ന്യൂഡല്ഹി: കള്ളപ്പണം വെളുപ്പിക്കല് കേസില് അറസ്റ്റിലായ കോണ്ഗ്രസ് നേതാവും കര്ണാടക മുന് മന്ത്രിയുമായ ഡി.കെ ശിവകുമാറിനെതിരെ എന്ഫോഴ്സ്മെന്റ് ഡയറക്ടറേറ്റ് മൂന്നാംമുറ പ്രയോഗിച്ചുവെന്ന് കോണ്ഗ്രസ് എം.എല്.സി എം. ലിംഗപ്പ. സംഭവത്തില് കേന്ദ്ര ഏജന്സിക്കെതിരെ അന്വേഷണം നടത്തണമെന്ന് ആവശ്യപ്പെട്ട് കര്ണാടക മനുഷ്യാവകാശ കമ്മീഷന് ലിംഗപ്പ പരാതി നല്കി.
പാക്കിസ്ഥാനില് നിന്നുള്ള തീവ്രവാദിയെ പോലെയാണ് ശിവകുമാറിനെ അവര് പരിചരിക്കുന്നത്. നേരമേറെ വൈകിയുള്ള ചോദ്യം ചെയ്യല്, അടിസ്ഥാന സൗകര്യങ്ങള് നല്കാതിരിക്കുക, ബെഡ് ഷീറ്റും മരുന്നും നല്കാതിരിക്കുക, ബന്ധുക്കളെ കാണാന് അനുദവിക്കാതിരിക്കുക, ഇരുട്ടറയില് തള്ളുക തുടങ്ങിയ മൂന്നാം മുറകളാണ് അദ്ദേഹത്തിനെതിരെ പ്രയോഗിക്കുന്നതെന്നും എം.എല്.സി വെളിപ്പെടുത്തി.
എന്ഫോഴ്സ്മെന്റ് ഡയറക്ടറേറ്റ് അന്വേഷണ ഉദ്യോഗസ്ഥ ശര്മ്മയ്ക്കും മറ്റ് ഓഫീസര്മാര്ക്കും എതിരെയാണ് പരാതി നല്കിയിരിക്കുന്നത്. ശത്രുക്കളെ ഒതുക്കാനുള്ള ആയുധമായാണ് എന്ഫോഴ്സ്മെന്റ് ഡയറക്ടറേറ്റിനെ ബി.ജെ.പി നയിക്കുന്ന കേന്ദ്രസര്ക്കാര് കാണുന്നതെന്നും ലിംഗപ്പ പറഞ്ഞു. ഈ മാസം മൂന്നിനാണ് ശിവകുമാറിനെ അറസ്റ്റ് ചെയ്തത്.
