ന്യൂഡല്ഹി: ഈ ഒരു വര്ഷം മാത്രം 2050 ഓളം തവണ പാക്കിസ്ഥാന് അതിര്ത്തി ലംഘനം നടത്തിയിട്ടുണ്ടെന്ന് വ്യക്തമാക്കി ഇന്ത്യ. വെടിനിര്ത്തല് കരാര് ലംഘിച്ചുള്ള പാക്കിസ്ഥാന്റെ തുടര് പ്രകോപനങ്ങളില് ഇതുവരെ 21 പേര്ക്കാണ് ജീവന് നഷ്ടമായതെന്നും വിദേശകാര്യ മന്ത്രാലയം വ്യക്തമാക്കി. ഇന്ത്യന് സൈന്യം പരമാവധി സംയമനം പാലിക്കുകയാണെന്നും വിദേശകാര്യ മന്ത്രാലയം കൂട്ടിച്ചേര്ത്തു. തുടരെയുള്ള പാക്ക് പ്രകോപനങ്ങളില് പാക്കിസ്ഥാനെ ഇന്ത്യ ആശങ്ക അറിയിച്ചിട്ടുണ്ട്.
യുഎന് സമ്മേളനത്തില് ജമ്മു കശ്മീരില് ഇന്ത്യ മനുഷ്യാവകാശ ലംഘനം നടത്തുകയാണെന്ന ആരോപണം ഉയര്ത്തിയതിനു പിന്നാലെയാണ് വിദേശകാര്യ മന്ത്രാലയത്തിന്റെ പ്രതികരണം. അതിര്ത്തിയില് ഭീകരരെ കൂട്ടുപിടിച്ച് നടത്തുന്ന നുഴഞ്ഞുകയറ്റവും, തുടരെയുള്ള വെടിനിര്ത്തല് കരാര് ലംഘനങ്ങളിലും, ഇന്ത്യന് പൗരന്മാരെ ലക്ഷ്യമിടുന്നതലും രാജ്യത്തിന്റെ ആശങ്ക പാക്കിസ്ഥാനെ അറിയിച്ചിട്ടുണ്ടെന്ന് വിദേശകാര്യ വക്താവ് പറഞ്ഞു. 2003 ലാണ് അതിര്ത്തിയില് സമാധാനവും ശാന്തതതയും നിലനിര്ത്തുക എന്ന ലക്ഷ്യത്തോടെ വെടിനിര്ത്തല് കരാര് ഇരുരാജ്യങ്ങളും ഒപ്പുവെയ്ക്കുന്നത്.
