കൂടത്തായി കൊലപാതക പരമ്പരയിലെ മുഖ്യപ്രതി ജോളിയുടെ മക്കളുടെ സംരക്ഷണം ഏറ്റെടുക്കുമെന്ന് വ്യക്തമാക്കി റോജോ തോമസും റെഞ്ചി തോമസും. സഹോദരന് റോയി തോമസിന്റെ മക്കളാണ് റോമോയും റൊണാള്ഡും. തങ്ങള് എവിടെയുണ്ടോ അവിടെ ഞങ്ങളോടൊപ്പം അവരും ഉണ്ടാകുമെന്ന് ഒരു ദേശീയ മാധ്യമത്തിനു നല്കിയ അഭിമുഖത്തില് വ്യക്തമാക്കി.
'അച്ഛനും അമ്മയും ഇല്ലാത്തതിന്റെ ഒരു വിഷമവും അവര് അനുഭവിക്കേണ്ടി വരില്ല. കുട്ടികളുടെ പഠനത്തിനാണ് ഇപ്പോള് പ്രാധാന്യം നല്കുന്നത്. മൂത്ത മകന് റോമൊ ഷിംലയിലേക്ക് തിരികെ പോകും പത്താം ക്ലാസില് പഠിക്കുകയാണ് ഇളയമകന് റൊണാള്ഡ്. അവന് ഹോസ്റ്റലില് നിന്ന് പഠനം തുടരണോ, ഹോം ട്യൂഷന് ഏര്പ്പെടുത്തണോ തുടങ്ങിയ കാര്യത്തില് ഉടന് തീരുമാനമെടുത്തും' റെഞ്ചി പറഞ്ഞു.
കൂടത്തായി കൊലപാതക കേസുമായി മുന്നോട്ട് പോകുമ്പോള് നിരവധി വെല്ലുവിളികള് നേരിടേണ്ടി വന്നിരുന്നെന്നും കുടുംബത്തില് നിന്നും പോലും ആരും പിന്തുണയ്ക്കാന് ഉണ്ടായിരുന്നില്ലെന്നും പരാതിക്കാരായ റോജോയും സഹോദരിയും വ്യക്തമാക്കി.
'രണ്ട് കാര്യങ്ങള് സംഭവിച്ചില്ലായിരുന്നെങ്കില് ഞങ്ങള് ഈ കേസിനു പോകില്ലായിരുന്നു. വ്യാജ ഒസ്യത്ത് നിര്മ്മിക്കാന് ജോളി ശ്രമിച്ചില്ലായിരുന്നെഭ്കില് എന്നതാണ് ഒന്ന്. ഒസ്യത്ത് വ്യാജമല്ല എന്ന നിലപാടില് അവര് ഉറച്ച് നില്ക്കുകയായിരുന്നു. രണ്ട് ഞങ്ങളുടെ ബന്ധു ഷാജുവിനെ ജോളി വിവാഹം ചെയ്തില്ലായിരുന്നെങ്കില്. ഈ രണ്ട് സംഭവങ്ങളും ഉണ്ടായതോടെ മുന്നോട്ട് പോകാന് തന്നെ ഞങ്ങള് തീരുമാനിക്കുകയായിരുന്നു.
പിണറായി കൊലക്കേസാണ് ഇത്തരമൊരു സംശയത്തിലേക്ക് തങ്ങളെ യഥാര്ത്ഥത്തില് നയിച്ചത്. സൗമ്യ എന്ന യുവിതി മാതാപിതാക്കളേയും മകളേയും വിഷം കലര്ത്തിയ ഭക്ഷണം നല്കി കൊലപ്പെടുത്തിയെങ്കിലും ഒടുവില് അവര് പിടിക്കപ്പെട്ടു. പിണറായി കേസ് ഞങ്ങള്ക്ക് മുന്നോട്ട് പോകാന് ആത്മവിശ്വാസം നല്കി'.
പരാതി നല്കിയ അന്ന് മുതല് ബന്ധുക്കള് ഉള്പ്പെടെ നിരവധിപ്പേര് ഞങ്ങള്ക്കെതിരെ രംഗത്തെത്തി. പരാതി പിന്വലിക്കാന് സമ്മര്ദമുണ്ടായി. നിരവധിപ്പേര് എല്ലാ ദിവസവും ഞങ്ങളെ വിളിച്ച് പരാതി പിന്വലിക്കാന് പറയുമായിരുന്നു.
അതേസമയം ജോളിക്കുമേല് തന്ത്രപൂര്വ്വം കുരുക്കുകള് മുറുക്കി അന്വേഷണ സംഘം. 15 ദിവസത്തെ റിമാന്ഡ് കാലാവധി നാളെ അവസാനിക്കുമ്പോള് റോയ് വധക്കേസില് ഇനി കസ്റ്റഡിയില് ആവശ്യപ്പെടാന് സാങ്കേതിക തടസ്സമുണ്ട്. ഇത് മറികടക്കാനാണ് പുതിയ കേസിലെ അറസ്റ്റ് നീക്കം.
