കൊച്ചി: ഉപതിരഞ്ഞെടുപ്പില് എറണാകുളം മണ്ഡലത്തില് ഭൂരിപക്ഷം കുറഞ്ഞതിനെതിനെച്ചൊല്ലി കോണ്ഗ്രസില് തമ്മിലടി. നഗരസഭയുടെ പ്രവര്ത്തനങ്ങളുടെ പാളിച്ചയാണ് ഭൂരിപക്ഷം കുത്തനെ കുറയാന് കാരണമെന്ന് ഹൈബി ഈഡന് വിമര്ശിച്ചിരുന്നു. ഹൈബിയുടെ ഈ പ്രസ്താവനയ്ക്ക് മറുപടിയുമായി രംഗത്ത് വന്നിരിക്കുകയാണ് മേയര് സൗമിനി ജെയ്ന്.
നേട്ടങ്ങള് മാത്രം സ്വന്തം പേരിലാക്കി നടന്നാല്പ്പോരെന്നും കൊച്ചിയുടെ വളര്ച്ചയ്ക്ക് ഓരോ ജനപ്രതിനിധിക്കും ഉത്തരവാദിത്തമുണ്ടെന്നും സൗമിനി പറഞ്ഞു. വികസനമുണ്ടായത് പല തട്ടിലുള്ള ജനപ്രതിനിധികളുടെ പ്രവര്ത്തനം കൊണ്ടാണ്. ചിലര് കോര്പ്പറേഷന് എതിരെ തിരിയുന്നത് തെറ്റിദ്ധാരണ മൂലമാണെന്നും സൗമിനി ജെയ്ന് പറഞ്ഞു.
ഉപതിരഞ്ഞെടുപ്പിന് മുമ്പ് തന്നെ സൗമിനി ജെയ്നെ മേയര് സ്ഥാനത്ത് മാറ്റാന് കോണ്ഗ്രസില് നീക്കമുണ്ടായിരുന്നു. ഉപതിരഞ്ഞെടുപ്പില് കോണ്ഗ്രസ് സ്ഥാനാര്ത്ഥി കഷ്ടിച്ച് കടന്നുകൂടിയതോടെ മേയര്ക്കെതിരായ നീക്കം ശക്തമായിരിക്കുകയാണ്. ഇതിനിടെ കോര്പ്പറേഷനെതിരെ ഹൈക്കോടതിയില് നിന്നുണ്ടായ രൂക്ഷ വിമര്ശനവും കോണ്ഗ്രസ് നേതൃത്വത്തിന് അടിയായി.
അതേസമയം മേയറെ മാറ്റേണ്ടതില്ലെന്ന് കോണ്ഗ്രസില് ഒരു വിഭാഗം ശക്തമായി വാദിക്കുന്നുണ്ട്. ഉത്തരവാദിത്തം എല്ലാര്ക്കുമുണ്ടെന്നും സൗമിനിയെ മാറ്റില്ലെന്നും കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന് വ്യക്തമാക്കി.
