തിരുവനന്തപുരം: കെ. കരുണാകരന് സ്മാരക ആശുപത്രിയുടെ നിര്മ്മാണ കരാറുകാരന് ജോസഫ് (ജോയി) ദുരൂഹ സാഹചര്യത്തില് മരിച്ച സംഭവത്തില് കോണ്ഗ്രസ് നേതാക്കള്ക്കെതിരെ കുടുംബത്തിന്റെ പരാതി. കോണ്ഗ്രസ് നേതാക്കള് ജോസഫിനെ വിളിച്ചുവരുത്തി രേഖകള് കൈവശപ്പെടുത്തിയ ശേഷം അപായപ്പെടുത്തിയെന്ന് ചൂണ്ടിക്കാട്ടിയാണ് കുടുംബത്തിന്റെ പരാതി. കരുണാകരന് ട്രസ്റ്റില് ക്രിമിനല് പശ്ചാത്തലമുള്ളവരും ഉണ്ടെന്നും പരാതിയില് പറയുന്നു.
ജോസഫിന്റെ മരണം തളിപ്പറമ്പ് ഡി.വൈ.എസ്.പിയുടെ നേതൃത്വത്തില് ഏഴംഗ സംഘം പ്രത്യേകം അന്വേഷിക്കുന്നുണ്ട്. ആശുപത്രി നിര്മ്മാണവുമായി ബന്ധപ്പെട്ട് നല്കാനുള്ള പണം ചോദിച്ചപ്പോള് കോണ്ഗ്രസ് നേതാക്കള് കയ്യൊഴിഞ്ഞുവെന്ന് കുടുംബം നേരത്തെ വെളിപ്പെടുത്തിയിരുന്നു. കഴിഞ്ഞ ആഴ്ചയിലാണ് ജോയിയെ മരിച്ച നിലയില് കണ്ടെത്തിയത്.
കരുണാകരന് സ്മാരക ആശുപത്രി നിര്മ്മിച്ച വകയില് ഒരു കോടിയിലധികം രൂപ ലഭിക്കാനുണ്ട്. ഈ കെട്ടിടത്തിലാണ് ജോയിയെ മരിച്ച നിലയില് കണ്ടെത്തിയത്. ലഭിക്കാനുള്ള പണം സംബന്ധിച്ച് കോണ്ഗ്രസ് നേതൃത്വവുമായി ജോയി ചര്ച്ച നടത്തിയിരുന്നു. ഇതിന് പിന്നാലെയാണ് ജോയിയെ കാണാതായത്. ജോയിയെ കാണാനില്ലെന്ന ബന്ധുക്കളുടെ പരാതിയില് അന്വേഷണം പുരോഗമിക്കവെയാണ് മരിച്ച നിലയില് കണ്ടെത്തിയത്.
