ഉദഗമണ്ഡലം: ഗൂഡല്ലൂരിലെ വിമലഗിരി സെന്റ്മേരീസ് ചര്ച്ച് സ്കൂളില് മലയാളി വിദ്യാര്ത്ഥിനി ലൈംഗികാതിക്രമത്തിന് ഇരയായ സംഭവത്തില് പ്രതിയായ കരാട്ടേ മാസ്റ്ററെ അറസ്റ്റ് ചെയ്തു. പോക്സോ നിയമപ്രകാരം കേസെടുത്ത പോലീസ് സാബു അബ്രഹാം എന്ന 55 കാരനെ ചൊവ്വാഴ്ച അര്ദ്ധരാത്രിയോടെയാണ് അറസ്റ്റ് ചെയ്തത്. പോക്സോയിലെ 7,8 വകുപ്പുകള് പ്രകാരമാണ് കേസെടുത്തിരിക്കുന്നത്.
പെണ്കുട്ടിയുടെ മാതാവ് പരാതിയിലാണ് നടപടി. കരാട്ടേ ക്ളാസ്സില് വെച്ച് മാസ്റ്റര് സാബു അബ്രഹാം മകളെ ലൈംഗികാതിക്രമത്തിന് ഇരയാക്കിയെന്നാണ് പരാതിയില് പറഞ്ഞിരിക്കുന്നത്. സംഭവത്തില് നേരത്തേ സ്കൂളിനും പള്ളിക്കും പരാതി നല്കിയിരുന്നെങ്കിലും നടപടിയെടുക്കാന് കൂട്ടാക്കാതിരുന്നതിനെ തുടര്ന്നാണ് പോലീസിനെ സമീപിച്ചത്. പരാതി നല്കിയതിന്റെ പേരില് പെണ്കുട്ടിയേയും മാതാവിനെയും ഏഴു പേര് അടങ്ങുന്ന സംഘം വീട് കയറി ആക്രമിക്കുകയും ഇവര്ക്ക് പരിക്കേല്ക്കുകയും ചെയ്തിരുന്നു. ചെവിക്കും മറ്റും പരിക്കേറ്റ പെണ്കുട്ടി ഊട്ടിയിലെ സര്ക്കാര് ആശുപത്രിയില് ചികിത്സയിലാണ്.
അക്രമി സംഘത്തെയും പോലീസ് പിടികൂടിയിട്ടുണ്ട്. അതേസമയം പരാതി നല്കി രണ്ടു ദിവസത്തിന് ശേഷമാണ് പ്രധാനപ്രതിക്കെതിരേയും അക്രമികളായ ഏഴുപേര്ക്കുമെതിരേ പോലീസ് കേസെടുക്കാന് പോലും തുനിഞ്ഞതെന്ന് ആക്ഷേപമുണ്ട്. തിങ്കളാഴ്ച മുതല് ആശുപത്രിയില് ചികിത്സയില് കഴിയുന്ന പെണ്കുട്ടിയെ അവശത പോലും നോക്കാതെയും ആശുപത്രി അധികൃതരുടെ അനുമതി വാങ്ങാതെയും പോലീസ് ചോദ്യം ചെയ്യലിനായി കൊണ്ടു പോകുകയും ചെയ്തിരുന്നു. ഇതേ തുടര്ന്ന് രോഗിയെ കാണാതെ പോയെന്ന് കാട്ടി ചൊവ്വാഴ്ച വൈകിട്ട് പോലീസ് ഔട്ട്പോസ്റ്റില് ആശുപത്രി അധികൃതര് വിവരം നല്കി.
ചൊവ്വാഴ്ച ഉച്ച മുതല് പെണ്കുട്ടിയെയും മാതാവിനെയും കാണാതായെന്നാണ് ആശുപത്രി നല്കിയ റിപ്പോര്ട്ട്. പോലീസുകാര് രണ്ടുപേരെയും കൊണ്ടുപോയത് ആശുപത്രിയുടെ അനുമതി കൂടാതെയാണെന്നും ഊട്ടി സര്ക്കാര് ആശുപത്രി സൂപ്രണ്ടും വ്യക്തമാക്കിയിട്ടുണ്ട്. എന്നാല് ഇക്കാര്യത്തില് കേസെടുത്തിട്ടില്ലെന്നാണ് നീല്ഗിരി എസ്പിയും ഗൂഡല്ലൂര് ഡിഎസ്പിയും പറഞ്ഞത്.
മൂന്നു മാസങ്ങള്ക്ക് മുന്പാണ് പെണ്കുട്ടിക്കു നേരെ കരാട്ടേ അധ്യാപകനില് നിന്ന് ലൈംഗികാതിക്രമം നടന്നത്. സംഭവത്തെ തുടര്ന്ന് തുടര്ന്ന് പെണ്കുട്ടി കരാട്ടേ പഠനം ഉപേക്ഷിച്ചു. ഇതോടെ അധ്യാപകന്റെ അതിക്രമം മറ്റു കുട്ടികള്ക്കു നേരെയായി. ഇതിനിടെ സ്കൂളില് ചൈല്ഡ് ലൈന് പ്രവര്ത്തകര് നടത്തിയ കൗണ്സിലിംഗില് കുട്ടികള് ദുരനുഭവം പങ്കുവച്ചു. കുട്ടികളില് നിന്നും മൊഴി രേഖപ്പെടുത്തിയ ചൈല്ഡ് ലൈന് അത് സ്ഥലം ഡി.വൈ.എസ്.പിക്ക് കൈമാറി. ബാലവകാശ കമ്മീഷനും ഈ കേസില് ഇടപെട്ടിരുന്നു. കരാട്ടേ അധ്യാപകന് പുറമേ വിമലഗിരി സ്കൂള് പ്രിന്സിപ്പല്, പള്ളി വികാരി എന്നിവരെയാണ് കേസില് പ്രതിചേര്ത്തിരിക്കുന്നത്.
ബാലവകാശ കമ്മീഷനും ഈ കേസില് ഇടപെട്ടിരുന്നു. പരാതി നല്കിയെന്ന് അറിഞ്ഞതോടെ വിമലഗിരിയിലെ കുട്ടിയുടെ ഇടവക വികാരി കുട്ടിയെ സ്വാധീനിച്ച് മൊഴിമാറ്റിക്കാന് ശ്രമിച്ചിരുന്നു. ഇതിനു കഴിയാതെ വന്നതോടെ വികാരി തന്നെ കുട്ടിയെയും കുടുംബത്തേയും പള്ളിയിലെ ആരാധനയ്ക്കിടെ അപമാനിച്ചു സംസാരിച്ചു. ഇതോടെ കുടുംബം ഗൂഡല്ലൂര് പോലീസ് സ്റ്റേഷനില് എത്തി പരാതി നല്കി.
അതേസമയം സംഭവത്തില് സാബു അബ്രഹാം നിരപരാധിയാണെന്നു പറഞ്ഞ് ബന്ധുക്കളും എത്തിയിട്ടുണ്ട്. ചിലരുടെ പ്രേരണയുടെ അടിസ്ഥാനത്തില് പെണ്കുട്ടിയുടെ മാതാവ് കള്ളക്കേസില് പരാതി നല്കുകയായിരുന്നു എന്നാണ് ഇവര് ആരോപിക്കുന്നത്. സംഭവത്തില് പെണ്കുട്ടിയുടെ വീട് ആക്രമിച്ച അക്രമിക്കുകയും പെണ്കുട്ടിയെയും മാതാവിനെയും പരിക്കേല്പ്പിക്കുകയും ചെയ്ത കേസിലെ ഏഴുപേരേയും പോലീസ് ജുഡീഷ്യല് കസ്റ്റഡിയിലേക്ക് റിമാന്ഡ് ചെയ്തിട്ടുണ്ട്. 11 ാം ക്ലാസ്സ് വിദ്യാര്ത്ഥിനിയാണ് ഇരയായ പെണ്കുട്ടി.
