ന്യുഡല്ഹി: ഐ.എന്.എക്സ് മീഡിയ കേസില് സി.ബി.ഐ അറസ്റ്റിലായ മുന് ധനമന്ത്രി പി.ചിദംബരം ജാമ്യത്തിന് അപേക്ഷ നല്കി. ഡല്ഹി ഹൈക്കോടതിയിലാണ് ജാമ്യാപേക്ഷ സമര്പ്പിച്ചിരിക്കുന്നത്. കേസില് തന്നെ ജുഡീഷ്യല് കസ്റ്റഡിയില് വിട്ട ഉത്തരവും അദ്ദേഹം ചോദ്യം ചെയ്തിട്ടുണ്ട്.
അതിനിടെ, കേന്ദ്രസര്ക്കാരിനെ വീണ്ടും വെല്ലുവിളിച്ച് ചീദംബരം ട്വീറ്റ് ചെയ്തു. രാജ്യത്തെ വിഴുങ്ങിക്കൊണ്ടിരിക്കുന്ന സാമ്പത്തിക മാന്ദ്യത്തില് നിന്ന കരകയറാന് സര്ക്കാര് എന്തു പദ്ധതിയാണ് കൊണ്ടുവരുന്നതെന്ന് വ്യക്തമാക്കണശമന്നു അദ്ദേഹം ആവശ്യപ്പെട്ടു. 'സമ്പദ്വ്യവസ്ഥയെ കുറിച്ച് ഓര്ത്ത് തനിക്ക് ഏറെ ആകുലതയുണ്ട്. പാവപ്പെട്ടവരാണ് ഇതിന്റെ ദോഷം ഏറെ അനുഭവിക്കുക. വരുമാനം കുറയുന്നു, തൊഴിലുകള് കുറയുന്നു, വ്യാപാരത്തെതും നിക്ഷേപത്തെയും ബാധിക്കുന്നു. ഇതിന്റെയെല്ലാം ദോഷം അനുഭവിക്കുന്നത് പാവപ്പെട്ടവരും ഇടത്തരക്കാരുമാണ്. രാജ്യത്തെ ഈ അപചയത്തില് നിന്നും മാന്ദ്യത്തില് നിന്നും കരകയറ്റാന് എന്തു പദ്ധതിയാണ് സര്ക്കാരിന്റെ പക്കലുള്ളത്? ചിദംബരം ട്വീറ്റ് ചെയ്തു. അദ്ദേഹത്തിനുവേണ്ടി കുടുംബമാണ് ട്വിറ്റര് കൈകാര്യം ചെയ്യുന്നത്.
ഈ മാസം അഞ്ചിനാണ് ചിദംബരത്തെ 14 ദിവസത്തേക്ക് റിമാന്ഡ് ചെയ്തത്. തിഹാര് ജയിലിലെ പ്രത്യേക സെല്ലിലാണ് ചിദംബരത്തെ പാര്പ്പിച്ചിരിക്കുന്നത്. 15 ദിവസത്തെ സി.ബി.ഐ കസ്റ്റഡി അവസാനിച്ച ശേഷമാണ് ചിദംബരത്തെ ജാമ്യാപേക്ഷ തള്ളി റിമാന്ഡ് ചെയ്തത്. സി.ബി.ഐ കസ്റ്റഡിയിലിരിക്കുമ്പോഴും ചിദംബരം സര്ക്കാരിനെതിരെ വിമര്ശനം ഉന്നയിച്ചിരുന്നു. സാമ്പത്തിക വളര്ച്ചാ നിരക്ക് അഞ്ച് ശതമാനമായി കുറഞ്ഞത് ചൂണ്ടിക്കാട്ടി 'എന്താണ് അഞ്ച് ശതമാനം?' എന്ന ചോദ്യമാണ് സെപ്തംബര് മൂന്നിന് അദ്ദേഹം മാധ്യമങ്ങളുടെ മുന്നിലുയര്ത്തിയത്.
