പൂനെ: പൂനെ ടെസ്റ്റില് ഇന്ത്യയ്ക്കെതിരെ ഫോളോ ഓണ് ചെയ്ത ദക്ഷിണാഫ്രിക്കയ്ക്ക് വീണ്ടും തകര്ച്ച. ചരിത്രത്തിലാദ്യമായാണ് ഇന്ത്യ ദക്ഷിണാഫ്രിക്കയെ ഫോളോ ഓണ് ചെയ്യിച്ചത്. രണ്ടാം ഇന്നിങ്സില് 12 ഓവര് പിന്നിടുമ്പോള് ദക്ഷിണാഫ്രിക്ക രണ്ടു വിക്കറ്റ് നഷ്ടത്തില് 54 റണ്സെന്ന നിലയിലാണ്. 37 റണ്സുമായി ഡീന് എല്ഗറും നാലു റണ്സുമായി ഫാഫ് ഡുപ്ലെസിസുമാണ് ക്രീസില്.
നാലാം ദിനത്തില് രണ്ടാമത്തെ പന്തില് എയ്ഡന് മാര്ക്രത്തെ(പൂജ്യം) മടക്കി ഇഷാന്താണ് വിക്കറ്റ് വേട്ട ആരംഭിച്ചത്. പിന്നാലെ ഉമേഷ് യാദവ് ത്യൂനീസ് ഡി ബ്രൂയിനെയും(എട്ട്) മടക്കി. ഒന്നാം ഇന്നിങ്സില് ദക്ഷിണാഫ്രിക്കയെ 275 റണ്സിന് പുറത്താക്കിയ ഇന്ത്യ 326 റണ്സിന്റെ ലീഡും നേടിയിരുന്നു. നാലാം ദിനം ഇന്ത്യ ദക്ഷിണാഫ്രിക്കയെ ഫോളോഓണിനയയ്ക്കുകയായിരുന്നു.
ഇന്ത്യയുടെ ഒന്നാം ഇന്നിങ്സ് സ്കോറായ 601 പിന്തുടര്ന്നിറങ്ങിയ ദക്ഷിണാഫ്രിക്ക മൂന്നാം ദിനമായ ഇന്നലെ 275 റണ്സിനു പുറത്താകുകയായിരുന്നു. ഇതോടെ രണ്ടു ദിനം ശേഷിക്കെ മത്സരത്തില് ഇന്ത്യക്ക് വ്യക്തമായ ആധിപത്യമായി.
വിശാഖപട്ടണത്ത് നടന്ന ആദ്യ ടെസ്റ്റില് 200നു മേല് റണ്സിന്റെ കൂറ്റന് ജയം നേടിയ ഇന്ത്യക്ക് ഇവിടെ ഇന്നിങ്സ് ജയം സ്വന്തമാക്കാനുള്ള അവസരമാണ് ഒരുങ്ങിയിരിക്കുന്നത്. ഇന്ത്യയുടെ കൂറ്റന് സ്കോറിനെതിരേ മൂന്നാം ദിനം രാവിലെ മൂന്നിന് 36 എന്ന നിലയില് ബാറ്റിങ് പുനരാരംഭിച്ച ദക്ഷിണാഫ്രിക്കയ്ക്ക് കാര്യങ്ങളെല്ലാം പിഴയ്ക്കുകയായിരുന്നു. ഇന്ത്യന് ബൗളര്മാര് കൃത്യതയോടെ പന്തെറിഞ്ഞതോടെ ദക്ഷിണാഫ്രിക്കന് ബാറ്റിങ് നിര കൂട്ടത്തകര്ച്ച നേരിട്ടു.
ഒരു ഘട്ടത്തില് എട്ടിന് 162 റണ്സെന്ന നിലയില് തകര്ന്ന ദക്ഷിണാഫ്രിക്കയെ ഒമ്പതാം വിക്കറ്റില് 109 റണ്സ് കൂട്ടിച്ചേര്ത്ത കേശവ് മഹാരാജ് വെര്നോണ് ഫിലാന്ഡര് സഖ്യമാണ് കരകയറ്റിയത്. 132 പന്തുകള് നേരിട്ട കേശവ് മഹാരാജ് 12 ബൗണ്ടറികളടക്കം 72 റണ്സെടുത്തു. 192 പന്തുകള് നേരിട്ട് ആറു ബൗണ്ടറികളോടെ 44 റണ്സെടുത്ത ഫിലാന്ഡര് പുറത്താകാതെ നിന്നു.
നായകന് ഫാഫ് ഡുപ്ലീസിസ് (64), മധ്യനിര താരങ്ങളായ ത്യൂനിസ് ഡി ബ്രൂയിന് (30), ക്വിന്റണ് ഡിക്കോക്ക് (31) എന്നിവര്ക്കു മാത്രമാണ് ഇന്ത്യന് ബൗളിങ്ങിനെ അല്പ്പമെങ്കിലും പ്രതിരോധിക്കാനായത്. ഇന്ത്യയ്ക്കായി രവിചന്ദ്രന് അശ്വിന് നാലു വിക്കറ്റ് വീഴ്ത്തി. ഉമേഷ് യാദവ് മൂന്നു വിക്കറ്റെടുത്തു. ഷമി രണ്ടു വിക്കറ്റുകള് നേടി. ഡീന് എല്ഗാര് (6), എയ്ഡന് മാര്ക്രം (0), ടെംബ ബവുമ (8), ആന്റിച്ച് നോര്ഹെ (3) എന്നിവരാണ് രണ്ടാം ദിനം പുറത്തായ ബാറ്റ്സ്മാന്മാര്.
നേരത്തെ നായകന് വിരാട് കോഹ്ലിയുടെ ഇരട്ട സെഞ്ചുറിയുടെയും ഓപ്പണര് മായങ്ക് അഗര്വാളിന്റെ സെഞ്ചുറിയുടെയും മികവില് ഒന്നാം ഇന്നിങ്സില് അഞ്ചു വിക്കറ്റ് നഷ്ടത്തില് 601 റണ്സെന്ന നിലയില് ഇന്ത്യ ഇന്നിങ്സ് ഡിക്ലയര് ചെയ്യുകയായിരുന്നു. ടെസ്റ്റില് തന്റെ ഏഴാം ഇരട്ട സെഞ്ചുറി നേടിയ കോഹ്ലി 336 പന്തില് രണ്ടു സിക്സും 33 ബൗണ്ടറികളുമായി 254 റണ്സോടെ പുറത്താകാതെ നിന്നു.ക്യാപ്റ്റനായുള്ള കോഹ്ലിയുടെ 50ാം ടെസ്റ്റായിരുന്നു ഇത്. ഇതോടെ ടെസ്റ്റില് ഏറ്റവും കൂടുതല് ഇരട്ട സെഞ്ചുറി നേടിയ ഇന്ത്യന് താരമെന്ന റെക്കോഡും കോഹ്ലി സ്വന്തമാക്കി.
