ന്യൂഡല്ഹി: ആഗോള ഭീകരനും ജെയ്ഷെ മുഹമ്മദ് തലവനുമായ മസൂദ് അസ്ഹറിനെ ജയിലില് നിന്നും പാക്കിസ്ഥാന് രഹാസ്യമായി മോചിപ്പിച്ചുവെന്ന് ഇന്റലിജന്സ് റിപ്പോര്ട്ട്. ഇന്ത്യക്കെതിരെ ഭീകരാക്രമണ പദ്ധതികള് നടപ്പിലാക്കാന് 'ബിഗ് ആക്ഷന്' ഒരുങ്ങുന്നുവെന്നാണ് സൂചന. പാക്ക് ഭീകരാക്രമണ മുന്നറിയിപ്പ് ഇന്റലിജന്സ് ബ്യൂറോ കേന്ദ്ര സര്ക്കാരിന് നല്കിയതോടെ രാജ്യത്ത് അതീവ ജാഗ്രത നിര്ദേശം നല്കി.
ഭുകരാക്രമണം നടത്താന് ഭീകരര് ഉള്പ്പെട്ട പാക്ക് സംഘം രാജസ്ഥാന് സമീപമുള്ള ഇന്ത്യ-പാക്ക് അതിര്ത്തിയില് കടന്നിട്ടുണ്ടെന്നാണ് വിവരം. കശ്മീരിനു പ്രത്യേക പദവി നല്കുന്ന ആര്ട്ടിക്കിള് 370 റദ്ദാക്കിയതിനു തിരിച്ചടിയായി വരും ദിവസങ്ങളില് സിയാല്കോട്ട്, ജമ്മു, രാജസ്ഥാന് സെക്ടറുകളില് 'ബിഗ് ആക്ഷന്' നടപ്പിലാക്കാനാണ് പാക്ക് നീക്കം. അതിര്ത്തി സുരക്ഷാ സേനയ്ക്കും ജമ്മു, രാജസ്ഥാന് മേഖലകളിലെ സൈനികര്ക്കും നിര്ദേശങ്ങള് നല്കിയിട്ടുണ്ട്.
കശ്മീരിലെ ഇന്ത്യയുടെ നടപടിക്കെതിരെ സാധ്യമായ എല്ലാ രീതിയിലും പ്രതികരിക്കുമെന്ന് പാക്ക് പ്രധാനമന്ത്രി ഇമ്രാന് ഖാന് പ്രസ്താവന നടത്തിയിരുന്നു. ലോക രാജ്യങ്ങളുടെ പിന്തുണ തേടാനുള്ള എല്ലാ ശ്രമങ്ങളും പാഴായതോടെ പാക്കിസ്ഥാന് എന്ത് നീക്കം നടത്തുമെന്നാണ് ഇന്ത്യ ഉറ്റുനോക്കുന്നത്. എന്തെങ്കിലും ദുരന്തം സംഭവിച്ചാല് ആഗോള കൂട്ടായ്മകള് ആണ് അതിന് ഉത്തരവാദികള് എന്നും ഇമ്രാന് ഖാന് കുറ്റപ്പെടുത്തല് നടത്തിയിരുന്നു. ഏത് പരിധി വരെ പോകാനും തങ്ങള് തയാറാണെന്ന് പാക്ക് ആര്മി ചീഫ് ജനറല് കമറും പരാമര്ശം നടത്തിയിരുന്നു. ഇതിനിടെയാണ് ഐബി ജാഗ്രത പാലിക്കണമെന്ന് കേന്ദ്രത്തിന് നിര്ദേശം നല്കിയിരിക്കുന്നത്.
