കൊല്ക്കത്ത: ഇന്ത്യന് സമ്പദ് വ്യവസ്ഥ മാന്ദ്യപാതയില് ആണെന്നും ഈ ഇടര്ച്ച ഉടനെങ്ങും മെച്ചപ്പെടാനുള്ള സാധ്യത കാണുന്നില്ലെന്നും സാമ്പത്തീകശാസ്ത്രത്തില് നോബേല് സമ്മാനം നേടിയ ഇന്ത്യന് വംശജന് അഭിജിത് ബാനര്ജി. കഴിഞ്ഞ അഞ്ചാറു വര്ഷം സാമ്പത്തീക വളര്ച്ചാ നിരക്ക് സംബന്ധിച്ച കണക്കുകളുടെ അടിസ്ഥാനത്തില് സാമ്പത്തീക നില മെച്ചപ്പെടുമെന്ന് കരുതാനാകില്ലെന്നും പറഞ്ഞു.
നോബേല് സമ്മാന പ്രഖ്യാപനം വന്നതിന് തൊട്ടുപിന്നാലെ നടന്ന മാധ്യമ അഭിമുഖത്തിലാണ് അഭിജിത് ബാനര്ജി ഇക്കാര്യം പറഞ്ഞത്. വന് കടം നേരിട്ടിട്ടും സര്ക്കാര് ചില ബജറ്റ് ലക്ഷ്യങ്ങളും സാമ്പത്തീക പദ്ധതികളും നടപ്പാക്കാന് ശ്രമിക്കുകയാണ്. സമ്പദ് വ്യവസ്ഥ അടിയന്തിര ഘട്ടത്തിലേക്ക് പോകുമ്പോള് ഉപഭോഗത്തെ ഓര്ത്ത ആശങ്കപ്പെടേണ്ട സ്ഥിതിയാണെന്നും ഉപഭോഗമാണ് നിലവിലെ സ്ഥിതിയില് പ്രശ്നമെന്നും അദ്ദേഹം പറഞ്ഞു.
ഓരോ ഒന്നര വര്ഷത്തിനിടയിലും ഇന്ത്യയിലെ നഗര - ഗ്രാമ പ്രദേശങ്ങളിലെ ശരാശരി ഉപഭോഗം പരിശോധിക്കാറുണ്ട്. ഇതില് കഴിഞ്ഞ രണ്ടു സാമ്പത്തിക വര്ഷത്തെ കണക്കുകളിലും ഉപഭോഗ ശരാശരി കുറഞ്ഞു നില്ക്കുന്നതായിട്ടാണ് കാണുന്നത്.
ഇത് വ്യക്തമായ മുന്നറിയിപ്പാണെന്നും പറയുന്നു. സാമ്പത്തീകരംഗം പ്രതിസന്ധി നേരിടുകയാണെന്ന് സര്ക്കാര് തിരിച്ചറിഞ്ഞിട്ടുണ്ട്. സമ്പദ് വ്യവസ്ഥ മോശമായ ആ രീതിയില് തന്നെ തുടരുകയാണ്. ഇന്ത്യന് സമ്പദ് വ്യവസ്ഥയുടെ ഭാവിയെക്കുറിച്ചുള്ള ചോദ്യത്തിന് ഭാവിയില് എന്തു സംഭവിക്കും എന്നല്ല ഇപ്പോള് എന്താണ് നടക്കുന്നതെന്ന മറുപടിയാണ് തനിക്ക് കിട്ടേണ്ടതെന്ന് അഭിജിത് പറഞ്ഞു.
കഴിഞ്ഞയാഴ്ച സാമ്പത്തിക മാന്ദ്യമുണ്ടെന്ന് സര്ക്കാര് അംഗീകരിക്കുന്നുണ്ടോ എന്ന ഒരു ചോദ്യത്തിന് സഹായം വേണ്ടിടത്തെല്ലാം സര്ക്കാര് ആശ്വാസം നല്കുന്നുണ്ട് എന്നായിരുന്നു നിര്മലയുടെ മറുപടി. പ്രതിനിധികളുമായി കൂടിക്കാഴ്ച നടത്തുന്നുണ്ടെന്നും വ്യവസായ മേഖലയെ തിരിച്ചുപിടിക്കാനുള്ള ശ്രമങ്ങള് നടത്തിക്കൊണ്ടിരിക്കുകയാണെന്നുമായിരുന്നു ജൂലൈയിലെ ബജറ്റിന് ശേഷം ധനമന്ത്രി പറഞ്ഞത്.
ദാരിദ്ര്യം ഇല്ലായ്മ ചെയ്യാനും സാമ്പത്തിക മേഖല കരുത്തുറ്റതാക്കാനും ലക്ഷ്യമിട്ട ന്യായ് പദ്ധതി വിഭാവനം കോണ്ഗ്രസിനെ സഹായിച്ചത് അഭിജിത് ആണ്. കൊല്ക്കത്തയില് ഇത് നാലാം തവണയാണ് നോബേല് സമ്മാനമെത്തുന്നത്.
