ബാഹുബലിയുടെ വന് വിജയത്തിനു ശേഷം തെലുങ്ക് സിനിമകളില് ഗ്രാഫിക്സുകളുടെ അതിപ്രസരമാണ്. പ്രഭാസ് നായകനായ 'സഹോ' ആണ് ഏറ്റവു പുതിയ ഉദാഹരണം. അധികമായാല് അമൃതും വിഷം എന്ന രീതിയിലാണ് ഇപ്പോള് കാര്യങ്ങളുടെ പോക്ക്. സാഹോ സിനിമയ്ക്ക് പാരയായതും ഗ്രാഫിക്സുകളുടെ അതിപ്രസരമാണ്.
റീലിസിനൊരുങ്ങുന്ന മെഗാസ്റ്റാര് ചിരഞ്ജീവി കേന്ദ്രകഥാപാത്രത്തില് എത്തുന്ന ചിത്രം 'സൈയ്റാ നരസിംഹ റെഡഡി'യും ഈ ഗണത്തില്പെടുന്ന ചിത്രമാണ്. ചിത്രത്തിലെ ഗ്രാഫിക്സിനു വേണ്ടി മാത്രം 45 കോടിയാണ് നിര്മാതാക്കള് ചിലവഴിച്ചത്. വിഎഫ്എക്സിനായി മാത്രം പതിനേഴോളം സ്റ്റുഡിയോകളാണ് ചിത്രത്തിനു പിന്നില് പ്രവര്ത്തിച്ചിരിക്കുന്നത്.
എന്നാല് അമിതമായ വിഎഫ്എക്സ് ചിത്രത്തിനു ദോഷം ചെയ്യുകയേ ഉളളൂവെന്ന് വിദഗ്ധര് അഭിപ്രായപ്പെടുന്നു. 3800 വിഎഫ്എക്സ് ഷോട്ടുകളാണ് ചിത്രത്തില് ഉള്പ്പെടുത്തിയിരിക്കുന്നത്. ബാഹുബലിയില് ആകെ ഉണ്ടായിരുന്നത് 2300 വിഎഫ്എക്സ് ഷോട്ടുകളും.
തമിഴ് ചിത്രം കത്തിയുടെ റീമേക്ക് ആയ ഖൈദി നമ്പര് 150 റിലീസ് ചെയ്ത് രണ്ട് വര്ഷങ്ങള്ക്കു ശേഷമാണ് ഒരു ചിരഞ്ജീവി ചിത്രം തിയറ്ററുകളിലെത്തുന്നത്. രാഷ്ട്രീയ നീക്കങ്ങള് പാടെ പാളിയ താരത്തിന്റെ പ്രഭയ്ക്ക് ഈയിടെയായി അല്പം മങ്ങലുണ്ടെന്നും ടോളിവുഡില് നിന്നുളള വൃത്തങ്ങള് റിപ്പോര്ട്ട് ചെയ്യുന്നു.
സ്വാത്യത്തിനായി ബ്രിട്ടീഷുകാര്ക്കെതിരെ പടപൊരുതിയ ആദ്യ പോരാളിയായ ഉയ്യലവാഡ നരസിംഹ റെഡഡിയുടെ ബയോപികാണ് 'സൈയ്റാ നരസിംഹ റെഡഡി'. ഗോസായി വെങ്കണ്ണ എന്ന ആത്മീയ നേതാവിന്റെ വേഷത്തില് എത്തുന്നത് ബിഗ് ബി അമിതാഭ് ബച്ചനാണ്. യോദ്ധാവിന്റെ വേഷത്തില് തമിഴ് നടന് വിജയ് സേതുപതിയും മഹാറാണിയുടെ വേഷത്തില് നയന്താരയും എത്തുന്നു.
സുരേന്ദന് റെഡ്ഡി സംവിധാനം ചെയ്യുന്ന ചിത്രത്തില് ജഗപതി ബാബു, തമ്മന്ന , കിച്ച സുദീപ്, വിജയ് സേതുപതി , ബ്രഹ്മാജി, രവി കിഷന് , ഹുമ ഖുറേഷി എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
ചരിത്രതാളുകളില് എഴുതപ്പെടാതെ പോയ വീരനും ബ്രിട്ടീഷുകാര്ക്കെതിരെ ആദ്യമായി യുദ്ധം കുറിച്ചവനുമായ പോരാളിയാണ് നരസിംഹ റെഡ്ഡി. ഈ പോരാളിയുടെ ചൂടും ചൂരും ചേര്ന്ന ജീവിതകഥയാണ് ദൃശ്യമികവേടെ അവതരിപ്പിക്കുന്നത്. ചിത്രത്തിന്റെ ട്രെയിലര് ഇതിനകം തന്നെ യൂട്യൂബില് തരംഗമായിരുന്നു.
സിജു തുറവൂരിന്റെ വരികള്ക്ക് ഈണം പകര്ന്നിരിക്കുന്നത് അമിത് ത്രീവേദിയാണ്. സുധിനി ചൗഹാന്, ശ്രേയ ഘോഷാല് എന്നിവര് ചേര്ന്നാണ് ഈ ഗാനം പാടിയിരിക്കുന്നത്. രാജീവ് സുന്ദരേശന്, അരുണ് കമ്മത്ത്, സുഹാസ് സാവന്ത്, റിഷികേഷ് കമേര്ക്കര് , ദീപ്തി റെഗെ, പ്രഗതി ജോഷി, അരോഹി മാത്രേ, അതിഥി പ്രഭുദേശായി എന്നിവരും ഗാനത്തിന് കോറസ് പാടിയിട്ടുണ്ട്.
കോയിന്ഡെല്ലാ പ്രാഡക്ഷന്സിന്റെ ബാനറില് ചിത്രം നിര്മിക്കുന്നത് ചിരഞ്ജീവിയുടെ മകനും തെലുങ്ക് സൂപ്പര് താരവുമായ റാംചരണാണ്. ചിരഞ്ജീവിയുടെ 151-ാമത് ചിത്രവും റാംചരണിന്റെ ആദ്യ നിര്മാണ സംരംഭവും കൂടിയാണ് ഈ ചിത്രം. 270 കോടിയാണ് ചിത്രത്തിന്റെ മുതല് മുടക്ക്. ആര് രത്നവേലു ഛായാഗ്രഹണം. അഞ്ച് ഭാഷയിലാണ് ചിത്രം തീയേറ്ററുകളിലെത്തുക.
