. ഇപ്പോള് തിരിച്ചുവരാനുള്ള തയ്യാറെടുപ്പിലാണ്.-ചന്ദ്രലക്ഷ്മണ് പറഞ്ഞു.
