അഹമ്മദാബാദ്: വിവാഹ വാര്ഷികത്തിന് ഒരു ദിവസം മുമ്പ് 27കാരനായ യുവാവ് ആത്മഹത്യ ചെയ്തു. എച്ച്ഐവി ബാധിതനായ യുവാവ് വെള്ളിയാഴ്ച രാവിലെ വീട്ടിലെ സീലിംഗ് ഫാനില് ഭാര്യയുടെ ഷോള് ഉപയോഗിച്ച് തൂങ്ങി മരിക്കുകയായിരുന്നു. ഗുജറാത്തിലെ അഹമ്മദാബാദിലുള്ള അമ്രൈവാദിയിലാണ് സംഭവം നടന്നത്. യുവാവിന്റെ ആത്മഹത്യ കുറിപ്പ് പോലീസ് കണ്ടെടുത്തിട്ടുണ്ട്.
താന് എച്ച്ഐവി ബാധിതനാണെന്ന കാര്യം പുറത്ത് പറയുമെന്ന് പറഞ്ഞ് ഭാര്യയും ഭാര്യാ മാതാവും ഭാര്യാ സഹോദരനും ഭീഷണിപ്പെടുത്തുന്നതാണ് ജീവനൊടുക്കാന് കാരണമെന്ന് യുവാവ് ആത്മഹത്യ കുറിപ്പില് വ്യക്തമാക്കിയിരുന്നു. യുവാവും ഭാര്യയുമായി കഴിഞ്ഞ 12 വര്ഷമായി ബന്ധത്തിലായിരുന്നെന്നും നാല് വര്ഷത്തിന് മുമ്പാണ് വിവാഹിതരയാതെന്നും അദ്ദേഹം കുറിച്ചു. എച്ച്ഐവി ഉണ്ടെന്ന് അറിയിച്ച ശേഷമായിരുന്നു വിവാഹം നടന്നതെന്ന് യുവാവ് ആത്മഹത്യ കുറിപ്പില് വ്യക്തമാക്കിയെന്ന് പോലീസ് പറഞ്ഞു.
സംഭവത്തില് യുവാവിന്റെ പിതാവ് പോലീസില് പരാതി നല്കി. മകന് എച്ച്ഐവി ബധിതനാണെന്ന കാര്യം ഭാര്യയോടും വീട്ടുകാരോടും പറഞ്ഞിരുന്നെന്നും സിവില് ആശുപത്രിയില് ചികിത്സ നടത്തി വരികയായിരുന്നെന്നും യുവാവിന്റെ പിതാവ് വ്യക്തമാക്കി.
സെക്യൂരിറ്റി ജോലിക്കാരനായ പിതാവിനെ മൂത്ത മകന് ഫോണ്ചെയ്ത് ഇളയമകന് ഫോണില് മരണത്തിന് സൂചന നല്കുന്ന സ്റ്റാറ്റസ് ഇട്ടിട്ടുണ്ടെന്ന് അറിയിക്കുകയായിരുന്നു. തുടര്ന്ന് പിതാവ് ഇളയമകന്റെ വീട്ടിലെത്തി പരിശോധിച്ചപ്പോഴാണ് തൂങ്ങി മരിച്ച നിലയില് ഇയാളെ കണ്ടെത്തിയത്. ഉടന് തന്നെ ആശുപത്രിയില് കൊണ്ടുപോയെങ്കിലും യുവാവിനെ രക്ഷിക്കാനായില്ല.
